今日落街睇醫生嗰陣撞到個兒時好友，喺荃灣大會堂對出條天橋上面，我哋停低咗寒暄幾句，兩個阿叔喺度想當年。
天橋望過去就係萬景峰，其實呢度以前係好矮嘅舊唐樓，連接大會堂條天橋就係用鐵板搭起，我哋班細路好鍾意大大力行上行落，嘭嘭聲好過癮，小朋友吖嘛，係咁無聊㗎啦！
後來睇住鐵皮屋清拆，仲記得佢媽咪話係起樓，我哋兩個小學生隨便亂講：「第日一齊住呢度。」
佢媽咪話：「買樓要好多錢㗎 ！勤力啲讀書，第日賺多啲錢先得喎。」
然後我呢個朋友就答佢媽咪：「我第日要搵好多好多錢。」
我記得自己當時都答咗一句差唔多嘅嘢，不過已經冇印象，唔緊要啦，反正都係做唔到。
回到現實，我朋友問：「你而家做緊咩呀？都係住附近？」
我：「做緊濕9獵頭，幫人搵工嗰啲，自己搬咗出嚟，好近我阿媽屋企，你呢？」
「我做解款員，搬咗入沙田喇，住老婆屋企人嗰間公屋，頭先同我阿媽飲完茶之嘛，咁有冇工介紹呀？而家呢份麻麻哋，錢又少，唉，我都係冇鬼用。」
我：「點會冇用？我咪又係打份牛工，唔好得你幾多，不過解款員唔會用獵頭公司請人啦！」
交換咗電話，我要趕住去睇醫生，臨尾佢講咗句：「記唔記得我哋以前話要買呢度住？」
我：「我頭先都有諗起，估唔到你仲記得。」
「記得，咁白痴嘅嘢都講得出，點會唔記得，以前我哋兩個成日都話要賺好多好多錢。」
大家笑咗一聲，然後就分道揚鑣，雖然我哋嘅工作同生活圈子已經唔同咗，但仲有一個共通點，就係細個嗰陣好想發達，大個之後就只想脫貧。