早排喺公司個影印機copy，部機個蓋有個tray，當時已經見到有張水費單同埋一張糧單（因為我哋嘅糧單係細張啲好似回條咁），肯定係有同事影完印唔記得拎，咁唔理住啦，趕住copy，打開個頂，又有張身份證喺度。
張身份證唔可以唔理，因為我唔拎開佢就冇得影印，順勢睇下係邊位同事漏低，諗住轉頭拎返畀佢啦，一睇就見到係個叫Miki嘅女同事，我決定唔搞張水費單同糧單喇，始終有咁多私隱，影印完就淨係拎返張身份證畀Miki算喇。
我：「你漏咗張身份證喺影印機呀！」
Miki：「咦……唔該。」
嗱，雖然佢口講唔該，不過語氣並冇令我覺得感激。
我：「機頂仲有啲文件，係唔係你㗎？」
Miki：「呀，死喇，唔記得攞！」
講完佢就一枝箭咁衝咗出去影印機拎返啲嘢，神色好慌張，咁都好正常嘅，糧單喎！
本身已經唔記得呢件事，點知隔咗一排發覺Miki對我態度好差，我份人就直腸直肚嘅，有次見女廁得我同佢兩個，咁咪開心見誠問佢做咩事囉，好似見親我都好嬲怒咁，有咩講清楚好喎！
Miki：「多謝你囉，周圍唱我借財務。」
我：「咩多謝我呀？幾時唱你呀？」
Miki：「你見到我影印身份證、住址證明，仲有糧單吖嘛，唔係你唱邊個唱呀？」
我：「唔好屈得就屈，我冇做過喎！上次我影印見到你張身份證喺部機度，好心攞返畀你都唔感激，仲要咁樣講嘢？」
Miki：「咁你想我點講嘢呀？唱我借錢，唱埋我幾多年出世，我唔多謝你仲可以講啲咩呀？」
我：「你使唔使咁講嘢呀？最憎人屈我！」
然後Miki就離開女廁，聽都唔聽我解釋，我同佢喺office亦從此變成仇家一樣，直至目前為止都冇交流。
後來我將呢件激氣嘢同返自己department幾個同事講，點知佢哋全部知道晒Miki嘅事，不過唔係聽Miki講，一個係聽隔籬team嘅人講，一個係聽Admin講，另一個仲要聽茶水姐姐講，究竟有幾多人知呀？
「妖！係人都知㗎啦，佢1975年吖嘛，原來咁鬼老，仲成日著到懶係後生咁。」
「唔係借錢又點會影身份證影糧單呀？張水費定唔知電費肯定係住址證明啦！全部係借財務公司嘅基本動作。」
「條八婆原來有三皮幾人工，仲成日話好辛苦想唔做，好心佢啦，佢做啲嘢連一萬蚊都唔值呀！」
全部同事都知，全部同事都唔同source……
我：「點解咁多人知嘅？嗰日應該係我第一個發現啲文件同埋身份證㗎喎，我仲好心到拎去佢個位，之前冇人掂過㗎！」
其中一個同事插嘴：「你見到就等於你第一個發現咩，一早有其他人影印嘅時候見到啦，不過睇完擺返原位啫，Miki而家話你唱佢，咪就係因為你拎返畀佢同埋提佢囉，條八婆覺得你係第一手再散播消息出去呀！」
咁我真係死得冤枉喇，原來嗰日一早有人發現仲要睇埋，反而我揭都冇揭過啲文件，佢份糧單喺影印機頂個tray度明明係反轉，我要到而家先知Miki 1975年出世同埋三皮幾嘢人工，不過就乜都入晒我數。
我當然冇同Miki解釋啦，一來解釋都嘥氣，清者自清，何況其他同事如果心水清一定知道唔係我爆料，二來個個聽返嚟嘅source都唔同，根本唔知道散播消息嘅「源頭」係邊個，總之我就食咗隻死貓啦！
雖然唔肯定Miki係唔係利用啲資料借錢，其實佢話係搞移民都得㗎，但我完全明白Miki嘅心情，年齡地址收入全office都知，連只係返半日嘅茶水阿姐都知道，唔開心絕對理解，只係怪罪於我就有啲蠻不講理囉！
我一直反思自己做錯啲乜，似乎就係好心得滯，親手將身份證交返畀佢，又提佢漏咗嘢喺個tray未拎，呢個故事係咪教訓我哋唔好做好人？原來好心真係會著雷劈，呢下的確動搖咗自己嘅價值觀，下次遇到同類型嘅事，我一樣唔會睇人啲資料，不過亦唔會咁好人走去提對方，由得佢擺喺原位就算，無謂揦屎上身。