投稿讀者：Johhny
每年臨近中秋，公司都會準備定月餅，等我哋班行街Sales拎去送畀客人，今年撞正疫情就特別慘烈。
可能你會問，下下拎住幾盒月餅出去見客咁重，你有冇咁笨實呀？鬼唔知阿媽係女人咩！我哋老細話送月餅劵唔夠大體，唔夠氣勢，堅持要我哋班Sales換埋實物拎去client visit吖嘛，好多客仲要喺工廠區，有時拎住兩袋十盒八盒嘅月餅穿梭於灰塵、貨車、工廠大廈嘅舊式電梯，其實真係好攞命。
咁點解唔寄呢？講咗啦！老細話要氣勢！要誠意！寄呀？老細話：「啲客點記得你？一陣reception收咗擺埋一面你又唔知。」
唉！
內憂係有個死板老細，外患係有一啲厚顏無恥嘅客。
首先講下我公司送月餅嘅標準同流程先，每個Sales都可以分配到一定數量嘅月餅送畀自己班客，由20幾盒至50 幾盒不等，主要睇你職位高低，Sales Manager多啲客咪分配多啲，Junior Sales如果要得多，老細都唔信啦！然後就係sort返啲生意額出嚟，例如有啲客全年都冇落過單，咁梗係唔送啦！大客咪送多兩盒囉！如此類推。
其實有啲客我哋都會送劵而唔畀實物嘅，就係送冰皮月餅嘅客，上年有個sales返嚟同老細講：「個客話我拎冰皮上嚟係整蠱佢喎！佢公司雪櫃爆晒，冇得雪，問我哋係咪玩嘢。」自此之後，送冰皮嗰啲就係派月餅劵，老細如果一早醒少少，就唔使搞到我哋班Sales畀人串啦，不過大部分客都係送傳統月餅嘅。
今年之所以戰況慘烈，係因為部分公司仲係home office，所以全部要打電話去問清楚，否則有機會摸門釘。最好笑係有個兩年都冇落過單嘅客主動打嚟問：「喂，你哋今年有冇月餅送呀？」撳system望一望，你3年加埋只係落過合共700蚊嘅單，點送畀你呀？
我：「我哋冇呀，唔好意思。」
客：「冇？你公司咁cheap㗎咩？中秋唔送月餅㗎？好窮呀？」
冇聽錯吖嘛？我再撳一次keyboard，又再check一check record，佢上一張單係3年前，total 700幾，然後近兩年都冇落過單喇，嬲嬲地我同呢個客講：「其實係咁嘅，我哋公司都送唔到咁多，會參考返每個客嘅生意額去分配……」
未講完佢已經發癲：「真係抵我唔畀單你，畀晒你個行家，下年你都唔使旨意有單！你同你行家就咁高咁大㗎啫，佢有月餅送，你冇，咁你就唔怪得我有私心喇！」
CLS！！！
你又唔好以為細公司啲客先會咁喎，大公司都有唔少呢類人存在。我甚至試過拎住8盒月餅去client visit，咁當然約咗8個唔同嘅客，點知中途去到某一間公司嘅時候，我畀個客R月餅……
「畀多兩盒啦！我想一盒拎返屋企，一盒擺喺公司畀同事食，一盒送畀我阿媽。」你會唔會太老實呀？
我：「唔好意思呀，因為呢啲係要送畀其他客㗎，sorry sorry！」
「你畀多兩盒啦！係咪咁孤寒呀？你同其他個客講，今日上唔切去咪得囉！然後聽日先喺公司補拎返兩盒過去，變通下啦！」
有時我哋成班Sales都會交流送月餅嘅谷氣同埋騎呢嘢，有個前輩話：「初入行時，我都諗過嗰啲GM呀，Director呀，VP呀，人工已經咁高，點會貪你盒月餅吖，一盒月餅咪百零蚊，有啲200幾，酒店出品當你500幾好未？唔通送盒月餅就打得好個關係？就會畀張單你？後來我先知唔係價值嘅問題，係性格嘅問題，小便宜又好，大著數都好，有種人係照單全收，同佢職位或者收入無關，係貪心，怕蝕底。」
好慶幸有個別公司係清泉，雖然唔多，甚至係好少。真係有客人話唔可以收100蚊以上嘅禮物，收咗都一定會退，我覺得呢類客比較理智同是非分明，靠真材實料可以傾到生意返嚟，唔使下下靠送禮同埋人情，香港唔係應該咁咩？點解會變成做乜都要走後門？合作唔係講實力，係靠你送咗幾多份禮？
大家如果想投稿亦可以去以下條link，刊登咗會有稿費$500㗎！
http://hkofficedaily.com/mailbox/