舊同事食飯，講返以前嘅點點滴滴，update下近況，當中有人好似我咁，工都轉咗幾份，有個就做咗6年都未走：「嗱嗱嗱！王生一日未走，我一日都未算係資深，咪諗住笑我呀！」
王生係我以前公司入面一個阿叔，做咗20年，Ten year challenge？佢喺度經歷咗兩轉啦！世界盃4年一次，前後都踢咗5屆。不過王生從來冇升過，因為做嘢勁頹，同佢交接任何工作都好，對白不外乎呢兩句：「擺低啦！」、「我唔知，唔好問我。」
舊公司唔會炒人，一係你自己辭職，否則冇大錯就由得你繼續做。
我：「王生仲係咪咁頹？」
舊同事：「而家更頹更廢，乜都唔知，人工照支，老細又好似盲Q咗由得佢留低，基本上有冇佢都唔會影響公司運作。」
其實做得耐冇問題，只係王生嘅態度都幾影響同事，特別係新入職又要同佢喺工作上接觸嗰啲，新人唔知頭唔知路會以為份工好惡做，又唔知得罪佢啲咩要睇面色。
每一次諗起王生，我就會諗起呢句：有啲人其實二三十歲已經死咗，只係等到七八十歲先至落葬。