大家見到呢個post嘅時候，我已經喺東京喇，記唔記得我講過細佬會喺日本結婚呢？
之前寄月曆畀讀者嘅時候，細佬都有幫過我手，當時我哋已經捱咗一晚通頂，追星趕月，喺咁緊迫嘅情況之下，某日下午佢突然話要出一出去。
我：「咩事？」
細佬支吾以對，最後終於忍唔住講咗：「要過錢畀老豆。」
呢個老豆，令我哋兩兄弟由細到大都吃盡苦頭，佢喺我小學嗰陣已經同我阿媽離婚，而家返咗出生地印尼居住超過10年，每個月我哋都會寄錢畀佢，加埋同樣會畀錢香港嘅阿媽，我哋兩兄弟超過10年係比緊兩份家用，唔知有父母離異嘅家庭係咪都一樣，但係咁「特別嘅老豆」應該得我有，因為佢苛索金錢方面的確超乎想像。
講返今次先，我老豆月頭已經收咗家用，我哋每月會去香港一啲印尼商店匯錢畀佢，但係老豆一直以嚟都貪得無厭，耐唔耐就話要喺印尼搞生意然後問我哋兩兄弟拎一大筆，我試下回憶返佢話會搞咩生意先。
好耐之前，佢話要同印尼朋友搞咩燕窩山，仲私下問我一個姑姐借幾萬蚊，好多年後姑姐先話我知，手頭鬆動之後，我私下幫老豆還咗。
又有一次話搞農場，另外話要開發果園，好多大大細細嘅生意我都唔記得喇，呢幾單誇張得滯所以印象深刻，上個月就吹得勁啲，話幫印尼政府起路，想我哋支持佢，因為要買材料同埋請修路工人，除咗基本家用之外，每月要再額外畀多HKD 14000（係以後每月HKD 5000家用以外再畀HKD 14000，即係每月total HKD 19000，唔係拎一次)。
呢單嘢我直接反對咗，同老豆講我失緊業，已經冇特別話佢知我有個page，廣告下挫至新低點，因為講佢都唔會明，只係send咗幾幅相畀佢，講下香港而家水深火熱，大家生活都唔容易，何況細佬要結婚喇，我哋半世人都幫佢還債，不如留返啲好生活畀我哋啦，特別係細佬要娶老婆，要去日本開始新生活，衣食住行樣樣都係錢，每月畀5000蚊港紙佢喺印尼生活真係唔夠咩？
我老豆呢頭話明白，轉頭原來私底下搵我細佬，今次話想買部電單車，又要再拎錢，細佬本來唔敢同我講，只係想靜靜雞去印尼商店匯錢，但由於老豆幾乎每個鐘都msg佢催促，細佬頂唔順疲勞轟炸之下，唯有放低幫我包月曆嘅工作，仆出去印尼商店。
其實呢種精神折磨我好細個已經受緊，上一次同拍拖7年嘅女朋友分手，唔多唔少都係拜我老豆所賜，總之佢平時係唔會搵我哋兩兄弟，只係要錢嘅時候先識搵，淨係呢度都打咗千字文，其他過份嘢聽日再講，因為我細佬竟然喺註冊前病咗，要照顧下佢先，喺東京湊住一個病人真係有少少不知所措。
睇返呢幅相，都唔知我同細佬當年見到啲咩會咁驚恐，不過而家每次老豆問我哋拎錢做生意，我同細佬嘅表情應該都係差唔多。