電話響起～
我：「你好，乜乜診所」
對方係一位女士：「診所？邊間呀？」
我：「乜乜診所」
佢：「喺邊㗎？」
我：「喺呢個XXXXXXX」
佢：「即係就喺樓下啦」
咩呀…你打嚟唔係應該知㗎咩～
我：「如果你要嚟睇醫生嘅，可以八點前嚟到登記」
佢：「你幾歲呀？」
我：「我？」
佢：「係呀，幾歲呀你」
我：「請問有咩事呢小姐？我幾歲同你睇醫生有咩關係呀？」
佢：「你打嚟做咩呀咁？」
咩呀？明明係你打嚟喎…
我：「小姐，係你打嚟診所㗎喎」
佢：「你頭先係咪打過9XXXXXXX呀？」
我喺電腦輸入佢講嘅電話號碼，係喎，又真係有打喎，不過對方應該係一位先生嚟㗎喎。
我：「哦～係呀，今朝有打過去，不過乜先生電話冇人聽，我哋會遲啲再打返俾佢㗎啦」
佢：「你打俾佢做咩呀？」
唔好煩啦，對第三者嘅我唔講得呀。
我：「不如你叫佢聽電話呀？或者佢方便時可以打返嚟俾我哋，我哋可以同佢親自講返」
佢：「我宣示晒主權你仲死不悔改？你叫咩名呀？」
請問乜先生很正的嗎？印象中唔覺診所有好正嘅病人嘅？
我：「小姐你唔好誤會，我哋打俾乜先生純粹係工作上嘅需要」
佢：「你叫咩名呀？」
我：「小姐你真係唔好誤會啦，你幫我通知乜先生隨時打返嚟診所又或者直接嚟診所啦，唔該你呀」
佢：「你而家呢個表現係咪代表你識驚啦？」
唔驚就有鬼啦，打個電話嗌人睇報告都可以變成咁，傻嘅咩？
我：「係嘅係嘅，小姐你有需要都可以同埋乜先生一齊嚟診所嘅，今晚八點前嚟登記就可以㗎啦」
嘟。佢CUT咗我線。
喂～乜先生係咪俾人五花大綁咗呀？做咩仲唔返嚟拎報告呀？
👉🏻即睇其他診所低能奇觀嘅文章
👉🏻《診所低能奇觀》「早排拎咗啲藥發覺唔係咁啱食喎」
https://hkofficedaily.com/?p=18169
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。