不知所謂！真係嬲到出煙！HR走嚟問我係咪去咗見工，我問返佢轉頭，無啦啦見咩工呀？佢話有人打嚟問我啲資料，成件事一頭霧水，對方查問我平時工作表現同埋為人係點，做咩職位，仲有幾錢人工。
HR當時就覺得呢個電話係打嚟做reference check，但最起碼要知道對方係咩公司，點知問極都唔講，結果就冇答任何問題，然後打內線叫我去人事部，佢哋以為我去咗見工，有就梗係唔怕認啦，冇見過點認呀？我都想知咩事呀！無厘頭有人打去公司攞我啲資料，換轉係你都驚啦！
諗嚟諗去都冇頭緒，加上心入面好不安，所以我向朋友、屋企人，仲有女朋友透露咗呢件事，大家老老實實喇，係咪有人出去借大耳窿寫我做擔保人？我唔想有一日放工突然畀人斬，邊個咁冇陰公唔該自己出嚟認咗佢。
朋友同家人全部斬釘截鐵話冇，唯獨是女友支吾以對，問多兩問係咩事，佢承認係有個做警察嘅舅父話要起我底……你冇嘢呀？起我底做咩呀？Check我有冇去過遊行呀？還是Check我係黃定藍？
我同呢個女友拍咗拖四個月啫，完全未見過佢舅父，莫講話佢舅父係警察，我連佢舅父係咩樣都唔知，女友話成件事係因為佢阿媽想知我信唔信得過，驚我呃佢個女，結果就私下問個女關於我嘅資料，跟住就搵呢個警察舅父幫忙，女友話佢冇諗過會咁癲打去我公司。
得罪講句，呢個警察舅父真係不知所謂，直頭唔死都冇用，我哋呢啲正當公司有規有矩，就算做reference check都有程序，你估好似班有牌爛仔咁，求其的條友入後巷chok料咁呀？黑社會呀？你九唔搭八咁樣問人嘢，憑咩要答你呀？警察大晒呀？你搞到公司誤會我偷偷地去見工，一陣影響埋我嘅前途，點樣賠返畀我呀？
你話我做男人咁小器都好啦，因為呢件事我同女友分咗手，先撇開我本身好憎警察，一開頭亦唔知女友親戚有人做警察，佢阿媽走去問個女關於我嘅公司資料，而我女友又咁順攤照比，呢一part已經好有問題，同埋呢個阿媽變態到咁，走去搵警察親戚起我底，連尊重兩個字都唔識寫，得罪講句，你成家都冇腦，你哋知唔知咁樣會影響到我份工㗎！
思維，作風，仲有價值觀都咁大分別，再同呢個女朋友一齊，將來嘅日子都唔會好過，我寧願趁早斬纜。
我而家得返一件事諗唔通啫，就係好唔好將個始末同返HR講，我知佢哋因為嗰次電話而懷疑我去見工，其實呢樣冇咩所謂，我係驚佢哋諗我去借錢，不過同HR講係女友個舅父打嚟chok料又勁奇怪，一陣話個舅父係做警察，又驚佢哋以為我犯咩事，真係唔知點做好。
以後拍拖要問定對方有冇屋企人係警察，有就係咁先，唔想同呢啲人扯止任何關係。
投稿讀者：Oscar
＝＝＝＝
🌝 講起呢個主題，不其然又諗起《我的臥底朋友》，有冇新讀者未睇過臥底系列？
https://hkofficedaily.com/?p=10344