凍飲迫人轉熱飲 遇靚女暖男上身

今日見客經過上環,我以前喺度做過summer job,青蔥歲月總係令人懷緬,所以就順便行下,當年做嘢嘅飲品店已經執咗好耐,印象最深刻係一個叫阿旺嘅男同事,呢條友簡直係經典,只要見到嚟買嘢嘅顧客稍為靚女就會上晒身。

有次做緊嘢,忽然聽到出面有條女喺度嘈,佢話明明叫凍嘅珍珠奶茶,點解會變咗熱飲,當時我以為自己睇錯單沖錯嘢,再睇清楚多一次,冇吖,啱喎,係熱紅棗茶喎!唔通條女思覺失調?

負責收錢打單嘅阿旺對住個女顧客講:「女仔飲凍嘢冇益呀!」

哦,你哋識㗎?

女顧客:「我嗌珍珠奶茶呀,凍珍珠奶茶呀。」

阿旺:「乖啦!凍嘢對身體唔好呀,關心你咋!」

女顧客:「你都黐線,一係你退錢,一係你換返杯珍珠奶茶畀我。」

嘩!原來你哋唔識㗎!

當時我嗱嗱聲同個女顧客道歉,即刻沖返杯珍奶畀佢,有另一位同事靜靜雞同我講,原來阿旺唔係第一次,只要見到嚟買嘢飲嘅女仔係靚靚地,又係一個人,冇男仔或者朋友喺身邊,阿旺就會暖男上身,不斷撩對方傾計,又或者好似人哋明明叫凍飲,佢自己揸主意同人轉熱飲,已經唔係第一次。

我:「佢係咪睇得啲韓劇太多?」

同事:「點知佢,只要人哋有幾分姿色,身邊又冇人,佢對眼就會發晒光,上次有個女仔直情畀阿旺嚇親,連杯嘢都唔要就走咗。」

除咗扮暖男情聖之外,阿旺仲好鍾意懶鳩叻估啲客飲乜,有個喺附近做嘢嘅OL,嗌咗一兩次珍奶咋嘛,阿旺每次見到佢嚟幫襯,就滾水淥腳咁走去整杯珍奶出嚟,已經試過幾次個女仔接到杯嘢之後一頭霧水,細細聲講咗句:「今日想飲花茶呀…」,但OL又多一事不如少一事,最後都係好失望咁拎住杯珍奶走人。

對住單身靚女就暖男上身,對住唔靚嘅女士同埋其他男士嗰陣,阿旺嘅態度就會好傲慢同惡劣,有段時間舖頭做緊優惠,無論買邊款飲品都好,只要加 $1 就送多杯一模一樣,雖然好抵,但都唔係個個想要呢個offer。

我記得有位著住西裝嘅男士,拎住個公事包同埋一疊文件,行埋嚟買嘢飲嘅時候就放棄咗呢個優惠。

阿旺:「加 $1 就送多杯喎,咁你都唔要?」

西裝男:「我飲唔晒,又冇手拎,一陣仲要上人公司開會。」

不得不提西裝男係非常有禮貌,其實take唔take呢個offer係顧客嘅權利,理論上唔使同你解釋添!

阿旺忽然擰轉頭向我哋講:「一蚊都唔捨得加,冇錢定係傻仔呀?」

佢嘅聲浪連我哋沖緊嘢都聽到,試問喺正收銀機前面嘅客又點會聽唔到吖,人哋根本唔係要慳嗰 $1 ,純粹係飲唔晒無謂浪費啫,點解要當眾羞辱人唔捨得加錢同埋傻仔呀?先唔講咩待客之道,作為一個人嘅基本禮貌你都冇喎!

跟住西裝男就著咗火,同阿旺喺度鬥鬧,事隔多年已經唔記得兩個人鬧乜喇,只係記得阿旺仲係好臭寸,類似講咗句:「咁係吖嘛, $1 都唔加。」

最後點收科?老闆咁啱返嚟,其實佢每日呢個鐘數都會落一落嚟舖頭,見到職員同客對罵,梗係即刻衝埋去排解糾紛,仲要唔收個客錢,不過西裝男冇接受呢個恩惠,轉身就走咗,其實個客真係算斯文,換轉係我一定打柒阿旺。

我嗰陣係暑期工,唔敢講啲乜,不過另一位同事就向老闆反映阿旺平時啲古怪嘢同埋態度,勢估唔到……

老闆:「忍耐下啦,我細佬係咁㗎,其實佢份人冇乜嘢。」

當時我同同事都呆咗,我係summer job就話啫,原來另一位同事都係嗰個moment先知阿旺係老闆親細佬,咁件事就合理好多喇,終於明白點解咁樣嘅職員都留得低,明晒!

後來我quit咗呢份工冇幾耐,已經得悉間飲品舖執咗,其實佢哋開咗前後都唔夠一年,究竟係賠錢同業主解約定係和平分手就唔知喇,但由於我有同其中一位同事keep contact,所以得知我哋間飲品舖喺網上劣評如潮,主要係講員工態度好差,同一條街幾間同類型舖頭都做得住,係我哋做唔住,所以有時一間公司用錯人,影響真係會好大㗎!

error: