有個男會員Jerry同我講，因為呢大半年受疫情影響，我間speed dating公司近乎零活動處於癱瘓狀態（應該都就執㗎喇），所以佢嘗試玩 交友app ，仲識咗個好啱傾嘅女仔。
Jerry內向，唔係靚仔，唔係高大威猛，佢成日話自己醜樣，我覺得又唔算醜，同埋人同人之間相處亦唔應該單睇外表。
「WhatsApp都冇相，難道你玩 交友app 會放張相？」
Jerry：「點敢吖，我自卑，自己知自己事。」
不過Jerry仍然搵到一個女仔好啱傾，大家都冇喺 交友App 放相片，真係好pure地交流，再交換電話，晩晩天南地北咩都傾一餐，意外地發現好多興趣同價值觀都好相似，慢慢地再成為彼此嘅樹窿，呢種關係已經維持咗接近半年。
更巧合嘅係，兩個人傾傾下先知道大家嘅公司只相距一條巧明街，女方率先提出約Jerry食個lunch。
Jerry：「我推咗呀，佢問點解？我直接講自己好樣衰，好怕佢見到我真人之後，大家嘅關係就會完結。」
「咁佢點答？」
Jerry：「佢又冇迫我，仲係咁笑，話唔會介意，可以等我有心理準備同埋信心先再約。」
結果相隔一個月，女方再提出食lunch，Jerry亦唔希望身為男人扭扭擰擰，最終就答應見面。
Jerry話出到嚟食飯之後，雙方都表現尷尬，平時喺電話裡面雞啄唔斷嘅氣氛不復再，但係對佢嚟講，依然係一次愉快嘅約會，原來個女仔仲好靚。
Jerry：「其實佢靚唔靚唔重要，就算出到嚟先知佢係一個大肥婆都冇所謂，因為我最著迷係彼此嘅交流同合拍度，靚，只係bonus。」
好可惜，見面之後女方態度突然變得冷淡，唔會再晚晚傾計，同以前有好大分別，Jerry有諗過係自己唔夠靚仔，唔夠高大，亦諗過可能係見完真人要消化同適應，但係佢覺得好唔習慣，曾經膽粗粗問個女仔，係咪出嚟嗰陣講錯嘢或者做錯嘢，女方話唔係。
翻天覆地嘅變化之後，Jerry都係忍唔住再追問突然變得冷淡嘅原因，個女仔終於開門見山表示，覺得Jerry唔夠高，「有少少醜」，唔係自己想要嘅類型。
Jerry表示：「個女仔咁講，我反而釋懷，有時我照鏡見到自己個樣都接受唔到，試問又點可以要求佢接受我呢？反而會諗，當時傾電話好甜蜜，我真係feel到佢對我有好感，咁即係話我都有吸引別人嘅地方，後來見咗面，佢覺得同想像有好大落差，真係冇辦法鍾意我，其實係好正常，起碼佢最後都將自己真實諗法同我講，冇敷衍同埋冇呃我。」
腦海中忽然播起陳慧嫻一首舊歌
就算多平凡
就算就算多平凡
總亦有關心他的伴侶
就算多平凡
總有互愛的情人
怎麼偏偏我現時失掉你
Jerry係一個好人，我相信終有一日佢會搵到真愛－－－－－「就算多平凡，總有互愛的情人」，呢句歌詞絕對千真萬確。
上一篇兩性文章：爸爸級同事避老婆 WFH都堅持返工