呢位讀者究竟見咩工呀？
—–
Headhunt介紹我去in一份工，上到去先見個HR，當時仲好正常，緊接就即刻見埋個Department Head，呢個男人就真係極品喇，佢笑住打招呼再同我握手就坐低，跟住講咗以下呢番說話：
「嗱，我最唔鍾意每日朝9晚6嘅人，冇拚搏精神，我個department係冇返工放工時間嘅，我自己瞓醒就返公司，一般8點幾9點收工，我希望同事都有呢一份幹勁，就算星期六日冇嘢做你都可以返嚟㗎，最緊要一齊見證公司成長，唔好有嗰種當自己係打工仔嘅心態，獅子山精神你有冇聽過？你覺得自己係咪我要搵嘅人？」
我：「獅子山隧道我就聽過，如果我瞓醒先返公司，應該會11點幾先返到。」
個男人即時收起笑容，話有消息再通知我。
離開咗呢間公司大約10分鐘，個headhunt就打過嚟講：「喂，頭先做咩呀？個客話你好冇禮貌。」
我一嘢就cut咗線，跟手block埋headhunt個電話同WhatsApp，鬧你都嫌口臭。
聽講年尾啲工特別西，我而家信喇。