女人打起交上嚟其實可以好狼，扯頭髮就指定動作㗎喇，跟手就你一巴我一巴，繼而再出穿心腿踢到對方鼻屎都飛埋出嚟，上個月我先親眼目睹呢一幕，不過地點唔係街或者公共交通工具，而係我間公司，兩位女同事真係拳拳到肉。
兩條女咁狼死，起因係一位叫Ada嘅痴女同事，竟然暗撻另一位同事Jenny嘅老公，據聞「涉事」嘅3位當事人只不過食咗一餐飯咋，但係我哋成班人又覺得件事好合理，因為Ada做第三者絕對有前科，佢有鋪癮做第三者。
聽返Jenny講，佢老公間公司都喺灣仔，所以偶爾會約埋一齊食晏，其中一次Ada就冇人陪，話想跟埋一齊行，Jenny因為做得一年左右唔知咁多嘢，咁咪由得Ada join佢兩公婆囉，食食下飯Ada要selfie，然後趁Jenny去廁所嘅時候就話想過返張相畀Jenny老公。
據聞Ada表示自己唔係用iPhone，所以冇得AirDrop，故此就問Jenny老公拎電話以WhatsApp send相，本身相安無事，點知後來先知Ada暗地裡有msg Jenny老公傾計，仲主動約出嚟食飯，當然係冇預Jenny啦！
以上係Jenny講嘅版本，我哋成班同事當然唔知道太多細節，包括最後係點樣發現，不過牛唔飲水唔撳得牛頭低，先唔理佢老公係咪有出嚟同Ada撐枱腳，你兩個背住Jenny私底下傾WhatsApp已經夠晒古怪啦！
一單還一單，雖然唔排除Jenny老公都色心起，但係我哋絕對相信Ada會做出以上嘅進擊行為，因為淨係計公司裡面都發生過三次喇，兩次關人夫事，一次關人哋男朋友事，點解唔正正經經搵個single嘅男人一齊呢？究竟佢係咩心態呢？
之前公司入面嗰幾單嘢都好經典㗎，有一次就搭上咗Marketing嘅已婚同事，當時好多人都撞過佢兩個「拍拖」，不過男歡女愛嘅嘢，唔通我哋叉隻腳管埋一份咩，最終有咁耐風流就有咁耐折墮，Marketing同事個老婆發現咗然後殺上公司大吵大鬧。
以為Ada女仔之家會覺得瘀而選擇辭職啦，點知又冇喎，反而係Marketing個已婚男同事resign走咗，最後佢段婚姻有冇破裂就唔知喇，總之Ada繼續留低扮冇事發生，果然係你唔覺得尷尬，尷尬嘅就係人哋。
正室殺上office大吵大鬧之後，Ada並冇收斂，隔咗一年左右又搭上另一位男同事，呢個就未婚嘅，但係個男仔嘅女朋友就係公司另一位女同事，呢pair情侶一早公開晒㗎喇，所以Ada係明知自己做第三者都介入，最終搞到個女同事同佢面阻阻，呢對情侶亦先後辭職。
另外一單就比較近，大約年幾之前，Ada同佢個部門經理搞埋，又係有婦之夫，又係喺街畀其他同事撞到，個同事仲偷偷地影咗條片私底下傳閱，video清晰見到Ada同經理，絕對冇屈佢哋，呢單就冇人上公司嘈，不過就人人都知佢兩個有路，唔知而家仲有冇一齊呢？或者純粹打下友誼賽啩！
講到最激就一定係今次喺office打交㗎喇，老細叫咗Ada同Jenny入房訓話，但又冇take任何action，睇怕老細都唔想插手呢啲咁複雜嘅感情問題，早兩日我哋先知Jenny遞咗辭職信，Ada算唔算又贏一仗呢？佢又真係唔怕無面，又唔怕其他人喺背後講佢㗎喎！
發生兩條女打鬥事件之後，有個男同事（又係已婚）同我哋講，Ada其實有約佢出街，不過佢對Ada完全冇興趣，仲話要滾都唔會喺公司滾。呢位男同事仲話Ada好進取，每晚都send msg畀佢，又show咗張Ada send嘅一張喱士睡衣相畀我哋睇，雖然冇影樣，但係大家都認得啲手指甲嘅顏色。
雖然我唔明Ada點解對人夫同埋人哋男朋友特別有興趣，但聽講有啲女人覺得名草有主嘅男士先至夠安全感，甚至係認為咁樣先有挑戰性，征服到呢一type嘅男士會好有成功感，當然仲有啲女人係為錢，或者希望喺性方面得到滿足啦！
有一樣嘢更加奇怪，公司曾經有條仔主動溝Ada，仲要寫卡送花，所以好揚，而且嗰條仔都算五官端正，起碼唔係甩皮甩骨毒男，肯定好樣過嗰位已婚部門經理先，不過Ada完全唔受溝，似乎單身嘅男人都唔係佢杯茶㗎喇。