食完飯唔畀錢嘅賴皮同事，應該唔止我一個遇過，記得《辦公室日報》都有類似嘅故事同投稿，不過用coupon抵銷飯錢嘅人你又見過未？我公司就有一個。
阿Ken好鍾意痴住我哋食飯，由於佢有側側膊唔畀錢，同埋幾廿蚊飯錢全部畀碎銀嘅前科，所以呢條友一早已經犯眾憎，簡單啲講，同事遇到阿Ken吹雞食飯都會避得就避，你明唔明要追人錢已經好尷尬，同事之間要為幾廿蚊追嚟追去就更加冇癮，有時仲唔止追一次，作為債主都幾難為情。
早兩日我哋幾個同事去飲茶，分兩張枱，阿Ken又跟埋去，見到佢喺度大家已經醒水，平時一個出晒先，返到office再夾返，嗰次喺酒樓就要即場夾錢，真係肉L酸，點知阿Ken都係話冇cash，當時有同事忍唔住串佢。
「一係PayMe囉！」
Ken：「我冇PayMe㗎！」
「定係你用開支付寶微信嗰啲呀？」
Ken：「都冇呀！」
「簡單啲，八達通有喇啩，呢度可以用八達通，你畀晒先，我哋畀返cash你。」
Ken：「八達通負數呀，又冇自動增值，你哋幫我畀住先，一陣撳返cash。」
咁點呀？你要賴皮，我哋做唔出呀！唔通成班同事坐喺酒樓賴死唔走呀？部長個樣已經唔耐煩，就嚟好似《喜劇之王》個外賣仔咁講：「煩唔煩啲呀！不如我幫你哋畀吖！」
結果有個會計女同事幫阿Ken出咗先，唉！最奇怪係阿Ken沿途行返公司係完全冇去撳錢，咁你本身冇cash，點解返到office又會有呢？難道擺咗現金喺櫃桶？
都估到唔會咁順攤㗎喇，會計女同事又係要三催四請先叫到阿Ken畀錢，咁都未算，阿Ken好意思拎住一疊海港城優惠劵過嚟，你冇睇錯呀，係尖沙咀Harbour City嘅Coupon呀！（聶瞳編按：呢個唔係廣告）
海港城啲優惠劵面值有$100同$200，阿Ken拎住成疉，話畀一張$100同一張$200個女同事，仲話：「有你著數啦！」
會計女同事一句ban埋嚟：「我分唔到你係賴皮定搞gag，唔好搞咁多嘢啦，幾廿蚊要我打3次內線畀你！」
阿Ken又真係答：「唔係講笑㗎，你去買嘢同食嘢有折。」
會計女同事：「反正我計糧嘅，得啦咁！我叫老細用優惠劵出糧畀你！」呢句有啲火，唔係平舖直述咁講，阿Ken終於喺銀包拎咗幾廿蚊出嚟還錢，又話冇cash？
其實有同事曾經講過，阿Ken成日借頭借路拖飯錢，會唔會係因為經濟有困難，真係冇錢食飯好可憐，但嗰位會計女同事就話咁樣諗太過左膠，每個人都有難處，大家平輩份糧唔會差好遠，我哋又唔係搵十萬八千七，佢仲用自己做例子，供緊層樓，有一個仔一個女，唔通又冇難處咩？冇錢可以食麵包、帶飯、食平啲，每個人都要為自己嘅生活負責，唔應該你有難處就搵其他同事幫你承擔。
會計女同事仲話，如果真係冇錢，直接講就得，月尾出糧先畀都無所謂，但用海港城優惠劵抵銷飯錢就非常無賴：「佢銀包有cash，只係你唔反面佢唔拎出嚟，搏你唔記得之後冇收，何況海港城啲coupon都要買一定銀碼嘅嘢先會送，阿Ken有能力出去買嘢但唔畀飯錢，點講都唔通，最重要係啲coupon唔係拎去海港城就用得，例如嗰張$100 coupon，你要喺海港城嘅指定商戶使$1000先可以扣$100，我點解要去買$900嘢先拎得返阿Ken欠我嘅飯錢呀？」
其實之前同事追阿Ken飯錢都好客氣，因為大家唔想搞到咁尷尬，不過會計同事就覺得唔使畀面：「點解債主要覺得面懵？你哋太過顧及人哋感受喇，覺得面懵嘅應該係阿Ken，唔係我哋。」
投稿讀者：Navy
我唔記得《辦公室日報》講過飯錢嘅故事，反而記得《情侶座》有單Speed Dating追飯錢追足半年。
《可唔可以叫個男仔畀返飯錢？》
https://hkofficedaily.com/?p=12151