公司新嚟咗個男同事，如果佢唔係姓溫，講真我會以為佢係近排好紅嗰個魏浚笙Jeffrey，因為個樣起碼有9成似（你當我吹大咗都最少有8成），唔知佢係有心定無意啦，連髮型都吹到一模一樣，問過佢同Jeffrey有冇任何親戚關係，佢又話完全冇關係。
翻版Jeffrey好衰唔衰仲要坐我隔籬，搞到我拍埋喺佢側邊好似塊綠葉一樣，完全唔起眼，本身公司啲女已經好高竇㗎啦，翻版Jeffrey嚟咗之後更加當我透明，所以呢排嘅自信心簡直係跌到谷底。
公司啲女又未致於衝埋嚟溝翻版Jeffrey嘅，不過每個人路過都係望住佢，有時啲女同事好鍾意三五成群去廁所㗎嘛，然後就會望住翻版Jeffrey喺度竊竊私語，明顯係討論緊靚仔啦！
冇問題嘅，我又唔係想女同事望我或者溝我，只係想表達翻版Jeffrey嚟到之後吸引晒成個office嘅目光啫，真正令我覺得挫敗嘅反而係其他機會都被抽走，話說我哋公司係會同一啲藝人合作，有間唱片公司我跟咗好耐，點知臨上去client visit之前，阿頭叫我唔使去，因為佢想帶翻版Jeffrey上去。
我：「點解呀？呢單嘢我跟開㗎喎！」
阿頭：「你誤會喇，個project都係繼續由你跟，我冇抽走，不過老細話Leo（即係翻版Jeffrey）咁靚仔，跟埋上去唱片公司見人有著數，其實我都驚人哋撬咗佢去做歌星㗎，哈哈！」
我：「我知我唔夠靚仔，但係……」
阿頭：「唱片公司話而家疫情，唔想太多人上去，希望我最多帶一位同事visit，之後冇咗呢啲限制一定同埋你去，放心喎，畀Leo見識下啫，我會叫佢有咩重點就寫低㗎喇。」
另外，公司有個好on9嘅每月獎勵，Admin會用打卡嘅紀錄，計算出邊個同事平均最準時返工，加埋每個月留喺公司嘅時間最長，從而得出一個排名，頒發一個額外勤工獎，第一名有500蚊超市禮劵，第二名有300蚊禮劵，第三名有200蚊，老細會喺每月一次嘅早會上面頒發，而為咗慳時間，次次都只會叫第一名出嚟接禮劵㗎啫，第二同埋第三名坐返喺個位度就得。
小弟嗰個月正正係第一名，而阿頭竟然又同我講：「一陣早會畀Leo出去接吖。」
嗱！我唔係要威或者稀罕從老細手上接過禮劵，不過我係第一名，翻版Jeffrey係第二名喎，你連呢個內部頒發儀式都要我退位讓賢？雖然我一樣係收500蚊超市禮劵，翻版Jeffrey出去同老細握手都係收返300，但係使唔使咁現實呀？靚仔大晒咩！
我以為女人嘅世界先至係樣靚身材正行先，估唔到喺男人嘅世界都會有呢類型嘅比較同埋大細超情況出現，仲會影響埋工作上嘅機會，做咗廿幾年人先真正覺得個社會咁殘酷，果然係你的樣子如何，你的命運也必如何。
我早兩日同一個比較熟嘅男同事吐苦水，將以上嘅情況講晒出嚟，諗住求個安慰啦，點知……
我：「翻版Jeffrey未嚟之前呢，我都仲覺得有個別女同事會望下我，而家真係完全當我唔存在，好似透明人間一樣。」
「你應該多謝翻版Jeffrey先真，個別女同事以前會望下你，其實係有原因㗎，佢哋有同我提過……」
我：「提過？咩原因呀？」
「有個女同事同我講過，嗱，聽完就算喇，我唔開名。」
我：「快啲講啦！」
「佢話會望你，係因為未見過人咁樣衰……」
我：「食屎啦你，仲玩！」
「唔係玩呀，真係有人咁樣講過，佢係咁形容『嘩，呢條友咁樣衰都得嘅』，不過大家冇再望你，好明顯係因為翻版Jeffrey太搶鏡，所以畀人無視都係好㗎，你唔好唔開心啦！」
我：「請問係邊個女同事話我好樣衰？」
「話咗唔開名，唔講得。」
本身係求安慰，點知就畀人二度傷害，返到屋企望下老豆老母，其實都明白點解我會唔靚仔，我只係諗個天做咩要咁玩我，安排個翻版Jeffrey坐我隔籬，沒有比較沒有傷害，偏偏我就受到咁多傷害。