我記得曾經有個女會員上嚟join speed dating，佢離過婚，講擇偶條件嘅時候，呢位女士只係得一個要求，就係個男人要獨立，唔係乜都聽阿媽講嘅裙腳仔，唔需要有車有樓，打份萬零蚊嘅工都可以。
佢同我交談時講返之前一段婚姻，因為奶奶好苛刻專制，有次一齊出門口去買嘢，等電梯時隔離屋有一家人出嚟，對方個老公講聲早晨，佢答返早晨，奶奶已經全日黑面，話佢做女人做到好唔檢點。
我：「唔檢點？」
「係，我著圓領運動衫，長運動褲，唇膏都冇搽就同佢落百佳買嘢，禮貌地回應一句早晨，我奶奶話我唔檢點。」
而每次同朋友出街，奶奶都會走去同佢前夫打小報告，思疑呢個新抱同其他男人鬼混，做啲唔三唔四嘅嘢。
我：「咁你前夫真係信？」
「因為我哋一齊住，每次我同朋友出街佢都黑口黑面，永遠覺得我係出去勾佬。原來每次我出去，佢都會向我前夫告狀，只係我唔知，直至有一次奶奶作到好大，話我隨便同男人上床，我前夫忍唔住打嚟發脾氣，最後我影咗張同女仔朋友high tea嘅相畀佢，真係好委屈。」
同樣嘅事幾乎每日發生，總之喺佢奶奶嘅角度，做人老婆最好咪出街，24小時留喺屋企，如果要出去買餸最好包到冚，好似阿拉伯女人咁樣，佢同前夫已經因為呢個問題嘈過好多次。
有一次佢要出夜街，因為奶奶出咗去打麻雀，佢冇辦法同奶奶正面講聲，最後佢奶奶知道之後又走去個仔度打小報告，用詞低俗，惡意中傷，食食下飯8點幾佢前夫打嚟手提講咗幾句：「阿媽話你趁佢唔喺度出去同男人開房，點㗎你！」
呢一次佢冇解釋，直接要求離婚，前夫完全唔思考盲目相信，佢認定咁廢嘅男人唔要都罷，至於奶奶，佢有以下一番評論：「佢係一個老人家，68年嚟冇人想聽佢講嘢，其實係一件令人好遺憾嘅事，所以只要有一個機會可以被重視，佢都唔會放過。」
最諷刺嘅係，當晚佢出夜街，其實係同前夫個妹出去買背囊，佢個妹當時唔知阿哥阿嫂因為嗰晚嘅事搞到離婚，過兩日收到風即刻同阿哥講唔好信阿媽，不過已經太遲，我眼前呢位女士已經執晒嘢搬返娘家，個前夫又跪又氹都堅決要離婚。
今朝見到吳文遠 Avery Ng先生一個post，羅范椒芬話有女仔做慰安婦，同示威者免費造愛，不過係「佢個仔個朋友嘅朋友」講，唔方便出示證據，我即刻諗起嗰位惡意中傷嘅奶奶。
羅范椒芬原來都66歲，係一個老人家，呢66年嚟冇人想聽佢講嘢，其實係一件令人好遺憾嘅事，所以只要有一個機會可以被重視，佢都唔會放過。
我哋冇辦法阻止愚昧同埋冇口德嘅人出現，但我哋絕對唔可以成為嗰位懦弱無能，人哋講乜都會信，冇思考能力嘅廢柴前夫。