日薪我聽過，不過通常係炒散、part-time、freelance，又或者係地盤工，而有啲所謂日薪，其實都係計算方法，未必真係即日出糧畀你，而我家陣做緊份工就係週薪，初初見工嘅時候都呆一呆，我見文職喎！
仲記得interview當日係直接請咗我，HR confirm offer之後問咗我一句：「呢度weekly wage喎，你有冇問題？」個腦load唔到佢問乜，淨係聽到一組英文，所以我好失禮咁問返佢：「即係咩呀？」
HR可能覺得我英文屎，佢轉咗用中文講一次：「呢度出週薪㗎，應該冇問題啦，唔係仲開心咩？」
其實呢……佢講中文嘅時候我都仲load咗兩秒，以為咩周身？周身病痛呀？始終我做文職真係冇諗過間公司會出週薪，我仲要係全職員工喎，唔係freelance唔係contract喎！
我：「週薪係咪即係一個星期出一次糧呀？」
HR：「係呀！」
梗係無所謂啦，你冇糧出就話啫，個個禮拜出糧有咩問題呀？
因為對我嚟講真係一個新體驗，返工第一日我就忍唔住問同事：「呢度真係一個星期出一次糧？」
同事：「係呀，每個星期五auto pay，放工之前通常都收到，你見工冇同你講咩？」
我：「有講，不過我唔係好相信，打份寫字樓工點樣一個星期出一次糧，我想像唔到，咁奇特嘅呢度？」
同事：「因為老細以前喺英國讀書英國做嘢，好似話嗰度興吖嘛，佢可能覺得呢個文化幾好，想帶嚟香港啩，話之佢啦，最緊要有糧出。」
咁又係，週薪好過欠薪（我自己作嘅)。
開頭真係好鬼爽㗎！買嘢唔使再等月尾，仲有啲friend好興月尾就神隱，個個都話冇錢食飯要等到月頭出糧，我就完全冇呢啲煩惱，雖然我份糧拆4份，每個星期嘅週薪都唔夠買一部iPhone，但係唔通你個個月買iPhone咩！
唔使等月頭，個個禮拜有錢返，有一段時間我完全唔記得咗個「窮」字點寫，新衫即買、新戲即睇、新game即課，呢頭用完又差唔多出糧喇，我班friend都話好羨慕，一個二個問我公司仲請唔請人。
不過呢種情況維持咗幾個月就發覺有問題，因為以週薪形式出糧原來好難有錢淨，啲錢散住咁返，儲錢好奇怪，用錢就好快，最慘係啲錢陰啲陰啲就冇晒，呢單嘢令我諗起以前曾經借5萬蚊畀個老友，佢唔係一次過還，係分期每個月還幾千，然後我收到就袋住，最終佢還晒，但我又好似冇收過，嗰5萬蚊無聲無息消失咗……
然後我仲出現埋欠交卡數嘅情況，嚴格嚟講係畀最低還款額，搞到筆數找嚟找去都找唔清咁。
我份糧2萬幾，每星期出6千幾，之前卡數就爭萬幾，咁我見到未過期，咪唔找住先囉，因為找6千幾又東一忽西一忽咁，自己都要留返啲嚟用㗎嘛，然後到下個星期又用晒6千幾，咁呢個星期再出6千幾，重複返上星期嘅心理循環同心理交戰。
去到第三個星期，唔知點解又得返幾千，仆街原來未畀家用，畀完又得返千幾，是但啦找咗最低還款先，如是者個個月都係咁，萬幾蚊卡數找極找唔完，我又講唔出啲錢用咗去邊，痴線！成個人好浮好虛咁🤦🏻♂️
有次我同HR講：「有冇可能公司幫我儲住啲錢，月尾月頭先至一次過當月薪出畀我呀？」
HR：「你唔好搞咁多嘢啦，set好晒auto pay，個個禮拜有糧出都唔滿意？」
我：「唔係唔滿意，不過好難儲錢，份糧出完唔知去晒邊呀！」
HR：「你冇自制能力就唔好怪人啦，每個禮拜出咗糧有人搵支槍指住你用㗎？你儲起佢唔得㗎？」
其實佢隻隻字我都識聽，道理我都明白，但係你每個星期出糧真係好難唔用㗎喎！