同個女會員傾計，佢講起自己上次拍拖已經係3年前，分手原因係當時個男朋友會去前女友屋企拜年，風雨不改，如果同樣情況發生喺你身上，大家又接唔接受到呢？
女會員表示同嗰個男仔拍咗一年多啲，期間橫跨兩個農曆新年，第一年係事後先知，有唔開心但冇發脾氣，點知往後一年又係咁，所以佛都有火。
我：「有冇坦白向佢表示你唔鍾意先？」
女會員：「有呀，拍拖第二年，叫佢年初二去我屋企拜年，點知佢話要去前女友屋企，想初三先嚟我度，呢次真係忍唔住同佢鬧交，跟住冷戰咗一排，然後就分手喇。」
聽返呢位女會員講，佢呢個男朋友強調自己同ex嘅家人感情好好，話對方阿爸阿媽當佢係半邊仔。
我：「你覺得佢餘情未了？想追返前女友？」
女會員：「我唔知咁樣諗係咪小人之心，因為身邊冇朋友試過發生啲咁嘅事，根本冇得參考。」
我：「其實都唔使參考啦！」
女會員：「因為佢話自己孝順老人家，一早當咗前女友阿爸阿媽係一家人，就算唔係拜年，平時得閒都會打畀對方父母，問候人哋嘅身體狀況。」
會唔會係我閱讀理解有問題？「孝順」呢個字眼應該係對住父母先用，對住外父外母老爺奶奶都用得著，舉例朋友嘅屋企人好錫你，你會關心朋友Daddy Mommy好合理，但唔會用孝順呢個詞語形容你對朋友家人嘅關心，我唔敢講佢個ex係錯，不過點計都係over咗。
兩個人一齊，當然係為咗令對方開心，佢開心，你都會開心，呢樣嘢係好基本，所以唔需要參考咩例子，自己已經有女朋友啦，仲繼續當前女友阿爸阿媽係一家人？仲會上去拜年？唔好意思容許我俗啲講句：「喂，你搏咩呀？」
我：「多口問句，你ex個前女友拍拖未？會唔會係你個ex覺得仲有機會？」
女會員：「佢話唔清楚前女友感情生活，咁我都唔知係真定假，所以先會反覆諗自己係咪太小器。」
呢樣都唔係重點，假設個前女友未拍拖，咁我應該知道佢搏咩，又如果前女友已經拍緊拖，你仲上去拜年其實盞大家尷尬，前女友未必想，前女友新歡肯定唔想，何必呢？
唔知我係咪企咗喺女會員嘅立場諗，所以覺得佢個ex太over，不過真心想問句，如果每對情侶分手之後，啲ex都會照舊上去拜年，咁拍多幾次拖，啲老豆老母咪好唔得閒？
舊老細都話當我係一家人㗎，仲記得我投訴兩年冇加人工，遞辭職信又畀佢挽留嘅時候，舊老細直頭變咗我老豆，當時佢咁講：「阿仔，做人唔可以下下睇錢，公司係一個family，點解淨係講錢？你返去再諗清楚先決定係咪辭職啦！」
嘩，又family又叫我阿仔，唔通我轉咗工仲要上去探佢，再風雨不改去舊公司拜年呀？