收到阿媽WhatsApp，叫我放工打畀佢，跟手就直接打過去：「喂，做咩事？」
阿媽：「哎呀，你放工先打嚟吖嘛，一陣老細話你辦公時間講私人電話。」
阿媽由細到大都灌輸一種要服從公司，服從老細嘅價值觀畀我，如果唔聽話，公司會唔加人工，唔升職，甚至會炒，好可惜我呢個仔永遠都唔聽話，做親啲嘢永遠都係相反。
「我冇返工呀今日。」
阿媽：「又唔返工呀？一陣老細唔鍾意呀，唉，睇下邊日得閒，我哋三仔乸出去食飯做節啦，星期六晚好唔好呀？」
「閒日好啲喎，下星期一或者二好唔好？」
阿媽：「閒日我點等到你9點呀？你咁晏收工，我平時7點幾食飯喇。」
「我辭咗工呀，之後會準時6點走，早走都仲得。」
阿媽：「又辭工？」（唔知點解佢用個’’又’’字，上次我辭工已經係幾年前）
「係呀，所以幾時食都得。」
阿媽：「大個仔喇，唔好少少唔開心就唔做，人要長大先得㗎，唔係點娶老婆呀，你係咪想老咗冇人照顧吖。」
點娶老婆我就唔知，但我知自己其實長大咗，仲係三次咁多，以下文字嘅出處係韓劇《請回答1988 응답하라 1988》，未睇過都一定見過以下幾句：
「人會長大三次。
第一次，係發現自己唔再係世界中心嘅時候；
第二次，係發現即使幾努力都好，仲係有好多嘢無能為力嘅時候；
第三次，係明知道有啲嘢無能為力，但仍然會盡力爭取嘅時候。」
有00後嘅朋友同我講，佢喺今個夏天一次過進化晒三次，亦有較年長嘅朋友同我講，佢一早經歷咗第一二次，去到呢兩個月，佢先經歷埋第三次長大。
你呢？