我個friend Zuki同男友拍咗拖4個月，男方個阿媽主動叫佢上屋企食飯。
Zuki好緊張，悉心打扮之餘，又精挑細選禮物，仲走去買咗條新嘅連身裙，話晒同男友拍拖後第一次見家長吖嘛！
上到去之後，伯母話想試下Zuki嘅手勢，希望佢即席煮返幾味。Zuki雖然偶有下廚，但稱唔上係熟練，更何況佢完全冇準備，所以就直接同伯母講：「返去練好啲廚藝，下次再煮畀大家食吖。」
本來以為可以禮貌打圓場，點知伯母咄咄逼人，話乜嘢餸都係咁煮，只要有基本功就得，仲幫佢預備好晒食材。
我：「預備埋？」
Zuki：「係呀，佢買咗啲菜，有條魚，另外有蝦，又同我講雪櫃有蛋，可以整碟蝦仁炒蛋。」
佢話當場唔識得畀反應，因為冇諗過嚟到要煮飯，但多少估到伯母嘅動機，奈何佢本身係一個好倔強嘅人，最終個結局係……
Zuki：「我特登落咗大半樽鹽炒碟菜，夠薑咪下次再叫我煮囉！」
我：「咁都仲有條魚同蝦仁炒蛋嘅。」
Zuki：「魚特登蒸唔熟，之後佢叫我蒸多陣，我再蒸到過晒時間，蝦仁炒蛋佢就嫌我冇挑啲蝦腸。」
伯母一臉嫌棄，Zuki走咗之後亦同男友嘈交，男友話阿媽只係想試下Zuki識唔識煮飯，想知道佢將來可唔可以處理家頭細務，又話阿媽成日強調「娶個識煮嘢嘅女人好重要」，更怪責Zuki只係煮幾碟餸都黑口黑面。
Zuki身邊都有啲朋友話佢唔啱，點解唔正正經經煮兩味出嚟，要咁倔強搞對抗。
其實每個人性格唔同，有人覺得冇所謂，有人選擇逆來順受，有人最憎被迫做一啲事，喺我立場嚟講，如果Zuki有錯，佢男友同伯母更加錯，第一次見家長難免緊張，仲要佢煮餐飯出嚟，人哋冇準備，內心抗拒係好正常，更何況好多男女朋友第一次去對方屋企作客，通常會被當成貴賓看待，例如會聽到～～～
你坐低等食得喇！
唔使執啦啲碗，過門都係客。
冇咩餸招呼你添！試下我哋啲家常便飯啦！
你真係幫手執嘢洗碗，又或者禮貌式作勢幫忙，其實都係一種互相尊重嘅回應，但係一嚟就被勒令煮餐飯，毫無心理準備之下要人做突擊測驗，咁已經係欠缺尊重。
男友唔出聲，全力協助阿媽焗個女朋友煮飯，係一種裙腳仔嘅表現，將來如果嫁入呢個家，相信會有大把嘢等住Zuki做，仲要係冇選擇之下焗住做。