話說我上個星期去A公司 second interview，嗰陣時已經收到另一間B公司嘅offer，但由於一個星期後先返工，咁見到有時間咪上多次A公司second in囉，一如所料，佢哋對我好有興趣，仲即刻出埋offer，可惜價錢方面低過B公司都幾多。
論地點、規模、福利，同埋其他配套，B公司本來就完勝，而家連basic salary都贏埋，我真係搵唔到一個理由要去A公司，呢次second in更證明自己嘅估計冇錯，turn down佢嘅offer都心安理得，起碼唔會後悔。
A公司個HR係即場講package，而我亦誠實地表示自己有另一個offer更好，冇諗過HR姐姐會鍥而不捨：「不如你再考慮下先吖。」
我：「唔好意思呀，我應該唔會考慮喇，因為人工真係差太遠，而且福利都係另一間公司好啲。」
HR：「其實我哋啲福利都唔差㗎喎！」
我：「Er……淨係計大假都少4日喎！」
HR：「呢幾年疫情，我都仲有好多假期淨，其實用唔晒㗎！」
我：「Er……用唔晒係一回事，大假少又係另一回事喎……」
HR：「你等一等，我試下問老闆，睇下人工方面可唔可以加多啲。」
我想同HR姐姐講唔使，當你真係加到同B公司一模一樣，貴公司嘅福利配套仍然比我另一個offer有好大距離，斷估老闆唔會為咗我修改policy啩。
不過HR姐姐冇等我發言，一支箭就衝咗出去搵老闆商量，我心諗呢鑊麻煩喇，一陣真係加到同B公司一樣人工咁點算呢？
大約過咗5分鐘都唔夠，HR姐姐又返入嚟，咁又即管聽下你哋幾有誠意啦，點知……
HR：「老闆話過咗3個月試用期會再加人工，到時可以再傾㗎！」
痴孖根！到時畀個特首你做好唔好？我有個又正又fit嘅offer，點解要自貶身價，然後3個月後仲要唔知你老闆會加幾多畀我呀？當然呢番說話我冇講出口，keep住禮貌地婉拒。
我：「真係唔好喇，我諗我走先。」
HR：「你唔考慮多陣先答我？」
HR姐姐，難道你好驚訝我turn down offer？但係我更驚訝你竟然會覺得驚訝喎！
我：「唔考慮喇，多謝你先。」正當我拎起背囊準備走人嘅時候，HR姐姐竟然喊，冇睇錯呀，佢真係喊，兩行眼淚流咗落嚟，咩事先？嚇親我喎！Turn down offer啫，唔係同你講分手吖！
HR：「或者你再諗一諗吖，我真係好想你做呀！」
而家講緊人工同福利，全部都係錢呀！呢啲嘢我絕對冇惻隱之心，出嚟搵食當然係「價啱畀你」啦！唔通同你講感情呀？我又唔係靚仔，仲要已婚，你又唔係靚女，睇你嘅款頭應該仔都生埋，所以連感情都可以免談，我極其量講多次：「唔好意思」就離開咗meeting room。
後悔我就冇㗎喇，但係有個女人喺我面前喊，唔多唔少都有啲不忍嘅，加上呢位HR好似想盡辦法希望我入嚟做，總算係識貨之人，可惜佢公司出唔起錢呢，大家有緣無份喇，我意思係做同事呢方面嘅緣份。
不過我有個朋友係做HR，佢就同我講唔使「自作多情」，對方流晒眼淚多次懇求我考慮，並非覺得請唔到我係一大損失，最大原因應該係呢個position請極都請唔到人，加上老闆畀壓力，又要捽數，正常嚟講HR姐姐應該係追KPI壓力太大喎！
朋友強調，唔止Sales先至有KPI，其實HR喺請人方面一樣有，部分公司甚至會set target，要求HR每個月要in一定數量嘅求職者，可能幫我爭取高啲人工嗰陣已經畀老闆鬧咗一鑊。
我呢位朋友仲話，turn down咗offer就算，每個人都有自己嘅工作目標要追趕，嗰位HR要追KPI唔關我事，即使我當時心軟答應做呢份工，HR姐姐之後亦唔見得會對我特別好，總之搵工呢樣嘢，求職者用前途同埋人工福利去衡量就得喇。
其實朋友講嘅嘢我都明，只係冇諗過原來做HR都要追數追target啫。