「其實錢唔緊要㗎，求其出幾千蚊畀我都得㗎！因為我有幾個friend都係喺中環返工，我覺得好型，之後又可以約埋佢哋食lunch或者放工去飲嘢，我屋企都ok嘅，冇經濟壓力，不過老豆老母睇死我搵唔到工，想威返次畀佢兩個睇。」
我唔敢相信眼前呢位後生仔嘅說話，雖然公司只係請個Assistant，坦白講佢份糧都唔會過二萬，但係估唔到佢會主動講「求其出幾千蚊」，最重要係中環返工夠威夠型，同埋唔想衰畀父母睇。
呢個後生仔令我諗起11年前嘅自己，記得咁清楚係因為我同老婆結咗婚11年，我哋喺婚姻註冊處等緊註冊嘅時候，我收到當時公司個老細電話，佢一打嚟就一輪咀不斷講公事，不過嗰日辦喜事，加上老婆同班兄弟姊妹喺側邊，所以我都好好態度答返句：「老細，我今日結婚呀，而家要入去註冊。」
當時個老細係咁樣覆我：「係喎，你同我講過，唔記得恭喜你，恭喜晒，祝你白頭到老呀！」然後佢並冇收線，反而係繼續講公事。
因為我嗰陣真係要註冊喇，夾硬打斷佢話柄之後就將部手提電話交畀個兄弟袋住，其餘細節已經唔記得喇，淨係記得結完婚之後就搵工，好好彩喺兩個星期內搵到，順手就辭埋職。
當時我見嗰份新工係朝早見，晏晝就打嚟請，對方畀咗返工嘅時間日期我之後就問O唔OK？我答OK，然後對方接住話：「咁就好喇，我哋可唔可以傾一傾人工？」
我嗰陣答：「唔使喇，我淨係in咗你哋一間公司，你話幾多就幾多。」
型唔型？當年我並非唔在乎人工，亦唔係屋企大把錢，更加唔係想型，只係註冊當日嘅事踩到我條底線，所以淨係想辭職轉工，最好有咁快得咁快，而我其實去見嗰份工嘅時候都填咗expected salary，我相信對方如果請我，壓價都會有個譜。
最終嗰間公司都冇待薄我，人工係多咗10%，個HR打嚟只係循例問下O唔OK，仲有係咁易講清楚少少福利，例如年假之類，因為interview嘅時候冇好正式咁講過呢啲問題，而家諗返轉頭，好在佢哋冇趁火打劫壓價。
11年喇，期間又再轉咗兩份工，其中一份就係而家做緊呢間公司，每次轉工就係為咗升職加薪，你話錢唔重要？傻的嗎？返工唔係為錢唔通為理想，我嘅理想就係唔使返工都有錢，所以我好認真咁同眼前呢位後生仔講：「你interview唔應該咁㗎，我仲有幾個人要見，唔知最後係咪請你，但你去見其他工嘅時候千祈唔好咁樣同人講，你呢份工underpaid，跟住就會影響下一份工開幾錢畀你，呢個循環會一直延伸落去，可能要用好多年先tune返正。」
後生仔笑一笑表示明白，再強調自己真係好想返中環，好想威畀父母睇。
我唔知父母畀幾多壓力佢，所以不便評論，但係就工作地點而言，返中環有咩咁把閉，如果我而家搵到另一份工薪酬多20%至30%，工廠區我都冇問題，大把中環人西裝筆挺但係銀包冇錢甚至負資產又話你知咩！地區冇問題，人工最實際。
千祈唔好信嗰啲離地局長講嘢，咩返工唔係為咗搵錢，而係為咗精神面貌同健康都重要，甚麼人生價值同貢獻……呢啲局長自己逗緊幾錢糧？由佢哋把口講出嚟真係特別冇說服力。
我返一份underpaid嘅工，做到隻積咁都係餐搵餐食餐餐清，唔好講咩買樓，想多個錢淨都冇，何來精神面貌？上網開個online banking之後都冇晒精神啦，月月清你同我講人生價值，冇錢睇醫生你同我講健康，呀局長都幾幽默。
我仲同呢位後生仔講，如果有間公司因為嗰句「求其出幾千蚊畀我都得」就請佢，咁樣呢間公司都肯定有問題，每個人都應該有佢嘅Value，呢個Value其實係一份肯定同埋尊重。
最終我冇請呢位後生仔，因為我in咗一個更好嘅candidate，佢叫價over咗公司開嘅budget，但係我覺得佢值，希望呢位後生仔有聽我意見，interview唔好同人講幾千蚊都冇問題，你唔介意係一回事，不過唔代表人哋可以唔尊重你。（完）
關於壓價嘅題材，以下嘅故事都係幾年前喇，你哋仲有冇印象？
霸氣求職者反勸HR繼續努力：希望貴公司不要氣餒
https://hkofficedaily.com/?p=12223
部門主管懺悔壓價累員工一世
https://hkofficedaily.com/?p=18055
人工可唔可以平$500：差一千幾百都冇分別啦
https://hkofficedaily.com/?p=18058