我有個小學同學叫阿鵬，因為大家住埋同一個公共屋邨，細個成績又差唔多，所以後來中學都派埋同一間繼續做同學，直至F.3嗰陣佢突然唔讀，話要出去做麵包學徒，冇興趣讀書想早啲打工賺錢喎！
我唔知呢個係阿鵬自己嘅決定，抑或係佢老豆老母嘅決定，F.3就輟學真係好可惜，但我當時只係一個中學生，勸告都係流於表面，唔識點樣深層次向阿鵬陳述利弊。由於大家好friend，又住得近，即使唔再係同學，彼此嘅關係依然好close，間唔中會一齊打籃球，夜晚仲會去乒乓波枱傾計，邨童係得呢啲娛樂啦！
後來聽阿鵬講，原來佢老豆爭人周身債，直頭有大耳窿上門淋紅油嗰隻，跟住就走咗佬，留低佢同阿媽相依為命，反正無心向學，不如早啲出嚟做嘢，咁阿媽唔使一個人孭起頭家咁辛苦。
當年阿鵬曾經有一句名言：「讀咁Q多書唔知做乜，大學啲學費又貴，讀到23、24歲先出嚟做嘢，起碼要做到30歲先抵銷到讀書啲開支啦，咁一個人咪要到30幾40歲先開始真正賺錢囉，我不如早啲出嚟做嘢仲好，享受完7年免費教育就搵真銀喇，不知幾爽。」
我都有反思阿鵬嘅說話，好似好有道理，又好似係歪理，嗰陣時細吖嘛，邊有咁強分析能力吖！
阿鵬先去做麵包學徒，跟住轉咗行去做凍肉跟車，跟車佢又做咗半年唔夠，不過辭職原因都係一樣～～～嫌辛苦。
阿鵬：「痴線，啲凍肉勁重，我一袋一袋咁托又畀司機鬧，托唔郁都冇辦法㗎喎！」
我：「咁嗰份麵包學徒又點解唔做呀？」
阿鵬：「熱到仆街喎！點做呀？又要晨咁早起身，其實係佢哋炒我嘅，因為我有幾次都唔知醒，算啦，佢唔炒我，我遲早都炒佢。」
阿鵬係一個好易放棄同埋三分鐘熱度嘅人，坦白講佢嫌辛苦係意料之內。
後來阿鵬同佢阿媽申請調遷公屋，大家距離遠咗，見面次數亦相對少咗，後來有一次佢搵我出嚟食飯，我哋約喺旺角等，只見阿鵬著住成套西裝出現，心諗咩料呀？準備參選十大傑出青年呀？
我：「你又撈緊咩？」
阿鵬：「冇呀，跟個friend賣啲健康用品同埋護膚品，我入咗好多貨呀，一嚟已經係藍寶石經理，呢支洗頭水醒你，好嘢嚟㗎！我公司啲人一箱箱咁買，你拎返去試下啦！」
雖然當年嘅資訊冇而家咁發達，但我都知道呢啲係傳銷，唔知阿鵬係唔識sell嘢，抑或真心當我朋友，總之佢嗰晚並冇sell我，後來亦冇叫過我幫襯，反而成日將啲潤膚膏、洗頭水、護髮素、肝油丸拎畀我，真係好慷慨。
一直想叫阿鵬小心啲，因為佢似乎意識唔到做緊嘅嘢係傳銷，然後有次我搵到個機會提醒佢：「你公司啲貨唔係好掂喎，我畀咗支潤膚膏阿媽用，我阿媽生晒粒粒，如果你賣畀其他人真係要小心啲，隨時出事。」
阿鵬：「咁大鑊？我啱啱先出去借錢入咗廿幾箱喎！」
我：「借錢入貨？唔係啩，你借咗幾多錢？」
阿鵬：「差唔多20萬！發達靠呢舖㗎喇，起碼賺一個double，錢搵錢吖嘛！係咪你阿媽皮膚敏感咋！」
其實阿鵬係完全冇商業頭腦同埋危機意識，但係考慮返佢嘅生活環境同成長經歷，唔通你指望佢有良好嘅分析能力咩？雖然阿鵬冇sell我買嘢，亦冇叫我入會做咩藍寶石經理，不過有次佢無端端問我借錢，嗰陣我先啱啱大學畢業，打緊份萬零蚊嘅工。
我：「咩事要借錢咁唔掂？」
阿鵬：「之前啲貨賣唔去，又搵唔到下線入會，借返嚟嘅錢已經夠期要還，冇晒辦法之下先開聲求你，我同嗰啲黑財借，好麻煩㗎！」
我：「咁你想借幾多吖？幫到一定幫，不過我而家都唔係好高人工……」
阿鵬：「知你出嚟做嘢冇幾耐，借幾千都得啦，我呢度借啲嗰度借啲，應該冇問題嘅。」
識於微時，如果佢呃我都冇辦法，結果我將當時銀行裡面嘅萬幾蚊拎晒出嚟，諗住幫阿鵬解決燃眉之急，點知佢又忽然話唔使。
我：「點解呀？嬲我借得少呀？真係得咁多咋！」
阿鵬：「得鬼閒嬲你咩，條數搞掂咗啦！老豆幫我㗎！一炮過找晒啲數，仲打本畀我開間電腦用品舖頭。」
我：「你老豆良心發現呀？當年走咗去又同你阿媽離婚，而家發咗達返嚟找晒啲大耳窿，再找埋你條數咁威？」
阿鵬：「都唔係嗰個老豆，呢個後父嚟㗎，我阿媽早排出去再搵工，喺做嘢嗰度識咗個男同事，呢個男人幾有錢㗎，佢幫我找完數先再打本畀我開舖，話識得人可以供貨畀我喎！」
阿鵬有錢就認老豆，但佢真係找晒條數，亦真係開咗間舖，我有去佢舖頭打躉，只係唔明點解，去親都冇客。
我：「其實係咪我坐咗喺度，搞到舖頭好窄所以冇人入嚟呢？」
阿鵬：「關咩事吖！由朝到晚得幾個人行入嚟，而家夜晚喇，一張單都未開過，呢個商場旺丁唔旺財㗎！」
後來我嚟多幾次，又觀察多幾次，發覺唔係旺丁唔旺財咁簡單，因為其他舖頭生意好好，而阿鵬嗰間係特別靜，綜合我個人分析：
1）阿鵬喺間舖裡面食煙，真係好大陣味。
2）偶爾有人入嚟睇嘢，但阿鵬嘅態度係好差，又或者完全唔理人，人哋問嘢又鳩答。
3）以同類型舖頭同產品嚟講，阿鵬個定價太進取，絕對係全場最貴。
我同阿鵬分析，不過佢咁樣答我：「自己間舖都唔食煙，咁開舖嚟做咩呀？同埋啲人係啱就會買㗎啦，你同佢講咁多嘢，咪盞佢嫌煩走咗去。」
我：「唔係叫你sell佢，係人哋問嘢嘅時候答得仔細啲，同埋你知唔知自己啲貨全場最貴？有冇做過research？你開個excel列晒來貨價同埋標價出嚟啦，我試下幫你計。」
阿鵬：「唔啦！咁Q煩，都唔識呢啲嘢！」
完全切合返阿鵬本身嘅性格，講真佢份人係不學無術，亦都不思進取。
又過多大半年，佢間舖終於執笠，我好意外，好意外點解可以捱多大半年，原來阿鵬間舖一直係由後父交租，只係蝕到一個地步，佢後父都忍唔住要止血。
不過阿鵬已經唔志在喇，因為佢識咗隔籬舖條女，兩個人打得火熱，有異性冇人性嘅阿鵬開始變得難約，嗰段時間應該半年先見到佢一次，咁阿鵬又撈咩呢？
無業。
無業又點生活點拍拖呢？問得好好呀，我嗰陣都係咁樣問阿鵬，然後佢話畀我知：「我條女好有錢，原來佢開間舖都係玩玩下，佢老豆勁多生意同物業，都唔知係咪洗黑錢，不過唔理佢啦！」
由細識到大，雖然阿鵬份人又懶又冇恆心又冇行動力，但佢都有一個優點，就係好專一，佢當然貪女朋友啲錢啦（佢自己親口講），不過阿鵬又的而且確真心鍾意條女，佢幾貪玩都好，永遠唔會玩女人（起碼我咁多年都未聽過）。
我唔知阿鵬算唔算食軟飯，我淨係知佢同呢條女一齊之後身光頸靚，3年前仲正式結埋婚，喺婚禮上我第一次見到阿嫂，頂你個肺吖，仲要靚㗎喎！我唔知佢哋點樣互相吸引，只係知道佢哋有好多共同嗜好，就係鍾意食煙，鍾意玩，唔鍾意返工，阿嫂根本係「翻版阿鵬嘅女人版」，唯一唔同係阿嫂屋企好有錢。
我只係一個庸俗嘅普通男人，戴靚錶、揸靚車、住靚樓，通通係我大學畢業出嚟做嘢嘅奮鬥目標，只可惜暫時冇一樣做到，而阿鵬已經全部擁有。
當我早排煩惱緊budget有限，應該去邊度旅行清大假嗰陣，阿鵬已經去完泰國、英國、美加，再返嚟香港，上星期仲去埋日本滑雪，唔使做，唔使請假，唔使畀公司規限，用錢唔使睇餸食飯。
講開食，而家同阿鵬出嚟見面，佢一定會喺好靚嘅餐廳book枱，仲會揸埋車接送我，佢話鍾意返嚟公共屋邨行下喎……係呀，我仲住喺呢條邨，阿鵬就住緊半山同我講懷念舊陣史。
有時我都會諗，阿鵬以前好似一直為錢煩，但其實每次都唔使點煩，因為硬係有個貴人出現幫佢搞掂，然後傳銷又好，開舖又好，失敗收場總有人幫佢執手尾。
阿鵬讀書少過我，識嘅嘢少過我，咁又點呢？佢而家生活富裕過我好多，而且係開心，食軟飯但係個老婆靚喎，真係吹佢唔漲。
葡萄當然有啦，但佢係我個friend，點都祝福佢嘅，只係諗到好醜命生成呢句就不禁有少少唏噓，唉，沒那種命就係沒那種命，唔恨得咁多，我都係繼續搵平機票格價啦！