Headhunt舊同事分享早排一單job嘅經驗，佢介紹咗個candidate去一間國企見工，呢間國企大就大喇，不過好刻薄，其實都唔意外嘅，正如好多時愈有錢嘅人就愈係孤寒同計較。
嗰位candidate阿Sue（化名）本身已經有offer喺手，既然新工未on board所以都唔想limit自己，見有headhunt介紹佢見工就即管見下。叫得國企，規模當然唔差，但係最後竟然開出一個侮辱價畀阿Sue。
舊同事問過點解？對方個HR係從上海調落嚟香港公司，所以全程都以普通話溝通，呢次就喺電話度回覆：「香港現在經濟不好，我覺得這個價錢已經給多了，她出去找工作也不容易吧！你幫我問問她。」哦，即係藉住市道唔好就大條道理壓價。
Headhunt舊同事向對方指出，阿Sue已經有一份工喺手，價錢遠勝國企開出嘅offer，不過都可以盡人事問問阿Sue意願。
結果一如所料，阿Sue睬佢都有味，點知國企HR竟然老羞成怒：「我們公司規模很大，可以學的東西很多，不能單看薪資，我等一下給你電郵，你幫我轉給她，我希望她解釋為甚麼不接受。」
舊同事感覺為難，唯有向對方解釋：「已經拒絕了，我覺得Sue不一定回覆，而且她已經解釋得很清楚。」
國企HR：「我不管，你告訴她，如果不給一個答案，我們公司以後就把她拉黑。」
Headhunt舊同事：「甚麼黑？」
國企HR：「就是blacklist，她沒有告訴我一個好的理由，我們公司以後就不會考慮她。」
壓人價在先，講明有offer好過你所以先拒絕，咁都仲要人覆email解釋？究竟有咩唔清楚呢？仲惡到話以後要blacklist人，真係惡過黑社會。
我個舊同事本身只係想當笑料咁同阿Sue分享，淨係睇住對方send個全中文嘅email過嚟已經搞笑，呢度始終係香港嚟㗎，可唔可以專業少少呀？點知阿Sue又真係陪佢癲，當我舊同事cc個email去lineup晒兩邊之後，阿Sue覆返以下嘅msg畀國企HR：
親愛的人事部經理
感謝貴公司對本人的肯定，可惜我已接受了另一間公司的邀請，對於貴公司提出的薪酬待遇遠遜預期，本人覺得驚訝，但並不意外，所以很遺憾告知你，貴公司未能通過本人的篩選，同時希望貴公司不要氣餒，請繼續努力！
祝 工作順利
Sue
我睇完舊同事send畀我嘅email截圖後笑咗，霸氣得嚟有禮，有禮得嚟寸嘴，跟住就諗到一個問題：「咁個客係咪爆炸？有冇拎你出氣？」
舊同事：「冇，個HR冇再搵我，其實無所謂啦，佢哋有鋪壓價癮，長遠都會做臭我個名，衰客走咗咪let it go囉！」