好記得嚟呢間公司interview嘅時候，個HR臨尾唔係叫我返去等消息，亦都唔係問我有冇問題，而係同我講咗句：「有冇人話你似明星呀？拍電影㗎！好紅㗎啲戲，part住劉德華，part住鄭伊健，呀~一時醒唔起個名。」
得啦，明㗎喇，我唔會因為你咁講而覺得自己似大明星或者第二配角，所以我直接答佢：「賭俠1999個Rocky，古惑仔之人在江湖個大佬B，仲有古惑仔之隻手遮天個笑面虎吖嘛！你係咪講緊吳志雄，志雄哥呀？」
HR：「係呀係呀，我唔知個演員叫吳志雄，但係我記得大佬B，有冇人話過你似佢？」
我：「有，好多朋友都咁講，家姐細佬都係咁講，我知㗎喇！」
唔想認都要認，我都數唔到係第N次畀人話我似志雄哥，係老豆老母冇講過啫，因為佢哋唔知邊個係志雄哥，亦都唔知咩係大佬B，直至有一次我細佬喺google search出咗張相比嚟畀兩老睇，我老豆就話：「嘩，咪咁衰啦，呢個人紋晒身㗎喎……不過又真係有啲似，眼同鼻似囉！」
我老豆又真係講得出口，佢自己都唔似志雄哥，家姐細佬又唔似大佬B，咁有冇人可以解釋下我點解會生得似吳志雄？唔通我親生老豆係吳志雄？定係我老母同大佬B係舊相好，曾經有一腿？
家姐有次畀個痴線佬尾隨，差唔多去到屋企樓下就call我落嚟，當時細佬都喺度，佢又唔叫細佬淨係叫我，咁都冇計啦，唔通唔救佢咩？結果我一落到樓，條痴線佬離遠見到我就走，家姐話我個樣有殺氣，有種江湖味，佢話我個氣場可以趕走啲變態佬喎！
返工嘅時候，又有其他同事話我好似大佬B，問我係咪姓吳，係咪同吳志雄有親戚關係，我真係答到口都臭，不過你問我介唔介意同事咁講，認真我已經麻木咗，畀人稱呼為大佬B都有十年八年，愈大愈似呢下先恐怖。
因為我份工係要對walk in客處理維修同投訴，我個counter係最安靜，最少人發爛渣搞事，反而其他同事可能個樣比較腍善，遇到西客大吵大鬧嘅頻率係好高，畢竟呢度係維修服務中心，上得嚟都係有嘢壞咗，難免會好重怨氣。
新年前先有個師奶上嚟嘈嘈閉，話我哋啲機好易壞，但係用咗9個月先拎嚟話要全額退款，Supervisor行埋去幫拖都冇用，梗係冇用啦，我個Supervisor係一個好細粒，連5呎都唔知有冇嘅女人仔，好禮貌好陰聲細氣，邊個會驚呀？
然後我個counter冇人，咪行埋去睇下有咩幫到手囉，都未出聲，個師奶見到我已經自動tune返細自己嘅聲浪，我話過咗試用期冇得退錢，只可以修理，跟住佢就嬲爆爆咁走咗，甚至冇留低部機維修，知你見到我似大佬B所以淆底，咁你部機壞咗都要整㗎，你拎返走做咩啫？
我今年31歲喇，一次拖都未拍過，到而家仲係處，相信喺香港已經冇市場，同事提議我識多啲外國人，反正疫情已經冇人管，試下落老蘭，因為外國人唔知邊個係大佬B……
唔係貶低志雄哥，可能你會話似大佬B有咩咁失禮？但我係女仔嚟㗎，鬼佬唔識大佬B都會覺得我似男人同埋兇神惡殺啦，所以重點唔係女生男相，而係好似大佬B，我已經留長頭髮，仲畀人覺得似都唔知點算。
最初出嚟做嘢聽到人咁講好唔開心㗎，有人話想「跟我」，又有人問我係咪識蔣天生……唉，把口生喺人哋度，有時都唔介意得咁多，同埋我會分佢哋係善意定惡意嘅，與其一聽到就扯火，自己匿埋唔開心，咁不如樂觀接受同面對啦！職場咁多人，管唔到對方把口，咪管理下自己嘅EQ囉！
嚟緊我諗住再改變下形象，可能會嘗試電頭髮，或者喺化妝方面下少少苦功，希望有得救啦！