姨媽由23踩到我33 衰心軟介紹工畀佢個仔

新年食飯最怕見到嘅親戚係我姨媽,一年一次無可避免,我提出過咁大個人唔再跟去拜年,但係我阿媽永遠都會打「悲情牌」,佢話阿公阿婆已經走咗,長輩見一次少一次,叫我忍耐下出席食個飯,當係畀面佢喎!唉,咁我阿媽又冇講錯嘅,我理解佢諗法。

理解還理解,姨媽份人真係好難頂,佢性格囂張跋扈,又睇唔起所有人,永遠覺得自己最叻,試過有幾年出去食團年飯仲走去鬧啲酒樓侍應同經理,總之好乞人憎,其實我阿爸都好憎佢,只係阿媽同姨媽始終係親姐妹,我阿媽忍慣咗。

其實姨媽已經有最大嘅報應,就係生咗個廢柴表弟,佢個仔而家25歲,書讀唔成,終日無所事事又唔搵工,呢個表弟出到嚟食飯永遠得一個pose,就係坐喺度用部手提電話打機,招呼又唔打,似足佢老母一樣,對眼生喺額頭,目中無人沙塵白霍咁款,非常冇禮貌。

今年新年我見呢個表弟仲多咗個嗜好,就係玩抖音玩小紅書,因為佢一路食飯一路拍拍拍,我睇住佢拍完就upload上去頭先嗰兩個App,見到佢咁嘅款,你就會明白咩係「抖音一響,父母白養」,呢個表弟基本上已經冇靈魂。

表弟咁廢仲咁寸柒柒?吓!廢人通常都唔會覺得自己廢㗎喎!表弟啲語氣就係嗰種「車!我唔做咋!如果做一定係最叻!一定叻過晒你哋!」至於姨媽,點解個仔咁廢,佢都仲可以囂張跋扈?同一道理,佢並唔覺得自己個仔廢,佢覺得自己個仔係好叻,只係懶。

我阿媽就長期開著個「聖人mode」,其實唔止對姨媽係咁,就算對住其他人,我阿媽嘅座右銘都係:算啦、幫得就幫啦、唔好計較啦……你可以話我阿媽係左膠,亦可以話係易心軟。

我阿爸就相反,佢好憎姨媽,呢個老婆嘅家姐由佢哋未結婚嘅時候已經睇唔起我阿爸,彈佢做司機冇出息搵唔到錢,又話我阿爸咁多年都係住公屋買唔起私樓,不過公平啲講,我姨媽係睇唔起全世界嘅人,唔止睇唔起我阿爸。

我都收到相同對待㗎,由23歲開始出嚟做嘢,姨媽已經話我大學畢業冇用,因為香港通街都係大學生喎!就算我而家已經33歲,由當初嘅junior做到而家升咗職變真正嘅senior,姨媽都keep住一年一次畀說話我聽,佢話我任職嘅公司唔出名,唔係咩大企業。

姨媽啲批評我聽慣晒,但係今年新年佢收斂咗,唔係變返好人,而係佢有目的。

姨媽:「阿宙,聽講你升咗職喎!而家係部門主管。」我叫阿宙,升咗職佢都知,肯定又係我阿媽講出去。

我:「主咩管吖,細公司冇話主唔主管,都係咁啦!」

姨媽:「咁又唔係咁講,你阿媽話你公司要請人,好似話冇經驗都得吖嘛,我見你呢份工做咗咁耐,應該都唔錯,介紹表弟入去做啦,第日你公司都多個自己人,表兄弟拍住上,你阿媽話你自己都可以決定請人喎,幾叻仔,表弟可以跟你學嘢。」

我即刻睥住阿媽,因為早排公司走咗兩個人,公司又話新年後先出招聘廣告,我唔夠人手晚晚要OT,所以返屋企呻咗幾句,估唔到我阿媽連呢啲嘢都同姨媽講,你哋係親姐妹啫,都唔使攞我做話題,仲要講到咁deep呀?

至於請人可以話事,呢樣係真嘅,因為我一年前介紹咗阿爸嘅舊同事去做倉,或者我阿媽又覺得我好威,連呢啲事都走去同姨媽講,點估到姨媽平時咁自命不平凡,又會走嚟打我主意,表弟唔係好叻㗎咩?做咩求我呀?

我:「都唔係我話晒事㗎,公司請人都係要見工……」

姨媽:「你幫下表弟啦,佢之前見咗幾份工都冇著落,我唔想佢日日喺度玩手機,有時又喺屋企捉住我哋跳舞,話要拍咩片,你幫下佢啦!」

我真係未見過姨媽會用啲咁低聲下氣嘅態度講嘢,依我估計,表弟應該唔止咁少料,姨媽應該係到咗極限再忍唔住,先至會叫我介紹工畀表弟。

其實我好想寸姨媽,因為佢由我畢業到而家都睇唔起我嘅公司同工作,但我真係遺傳咗阿媽嘅心軟性格,唉,算啦,多一事不如少一事,冤冤相報何時了,一場親戚寸嚟寸去做咩吖!

阿媽呢個時候開聲幫口:「阿宙,你就介紹表弟去做啦,有份工呢,個人踏實好多㗎!」

我老豆打晒眼色叫唔好,無奈都係嗰句,我係阿媽生出嚟,完全冇心軟DNA你都唔信啦,結果我就答應咗,但都補充一句:「可以見,不過唔係我話事,始終要過人事部,我可以同人事部一齊見表弟,人工唔會好高,要從低做起。」

姨媽:「冇問題冇問題,人工幾多唔緊要,最緊要係你幫下個表弟,幫佢搵返人生目標。」

講以上呢堆說話嘅時候,表弟喺隔籬係聽到,但我見佢都係用部手提電話碌緊抖音,睇啲網紅喺度跳舞嘅片,真係唔生性,你可以話姨媽好慘,不過養到個仔咁廢,又係佢自己一手一腳造成,怪得邊個?

食完餐飯沿路返屋企嘅時候,我阿爸係咁鬧阿媽同我,阿媽秉承佢嘅做人宗旨,就係算啦,幫得就幫,仲要係親戚,然而阿爸就不停埋怨我,問我點解要介紹表弟。

我:「咁阿媽開到聲唔通當眾落佢面咩!」

阿爸嬲咗我同阿媽兩日,真係兩日都冇同我哋講嘢,咁大個人都唔化,阿爸好記仇,又小器,同阿媽嘅性格係相反。

前日終於安排咗表弟去我公司interview,個衰仔唔知咩事突然生性,著晒成套老西整整齊齊,仲好有禮貌咁表哥前表哥後,冇再拎住手提電話打機碌抖音小紅書,睇嚟佢想搵返份工嘅決心好大。

Interview嘅時候表弟可以話係超水準演出,因為吹水認叻係佢強項,扮嘢都好醒,佢扮謙虛個樣真係呢……絕對可以做影帝。

In完之後HR就同我講:「你表弟ok吖,醒醒目目,你趕住請人吖嘛,唔使問我啦,直接請咪得囉!」

同日放工返到屋企,阿爸態度keep住好衰,阿媽就好緊張咁問表弟見工見成點,我話等等先,擺低個袋打畀表弟,阿媽好開心,阿爸個樣衰到震。

我打通電話之後同表弟講:「唔好意思呀,HR話有另一個求職者好啲,決定請嗰個人,係囉係囉……唔好唔開心啦,我公司福利好差,人事關係又複雜,入唔到嚟仲好啦……係囉係囉……你專心拍抖音同搞小紅書仲好啦,我有friend搞小紅書賺勁多錢,好多業配,係囉係囉…….畀心機,睇好你!」

阿爸衰到Yeah出聲,阿媽就好失落,喃喃自語咁話唔知點同姨媽交代,又質疑我點解唔可以話事,我話HR又可以決定請邊個,我只可以畀意見,最終決定權唔係我。

當阿媽打電話同姨媽say sorry嘅時候,阿爸就捉咗我入廚房傾:「你唔係可以決定請人咩,上次我舊同事做倉都係你點頭先請,而家唔得?你表弟真係好差呀?」

我:「唔係呀,佢見工表現好好,仲著晒西裝,差啲認唔到佢。」

阿爸:「聽你阿媽講,套西裝係你姨媽特登去買,唔知咩牌子,話成套要過萬,你係咪公司發生咗咩事,而家話唔到事請人?」

我:「由始至終都係我話事,頭先HR話請表弟,我唔請,我叫埋HR見工係因為可以賴HR,如果得我一個見,請唔請就全部關我事。」

阿爸:「咁你一早唔好介紹佢啦,搞咁多嘢麻煩自己。」

我:「一嘢拒絕邊好玩㗎,梗係畀個假希望佢啦,唔係姨媽點會買套過萬嘅西裝畀表弟呀?」

阿爸:「咁又係喎,不過你應該玩佢耐啲,要佢等消息,等多一兩個星期先同佢講唔請吖嘛,等消息最難捱。」

我:「你真係又毒又小器!」

冇錯,我係阿媽個仔,DNA係有心軟嘅遺傳,不過我同時都係阿爸個仔,DNA裡面都係有小器嘅元素。由我23歲踩我份工踩到33歲(因為好易計,我23歲畢業出嚟喺呢間公司做,今年啱啱好第10年),今年轉個tone就想我介紹表弟入去公司做?姨媽唔係睇唔起我份工,睇唔起我公司㗎咩?

再者,表弟係咩人我好清楚,聽講早排打機課金先洗咗姨丈張信用卡10幾萬,先唔計請個親戚去自己公司係捉蟲,唔通我請個人返嚟日日打機玩抖音玩小紅書呀?一陣你係我表弟,鬧你又返去告狀,做錯嘢唔炒你又畀其他下屬話我大細超,我仲使出嚟撈嘅?

我心軟咋,但我都好小器㗎!

error: