公司有個同事做咗風頭躉，唔係因為做嘢好叻，亦唔係因為有型靚仔，最大原因係佢話自己有朋友喺雜誌社工作，經常會接觸到明星，所以拎artist簽名輕而易舉，就算係MIRROR十二子嘅簽名都可以手到拿來。
Henry知道老細個囡鍾意AK，有一日拎咗張AK嘅親筆簽名相返嚟，老細開心到萬歲請食tea，我入咗嚟呢間公司3年，第一次畀老細請食下午茶，可想而知呢個場面係幾咁罕見。聽返老細講，個囡大咗之後已經唔係好黐老竇，呢張相直頭幫佢挽回親情，所以開口埋口都讚Henry識做。
呢單嘢揚咗之後，office裡面嘅MIRROR迷紛紛現身，個個走嚟叫Henry幫手拎簽名。
「可唔可以畀呢張相姜濤簽呀？」
「如果要Edan同Stanley兩個簽名會唔會好貪心呀？」
「呢張相我之前同Tiger影㗎！估唔到之後有機會叫返佢簽名，如果簽唔到都唔緊要，張相唔好唔見就得㗎喇，你問下佢記唔記得我吖！」
「我啲friend全部都鍾意Anson Lo㗎，呢度5張，簽得晒就簽吖，唔該晒你！」
「你叫Ian寫To Mary吖，我5月生日呀，可唔可以叫佢提早寫Happy Birthday？」
Henry喺office直頭紅過MIRROR啦！唔止女同事同埋老細當佢神咁拜，有啲男同事為咗拎MIRROR簽名返去氹老婆，甚至會請食lunch利誘Henry幫忙，佢亦從來唔會托手踭，有次我見茶水阿姐拎咗杯蔘茶畀Henry……
我：「蛾姐，MIRROR你又啱呀？」
蛾姐：「唔係呀，Henry好乖仔，幫我拎咗張陶大宇簽名相。」
蛾姐鍾意陶大宇唔意外，最意外係陶大宇簽名你都攞到？
Henry話陶大宇之前唱《倒轉地球》好紅，朋友本雜誌搵佢做咗個訪問，所以攞簽名相冇問題。
早排Henry轉工唔做，成班同事哭崩長城咁款，個個輪住請Henry食飯，粗略估計，佢有兩個星期都唔使自己出錢食飯，last day老細又萬歲多一次，真係破天荒，啲Sales跑到數返嚟都冇Henry呢種英雄式嘅待遇，直至上星期……
老細：「阿囡嬲咗我，佢話AK個簽名係假。」
我哋拎住AK張簽名相上網google，雖然大家唔係咩筆跡專家，不過都發現有啲唔對路，唔知老細同佢個囡嘅感情會唔會破裂到不能修補呢？
聽講有同事搵過Henry，想再三確定啲簽名係咪真，可惜佢冇聽電話，亦冇覆WhatsApp，不過咁，而家都係老細個囡話AK簽名係假啫，引發到個個同事上網對照覺得有問題，其實冇真憑實據係假嘅，或者只係心理作用，你睇蛾姐幾開心，日日袋住大宇哥張簽名相喺銀包。
老細：「蛾姐，你畀我睇下張陶大宇簽名相。」
蛾姐：「唔好整『巢』張相喎！」
老細：「得啦，睇完畀返你，上網對下啫，咦喂，唔使對喇，三點水嘅。」
蛾姐：「咩三點水？」
老細：「陶大宇個『淘』字三點水呀！」
蛾姐：「即係點呀？」
即係假囉蛾姐😂