為保公司形象 花近百萬招聘

「Evelyn辭職你係咪一早知?點解佢唔早啲走呀?而家做兩個半月先遞信,獵頭公司嗰邊話過咗guarantee period,唔肯搵返個replacement畀我哋呀!」HR氣急敗壞,都不忘以質問嘅口吻challenge我。

我:「點會一早知啫,呢度好多人都係做一兩個月就辭職㗎啦,鬼叫公司份合約話過咗試用期之後,辭職要三個月通知咩,如果個員工想走又點會留多三個月呀,咁咪即係前後要做夠半年?不如你哋考慮下轉返一個月通知算啦!」

HR咁忟憎,因為公司用喺招聘方面嘅budget又多咗,今年好似話創埋新高,淨係畀獵頭嘅佣金都接近一百萬,有冇咁誇張?等我計一計畀你睇:

Below 月薪2萬,獵頭嘅收費係人工 x 年薪12個月(因為我哋冇雙糧)再 x 15%,For example請咗個$18,000人工嘅staff返嚟,我哋就要畀$32,400佣金。

職位愈高,意味住人工愈高,獵頭嘅收費亦會有所調整,超過4萬人工係會收25%,For example,請咗個$45,000人工嘅staff返嚟,我哋就要畀$45,000 x 12個月再 x 25%,換言之要畀$135,000佣金。

今年辭職嘅Middle Level同Senior同事印象中都有4個,計title應該每個都$40,000人工樓上,就當平均每人花費嘅佣金都係$135,000,呢度保守估計都用咗$540,000,仲未計好似Evelyn呢類比較Junior嘅staff每個三幾萬,我個部門算走得少人,隔籬team走得仲癲,有咩辦法每年招聘嘅budget唔係挨住過百萬吖。

HR詐型源於老闆詐型,但係老闆鍾意用獵頭,原因係成日喺招聘廣告登ad請人,外界會覺得間公司好地獄,會覺得呢度冇人做得長,會覺得有問題……咁你真係有問題吖嘛,所以唔知由邊年開始就要人哋辭職三個月通知,其實你正正常常一個月通知都冇乜嘢,而家個個一諗到過咗試用期唔走,resign就要坐三個月,前前後後即係做半年,咁咪好多人做一兩個月feel到唔對路即閃囉!

其實老闆嘅諗法係多餘,街外人睇唔到你出招聘廣告又點啫,公司年中咁多人走,相關行業裡面嘅人唔多唔少都知道咩事,佢哋會交流㗎嘛!好似我咁,每次同行內朋友提及自己間公司,佢哋第一句就會講:「嘩,呢間嘢好惡做㗎喎!」

當年我入嚟嘅時候,呢間公司仲ok㗎!只係近年多咗皇親國戚之餘,老闆為咗生意又訂咗啲苛刻嘅條款,好在我喺亂世降臨前叫做升咗職,大部分時間都係自己做自己嘢,唔使點樣同人交接同埋睇面色,但係後來先入嚟做嘅新人就比較難捱,例如公司將新入職員工嘅年假減少咗,由10日大假起步,我當年一入嚟起碼有14日先吖。

我覺得呢度最難頂係山頭文化,特別係Sales嗰邊,唔埋堆就會被孤立,但係而家嘅新一代比較有性格,唔太鍾意一味附和,佢哋就算自己一個人食飯都好enjoy,而大粒嗰班就會覺得你唔合群,好嘅客唔分畀你,淨係漏啲豬頭骨出嚟畀新人,所以Sales Team平均兩個月就要請人。

唔侵新人玩又要請?大嗰啲要霸住個位吖嘛,你縮咗就好難加返,條team太少人又冇氣勢呢,所以有啲部門咪走咗又請,請完又唔教,重重複複又出又入囉,總之有咩著數就係大嗰班自己享受,細嗰班只不過係工具同棋子,冇得搞㗎喇!

呢度最正係唔止Junior同事離職密,連Middle Level同Senior都好密,只要你係近年先入嚟做就好難適應,因為工作時成日會遇到阻滯,啲人都唔合作,有條Marketing Team先好笑,6個人,除咗個阿姐之外,其餘5個人每半年都會面目全非,個阿姐自己究竟認唔認得啲人㗎?

新年後開工幾日,公司又走咗兩個,2022至2023個招聘budget應該有增無減,其實重點根本唔係用獵頭抑或自己出ad請人,係公司嘅文化同氣氛呀!

error: