收到電話問屋企有冇人？可唔可以提早一日送傢私嚟？梗好㗎，反正我冇嘢做。
過咗40分鐘，大隻叔叔單拖搬上嚟，只見佢一手一腳裝埋，真心佩服。
「見你呢單裝咗車，咪打嚟問你方唔方便囉，如果你話唔得，其實我聽日上嚟都可以，好快搞掂唔阻你出街。」
我：「唔緊要，我冇街去，聽日唔使趕頭趕命返嚟仲好，不過你哋星期日都要開工㗎？」
「冇計啦！不過有錢賺冇所謂，辛苦啲囉，你屋企咁多書嘅，教書㗎？」
我：「唔係，邊有資格教書，鍾意睇書同寫下嘢啫。」
「哦，文化人，咁你寫下啦，等人識多啲字，唔好學我咁要做啲擔擔抬抬嘅牛工。」
我：「身邊啲人識字多過我呀！我同你都係打份牛工啫，冇分別，佩服你一個人又搬又裝，好犀利。」
「有咩犀唔犀利吖，有得揀我都唔想，以前細細個唔聽阿媽講，成日要自由自在，群埋班爛仔，想做乜就做乜，老咗先嚟後悔已經太遲，你睇下我而家，唔慌唔自由喇，踩咗十幾日冇放假，冇錢係要頂硬上㗎喇！」
講到呢度，佢拉起咗件衫畀我睇：「呢條血痕你見唔見呀？上星期搬個櫃整親，而家仲痛緊，搵兩餐都係冇得唞，焗住做，你記得寫呀！我唔識點講，不過你明我意思就得啦！細個唔讀書唔畀心機做嘢就以為自由自在，大個先冇晒自由仲慘呀！」
眾生皆苦，我唔覺得自己同呢位叔叔有咩分別，純粹工種同埋搵食方式唔同，絕對冇高低之分，不過佢口中呢個道理，我諗應該係自由自在並非你想做乜就做乜，而係當你唔想做一樣嘢，你有條件去選擇唔做，咁先係真正嘅自由。
我仍然有好多嘢冇得選擇要繼續做，唯有不斷努力，希望某日會有say no嘅能力，條件，同埋自由。