大家新年快唔快樂呀？出咗雙糧未？今年認真難忘，因為我連1月份嘅糧都未出，合約寫住有雙糧都冇用，最新消息係公司調撥唔切資金，要新年後先有糧出喎。
計埋而家份工，我已經連續兩份工都係中資，其實我都唔想，上一份正正因為欠薪先走，仲搞到好唔愉快，可惜轉工遇著疫情，市道真係唔好，見咗幾份都冇回音，個心開始慌，後來有agent介紹另一間中資公司畀我，人哋就係睇中我之前有中資經驗，生活迫人之下，我最後take咗個offer。
初期好正常，佢開畀我嘅人工都唔差，但係2020年9月開始，公司第一次拖糧，本身1號出，佢7號先出，聽高層講係上面嘅資金鏈斷裂 ，要撲水返嚟先出到糧，然後10月又係咁，11月都係，仲愈嚟愈遲，公司似乎已經冇晒辦法，MPF都冇供兩個月……
我發覺中資公司有種套路，就係咩都講到相當美好，咩都話好多機遇，但內部分黨分派，成個business都係倚靠上面嘅水喉揼水，冇事冇幹嗰陣當然天下太平啦，不過一有問題出現就非常突然，資金鏈話斷就斷，而且佢哋無視香港啲勞工例同法律，淨係跟自己啲土皇帝規則。
有時我會諗呢間公司係咪主要開嚟「洗錢」，不過有一點可以肯定，佢哋安排好多高層嘅皇親國戚落嚟香港做嘢，呢班人喺office冇實際嘢做，純粹借公司聘請為名，做夠幾年就申請長期居留。
班高層成日講到中國點樣強大，點樣有錢，但中國人唔係更清楚農曆新年嘅重要性咩？做中資，一係富貴一係閉翳，呢個係我近年嘅經驗。
以前做過一間香港公司都有雙糧，雖然當時人工唔高，但好記得老細同我哋班員工講：「知唔知雙糧嘅意義係乜？就係等大家早啲拎錢畀屋企人辦年貨，唔好要老人家憂柴憂米，等家人包利是可以開心啲。」
我冇將公司嘅事同家人講，老豆身體唔好，唔想佢擔心，疊埋心水過完年搵過份工，今次真係乞食都唔再做中資，見過鬼怕黑。
投稿讀者：家然