舊同事埋怨老婆不解溫柔，佢嗰位住喺同一個屋苑嘅細佬夜晚10點上佢屋企諗住玩BB，老婆喺房唔肯抱出廳不特止，仲發脾氣鬧佢。
呢位舊同事將件事擺上WhatsApp group訴苦，點知引嚟另一位媽媽級女同事連珠炮發：
「你有冇真真正正幫你老婆湊過一日BB？我諗你一定冇啦！」
男同事：「咁我要返工吖嘛。」
「你究竟知唔知點解BB夜晚10點仲咁精神？你又知唔知BB其實要瞓幾多先夠？你老婆要好畀心機氹佢瞓㗎！BB如果唔氹佢瞓覺，真係可以一直唔瞓，一直V娃鬼叫。」
男同事：「但我當時見阿B仲好興奮同開心喎！」
「你以為BB呢個反應係興奮同開心呀？其實BB係好攰，又瞓唔著咋。」
男同事：「都係想玩一陣啫！」
「啱啱出世嘅BB幾個鐘就要餵一次奶，唔係office hour朝九晚六收工，亦唔係好似你咁樣一日三餐搞掂，佢哋扭計肚餓要餵奶嘅時間係不分日夜，半夜三更都一樣嚟料，你老婆每次休息都要斬件兩三個鐘、三四個鐘咁樣，而且BB瞓覺時間係完全冇規律可言，做媽咪要好醒瞓，好多時搞掂晒啲手尾想小睡片刻，BB又醒過喇。」
男同事：「咁佢全日匿喺房，叫佢出下廳都唔係好過份啫！」
「你喺咪以為你老婆唔肯抱個B出廳，係喺房裡面嘆緊世界？其實佢要不斷抱，不斷氹，甚至餵奶。」
男同事：「我知……」
「你老婆可能連飲水同去廁所都要儲埋幾次先去，你明唔明佢都好攰㗎？好喇，夜晚10點叫做氹到個B靜落嚟，收拾心情準備瞓覺，你又話要同佢玩，玩到個B癲晒精神晒，成晚流流長係咪你哋幫手湊？你哋玩完拍下屁股走，梗係爽啦！」
眼見情況開始失控，我哋幾位舊同事諗住講其他嘢打圓場，點知嗰位男同事仲駁嘴：「咁BB得意吖嘛，都係想玩下啫，出發點冇錯㗎喎，佢使唔使發咁大脾氣呀？」
結果女同事再扯火：「玩下BB？夜晚10點，你哋返嚟見到唔喊唔嘈，笑笑口好可愛嘅BB，其實係你老婆全日喺度陪佢氹佢先會咁㗎！你返工嘅時候，知唔知你老婆可能崩潰咗好多次呀？不如你用啲時間氹下老婆仲好啦！」
最後冇人敢同呢位男同事出去食飯，個個都叫佢早啲返屋企氹老婆。玩BB係好開心，不過媽咪喺背後嘅辛苦就冇乜人見到，以後玩人個B都要醒少少，玩完拍下屁股走，人哋真係有排執手尾。