殘酷唔緊要 最重要係認清事實

隔離team有個男仔叫Simon,長期都話要辭職,仲自負咁講過好多次:「冇咗我,睇下佢哋會點?嗰幾個客淨係我跟得掂。」

不過咁,今年年中Simon真係辭職走咗,講足兩年終於夢想成真,有更好發展點都係開心事嚟嘅,Simon臨走仲同我私下講咗句:「Replace我個新人一定做唔長,到時睇下點算。」

呢半年入面,replace佢嘅新人做得好開心,佢team人仲多咗工餘活動例如食飯唱K,最近Simon send msg畀我:「新年快樂!今年做多啲生意呀!係呢,我舊老頂嗰邊條數係咪好差呀?嗰幾個大客肯定甩晒啦!」

我:「喂,新年快樂!嗰幾個大客仲喺度,雖然都係咁煩,但畀多咗job我哋公司,你舊老頂話做唔切,射咗兩個position過嚟,而家都忙緊幫佢搵人。」

「哦,咁幾好吖,代問候我舊老頂啦!」

話口未完就喺pantry撞到Simon個舊老頂,順便幫佢轉達:「頭先whatsapp,Simon叫我同你講新年快樂呀!」

「邊個Simon?邊個客?」

我:「唔係客呀,你以前個下屬Simon呀!」

「哦……以為你講邊個Simon,好呀好呀,都幫我同佢講聲新年快樂啦!」

好多人以為自己係主角,包括我自己,但對於別人嚟講可能只係客串,連最深情嘅對白,都隨時被刪剪到不留痕跡。

工作係咁,愛情亦一樣,不過殘酷唔緊要,最重要係自己認清事實。

error: