公司有個Facebook專頁，而家好多公司都有，當然我哋嗰個就冇乜人睇，可能得自己友同埋少少客會follow，負責處理出post嘅Admin亦即係公司嘅Marketing，佢One-man band㗎啫，但係老細又要佢每星期出3個post加一條片，當中來來回回好多人畀意見改嚟改去，所以都惡做㗎！
份工惡做係咪就會有人體諒呢？當然唔會啦！否則就唔會出個幾廿字嘅post都改十萬次，不過呢樣事小，之前公司拖糧，連續幾個月都搞到10號之後先出糧，其實已經犯咗法，有同事仲去埋勞工處，原來公司連MPF都冇供幾個月，有啲嘢同埋程序而家仲搞緊。
雖然老細最終有出糧嘅，但就遲囉，仲要係出咗畀啲Senior先，如果你係小角色可能會再拖耐啲，所以包括我在內嘅幾個同事已經先後離職，呢啲咁嘅公司過到初一過唔到十五，再做落去都係爛尾，慢慢搵好過最後做義工，而且條氣唔順吖嘛！
某日公司個Facebook專頁突然被騎劫，post咗老細欠薪唔出糧嘅衰嘢出嚟，嗰日公司仲要係唔知幾多周年，本身諗住出埋啲咩Happy Birthday post，結果喜事變醜事，當時已經知道係剛離職嘅Marketing個同事做，原來佢喺Facebook page裡面踢走晒其他Admin同Editor，得佢一個可以操控公司個專頁。（**文章尾會有註解）
公司個專頁每日出幾個post揭露欠薪，由於嗰位Marketing同事已離職兼踢走晒Admin，嗰排仲要work from home，老細同班高層都束手無策，向Facebook投訴又唔係即時有反應，所以連續幾日只能夠睇住個page爆大鑊。
唔止同事之間議論紛紛，連啲客都打嚟問咩事，真係大大粒花生，當然係出於八卦多過關心啦！後來公司個page褶埋，Marketing同事嘅欠薪雖然係追到，不過就有其他手尾跟，因為老細好似要告佢「不誠實使用電腦」，由於我離咗職，所以唔知道事情而家去到邊個stage，只係聽返其他同事講，老細喺office發表咗一番泯滅人性嘅說話。
同事話，老細覺得欠薪只要出返糧就冇事，因為呢啲case好多時都無需搞到坐監，但係有人不誠實使用電腦就可以告得，到時就係另一場官司，仲話嗰位Marketing同事好蠢，之後隨時要嘔凸。
真係冇返咁上下人渣，都好難講得出口，不過我係心痛呢位Marketing同事，由於佢踢走晒其他人然後喺Facebook出post追討欠薪，有機會明明係自己啱都變咗錯，仲隨時要惹官非，如果真係因為咁而衰咗就好唔抵，我呢兩日都會嘗試搵嗰位Marketing同事睇下有咩需要幫忙，同時要冷靜處理，費事畀個人渣老細捉到痛腳。
*註解：關於Facebook角色及權限：因為唔係個個都有Facebook專頁，所以呢度解釋下每個role嘅分別。
Admin：具備完整控制權限，加人、踢人、出post、改嘢，甚至你要將成個page一嘢剷除都得。
Editor：基本上都係全功能，但就唔可以好似Admin咁決定加人同減人。
Moderator：唔可以出post，唔可以delete post，但係有權去ban人同埋ban留言。
Advertiser：廣告同埋洞察報告嘅權限。
Analyst：洞察報告嘅權限。
如果你將來或者而家有Facebook page，記得要小心處理每個權限嘅setting，同埋可以睇返Activity log，邊個Admin，邊個Editor做過乜嘢動作都可以睇得返，相信呢樣亦係投稿人擔心嗰位Marketing同事嘅原因之一。