遇到一件好谷氣嘅事，投訴無門，又不吐不快。早排見咗份工，HR收到我CV之後打嚟問咗幾句，然後就schedule一個視像interview，佢話如果department head覺得合適，會再約上佢公司面對面in多次。
視像interview冇咩特別，HR、department head，再加埋我，total 3個人參與，由於我都係轉返同一行(F&B），所以個department head都問得幾deep，但係對我嚟講係ok嘅，除咗一般嘅問答交流之外，佢亦花好多時間去問我而家公司嘅狀況，仲有同上司，同事之間嘅關係點樣。
視像完超過三個禮拜都冇消息，咁我都死咗條心，不過有一個好奇怪嘅情況出現，就係本身份工個上司對我愈嚟愈差，冇嘢搵嘢嚟鬧，抽走我手上一啲重要嘅工作，好似突然想將我投閒置散，最過份係開會唔預我。
上司對我嘅態度180度轉變係好明顯，明顯到幾乎所有同事都feel到，仲問返我轉頭，佢哋以為我同上司嘈過，又或者發生過頂撞。
我係一個好直接嘅人，如果有嘢唔滿意或者做得唔好，你可以兜口兜面講，一係畀機會我改，一係畀機會我解釋，大家都係男人又幾廿歲人，唔好玩埋啲冷暴力同排斥行為咁低B啦，有咩咪清清楚楚囉！結果我就搵上司問個明白，而家咩事先？
上司只係冷冷地講咗句：「你去咗XXX見工吖嘛，我知啦，點呀？打算幾時resign呀？」
我當堂呆咗，你點諗到去見工會畀現任上司知道，我視像interview係請咗假喺屋企做，又冇向同事透露半句。
上司：「你知唔知我同XXX個Hubert好熟㗎？我同佢以前同一間公司，係師兄弟。」
我：「我唔知你哋好熟，但就算見工你都唔使針對我吖，抑或你介意我去其他同行度見工？但係我哋呢行係咁，唔通我唔做F&B轉行？你同Hubert以前同一間公司，即係你都轉過工啦，你唔係應該明白我咩？」
同上司嘅關係已經修補唔到，雖然我有我嘅道理，但亦明白佢點解態度上咁大轉變，下屬去competitor度見工，佢個心有條刺好正常，所以我最嬲反而係對家公司個Hubert，你而家算係reference check呀？未得我同意㗎喎！我知道去見工填form有一part要簽名同意reference check先可以咁做，個Hubert咁搞有冇違法先？
當時我真係好嬲，直接打去佢哋公司搵Hubert，佢竟然仲理直氣壯。
Hubert：「我唔同意係私下做reference check喎，我識你上司，大家係朋友，我用朋友身份問佢關於你嘅工作表現。」
我：「你未得我同意咁做。」
Hubert：「乜同朋友傾計要人同意㗎咩？你同朋友傾計會唔會徵求我同意？」
我：「而家唔係傾閒計，我未辭職㗎！你同我現任上司講我嚟見工，但又冇畀offer，咁同推我去死有咩分別呀？」
Hubert：「我問得你上司，即係我原本有考慮請，但聽完你上司講又覺得唔適合，至於你上司點睇呢件事我管唔到，總之我冇做任何formal嘅reference check，就係咁。」
呢番說話真係非常無賴，如果個個求職者未辭職，你就打去畀人哋嘅現役上司，無論formal又好，私下形式又好，咁同直接打爛求職者個飯碗有咩分別呀？咁做好自私！
之後嘅日子，上司對我嘅態度都係冇好過，可能大家會覺得唔使理，不過身處其中，呢種冷暴力真係好難頂，淨係開會唔叫你，搞到同組其他同事眼望望呢下已經相當難受，結果我做多一個月就resign，頂唔順，同埋個上司咁做都係想迫我走啫，留低都無癮啦！結果我去見新工唔成，連原本份工都冇埋。
雖然resign後一個月已經搵到另一份新工，但深深感受到作為一個求職者嘅無奈，其實人哋未正式離職，新公司係唔應該走去reference check，咁樣會累死人㗎，我就話好彩相隔一個月搵到新工啫，如果搵唔到呢？點解要私下check人？大家無仇無怨點解要斷人衣食呀？
投稿讀者：Jeffrey
《當員工9up個理由辭職 即係佢對公司已經死心》
https://hkofficedaily.com/?p=18514