父母唔信WFH 焗租80呎無窗工廈避家人

我有時唔明,點解啲父母要迫得仔女咁辛苦呢?

我公司喺疫情期間多次畀同事work from home,然後家中兩老已經唔信,問我係咪畀老細炒咗?問我係咪失業唔敢講?我話咗好多次唔係,仲話出晒電郵叫同事在家工作,我老豆話:「唔識睇啲雞腸!叫你畀心機又唔聽,以前成日請假去旅行,而家好啦!市道唔好一定炒你呢啲懶人先。」

?????乜嘢呀?你唔信我係WFH都算,我以前去旅行係用自己大假,清唔晒假期仲會畀公司迫我放,點樣懶人呀?

最近公司再宣布WFH,原因係有同事住緊嗰棟大廈有人確診,老細為安全計,叫大家home office直至3月,反正新年前的確冇咁忙,本身都打算年廿八收爐,但我一啲喜悅都冇,因為我知留家工作係一個大難題,如果唔係老細落聖旨,我真係唔介意自己一個返office做嘢。

大半個月唔使返公司根本冇得避,直接同屋企講,父母又一如以往唔相信,日鬧夜鬧,日哦夜哦,有時要打畀客,已經閂埋房門,佢哋都照樣叩門,照樣係咁叫,電視開到大大聲,完全冇辦法做嘢,出去同佢哋嘈,老豆老母又話冇可能有老細會畀員工咁樣做嘢,我話:「你哋冇做過呢啲公司,冇遇過呢啲老細,唔代表呢個世界冇,唔係乜嘢都以你哋見過嘅嘢為標準!」

當然,佢哋都仲係覺得我掩飾自己畀人炒,掩飾自己冇工返,話鬧我只係為我好,覺得而家啲後生唔捱得,唔識得珍惜份工,放假即係對公司唔忠誠,冇盡力,因為佢哋以前嗰套就係咁,所以認為我哋呢代都要係咁,一份工就係要做一世,轉工就等於唔識得飲水思源,係反骨嘅行為。

每日被兩老質疑我失業,每日開到個電視大一大聲,你知唔知我慘到點?我去咗搵啲分租office,$2500,80呎,無窗,舊式工廈,有窗會貴啲,房內有廁所又貴成千蚊,所以我揀最平嘅無窗無廁房。唯一慶幸係有WIFI,唔使另外申請,呢度亦可以短租,但短極都要簽三個月,即係我硬掘要因為咁而付出7500,同埋呢間80呎office係唔提供傢私,我又唔想使咁多錢,所以求其買咗張褶枱同櫈仔返去,始終呢段時間都要喺度打躉,唔止每朝一早「返工」出門口,放工都要較埋時間夠鐘先走,我真係覺得自己好折墮。

希望其他人唔好有我呢啲遭遇,希望啲父母唔好再迫死仔女啦!未經歷過嘅嘢唔代表冇,時代唔同喇,唔好再成日講以前啦!

投稿讀者:培

error: