Reference Check留自己另一個number

好驚險呀,我都係隔咗半年先敢投稿,費事咁張揚吖嘛!因為2022年5月嗰陣我去咗一間公司見工,填form嘅時候有一欄係要填上一份工如果做reference check可以搵邊位,咩名、咩電話號碼、咩職位,當時心諗死啦,我同之前間公司係吵大鑊走㗎!

想打電話問個舊同事肯唔肯幫我做reference check,但係當時趕唔切喇,正想填呢part嘅時候HR入咗房問我填完未?我話差呢一part搞掂,個HR望一望然後話:「哦,你填返前上司個contact得㗎喇!」

我都算機智㗎喇,答佢:「但我唔記得佢個直線幾多號number喎!」

HR:「手提電話都得,你有冇佢WhatsApp吖,睇下佢咩number囉,舊上司應該有WhatsApp啩!」

我:「即係私人電話呀?」

HR:「For reference㗎啫,冇咩事我哋唔會打去。」

因為我亂填其他人number,例如friend同埋舊同事,真係要考慮兩個因素,1)真係打去,人哋肯唔肯幫我扮前上司;2)條友肯扮,又夠唔夠醒目先?唔夠醒目騰騰震隨時累到我冇咗份工喎!

情急智生,我填咗一個number,呢個number係我另一張電話卡,幾廿蚊一個月嗰啲plan,我長期係有兩個電話號碼,相信好多人都會咁。

填完就正式interview,其實我表現普普通通啦,之後幾日收唔到call亦都唔意外,點知去到6月一個朝頭早,正當我打完通宵機仲未瞓醒嘅時候(係呀,我嗰陣仍然係失業),突然有個電話打嚟……

「唔該Stephen Wong吖!」

個電話已經陌生,個名仲陌生,正當我以為係sell嘢定唔知詐騙而想收線嘅時候,忽然諗起Stephen Wong呢個名好熟。

冇錯喇!Stephen Wong就係我當日填form喺reference check嗰欄虛構嘅前上司,我知道香港有千千萬萬個Stephen Wong,不過我前上司並唔係叫Stephen Wong!頂!個HR真係打嚟!

由於我懶床嘅聲音已經係一把牛聲,所以我keep住用一把牛聲繼續講落去,當然成個人已經坐咗起身:「我係~~邊位?」

「你好,唔好意思打搞你,我叫Phoebe,係XXX公司嘅HR,想搵你做個reference check,唔知阻唔阻你?」

我:「Ok!」我盡量答得簡短,唔希望露出破綻,亦好驚佢認得我把聲。

「唔該晒,你哋有位前員工周XX Patrick之前嚟我哋公司見工,想問返少少資料。」

我:「請講。」

「好,佢喺你哋公司嘅職位係咪Marketing Executive?」

我:「係。」

「由2019年做到今年4月係咪?」

我:「冇錯。」

「你對周XX Patrick嘅工作有冇咩評價?我哋公司想做個指標。」

我:「幾好,勤力,盡責。」

「咁佢同你相處,仲有同同事相處又O唔Ok?」

我:「Ok,冇問題。」

「佢走嘅時候人工係咪$23,000?」

我:「係。」頂你個肺問Q完未呀?個心跳出嚟喇!

點知真係未完:「如果佢再返去你公司做,你會唔會請返佢?或者歡唔歡迎佢返去?」

呢啲咩問題嚟㗎?

我:「歡迎,好歡迎。」

「好,唔該晒你呀!咁我唔阻你喇。」

我:「Bye Bye!」嘩!啲問題咁廢就咪鬼打嚟reference check啦!結果我成個人醒晒,當時失業日日瞓到中午,畀呢個電話嚇一嚇就再瞓唔返,嗰陣只係朝早10點,然後我喺10:30就收到電話喇,呢次係打去我正常用嗰個number。

因為對方用返頭先打去我另一個電話嘅number,加埋我已經提高警惕,所以就用咗一把朝氣勃勃嘅聲音去接聽。

我:「Hello!」

「你好Patrick,我係XXX公司嘅Phoebe,唔知你仲有冇印象你嚟見過工?」

我:「Phoebe?好似有少少印象。」

「唔知你搵到工未?我哋想出offer畀你。」

我:「哦,我未搵到工呀,出offer?多謝你畀機會!」

「咁你下星期一返工有冇問題?仲有冇地址?冇就而家記低。」

我:「好呀,麻煩你講多次地址吖!」

如是者,我真係有去返工,心肝仔都離一離,reference check留自己另一個number,自己做返reference check,咁都可以過關,好在佢冇要求前公司畀返封信再吸印之類咋!

我而家敢講出嚟,係因為我又轉咗工喇,新呢份工唔使reference check,希望呢份我可以做得長啦!

error: