同大雄仲有阿菲一齊出去見客，搭車嗰陣阿菲一路同人講電話傾公事，聽得出係有啲urgent嘢，而大雄呢個時候終於似返個老細，不斷向我傳授見客嘅心得。
大雄：「之前份工使唔使見客呀？」
我：「唔使呀，同埋我都係Assistant，要見都唔輪到我見。」
大雄：「學下囉，總之唔使緊張，呢啲嘢兵來將擋㗎啫，客人永遠都想要平啲，邊平得咁多吖。」
我：「明白，我會慢慢學。」
估唔到第一次出嚟見客就咁辛苦，當日好大雨，又好焗好熱，我哋三個搭的士嚟都好論盡。
上到人哋公司，個客入房之後連招呼都冇打，第一句就壓價。
客：「沈生，你批貨唔掂喎！」
老細：「點會唔掂啊？過晒QC㗎！」
客：「唔係話你啲質素唔掂呀，話你個價錢唔掂呀！」
老細：「今年加咗好少咋喎，原材料升咗吖嘛。」
客：「我唔理原材料有冇升吖，你上年唔係呢個價㗎嘛！」
老細：「咁你覺得乜嘢價好吖？」
客：「做返舊價啦！」
老細：「難啲喎！」
客：「有幾難啫，我年年都幫襯你，唔係咁呀？總之唔減價就唔落單，其實你啲嘢都唔係咁好㗎咋，而家仲要抽時間同你傾，你估我好得閒呀？」
聽到呢度我已經想拍枱，我哋成身濕晒，山長水遠過嚟同你傾，你啲態度有冇咁閪呀？
老細：「講開上年啲單，你哋好似未找數。」
客：「催咗會計部㗎喇，我哋咁大間公司走你數咩，間間都有數期㗎啦！」
仆你個街吖，舊數未清，新單仲要減價？不如我做醜人開聲屌佢啦，反正我係新人。
老細竟然冇火：「唔係喎，爭咗好耐喇喎，或者會唔會找一部份先呀？」
呢個時候終於輪到阿菲表演。
阿菲：「做返上年個價？」
客：「係呀，你哋有乜理由年年加？」
阿菲：「咁你老細年年加人工畀你，你會唔會問佢有乜理由年年加？你呢幾年冇加過人工呀？」
個客窒一窒，但仍然死撐：「你點知我一定有加人工呀？我冇加喎！」
阿菲：「咁大間公司幾年唔加人工？唉唔係喇，你老細好似好唔掂咁，唔怪得上年條數仲未找啦！你要找咗先好落新單喎！」
客：「你係咪咁講嘢呀，我最多同第二間落。」
阿菲：「車！你地成日拖數，第二間接到你啲單都喊三聲啦！」
客：「得！我轉頭就叫會計找數俾你。」
阿菲：「隔咗咁耐，我係咪仲要多謝你？」
最後呢個meeting不歡而散，個客真係為咗啖氣找數，而佢亦冇向我哋落單，阿菲話唔緊要，間間公司都加價，我哋算加得最少，佢要同第二間落order，一來搵自己笨，二來都係嗰句，唔找數嘅客keep黎做乜？而且呢啲客係有一個循環，佢同第二間落單，又係唔找數，久而久之同其他公司反面，然後又會返嚟搵我哋。
第二日大雄同我講：「噚日個客咁乞人憎我都冇鬧佢，因為我有修養，唔使同呢啲客一般見識。」
我終於明白點解Office六條女日日屌鳩佢，我嗰一刻都想同大雄講聲：「你食屎啦！」
其實大雄係咪真係咁抵屌呢？可以話係，又可以話唔係，佢對人真係好好，乜都冇所謂，例如我哋有個成日請假嘅同事Angel，因為佢當時生完BB冇幾耐，屋企有好多事兼顧唔到，大雄成日比Angel work from home（嗰陣係冇疫情），大雄話搞得掂啲嘢唔一定要返office，最緊要顧掂屋企先，其實Angel唔係好搞得掂，不過大雄從來冇怪佢。
Ronnie就因為要讀書，一個禮拜有三日要早走一個鐘，大雄從來唔計較，有時仲會催佢快啲收工，話返學唔好遲到。
至㢢大雄對住街外人同埋客都係一樣，阿菲描述佢嘅為人好貼切。
阿菲：「其實你老細好好人，講真佢嗰套喺以前贏咗唔少客返嚟，所以公司先至有得做，賺大錢就冇可能㗎喇，不過點都唔會餓死，只係年代唔同咗，社會唔同咗，人亦都仆街咗，而家啲客冇以前咁忠誠，唔會識得感恩，你做一次好人，就會畀人一直榨取，當然唔係個個都咁樣，我諗有3成係有良心嘅，大約7成係貪得無厭嘅仆街啦！」
我：「即係好似上次個客咁，一年唔找數仲要講價。」
另一位同事阿欣搭嘴：「Roger你講嘢太斯文喇，咁樣我哋做唔到同事，簡單啲講，老細成日俾人搵鳩笨柒。」
Helen又搭嗲：「其他唔講，淨係講你老細畀人啲數期，其實一世都唔會追得返，有一段時間公司畀人拖嘅數超過100粒，100粒喎，我哋公司仔嚟咋，你話要墊支幾多出嚟吖，如果我哋唔幫佢追，佢仲會唔好意思追人，戇鳩到咁撚樣。」
Angel：「有種人嘅性格係咁㗎，我老公都係，乜撚都話算，乜撚都話無所謂，怕唔好意思，朋友借錢唔還又唔好意思追，其實佢哋係介意，但死要面，好在我老公唔係做生意。」
阿菲：「沈生都唔應該做生意㗎，如果唔係請咗我哋咁辣，佢間公司都可能執咗，佢嗰套而家唔work㗎，講良心講信用，屌你老味，呢個世界冇一個客係無辜，個個都自撚私，自己份糧就要年年加，人哋啲價就十年唔准加，好撚多呢啲有口話人，冇口話自己嘅賤種！」
Ronnie：「呢個世界好多人都有兩把尺，寬己嚴人。」
我：「不過話時話，我第一日返工嗰陣，沈生連搬水都要俾你地屌，我真係有少少嚇親，又唔知佢係老細呢。」
Pat：「佢唔屌唔鬆化㗎！沈生之前整親條腰，而家仲睇緊脊醫，係佢老婆叫我哋睇住佢，唔好俾佢搬重嘢再整親，你估我好想屌佢㗎！」
Helen：「沈生一係畀我哋屌，一係畀啲客恰鳩佢，咁你揀喇，如果我哋都好似佢咁，呢間公司執撚咗十世。」
其實呢間公司啲同事真係相親相愛，只係表達嘅方式比較粗魯，而且阿菲佢哋好肯教我嘢，同我上一間公司啲人好大分別，呢6個每日瘋狂爆粗嘅女人經常勸我轉工，佢哋話呢度發展有限。
阿菲：「你得20幾歲，趁後生試下其他嘢囉，我哋呢班師奶求安定，真係貪呢度易話為，屋企有事行開行埋講一句就得，出面啲公司我未必適應，做人係咁㗎啦，要取捨。」
曾經努力返夜學嘅Ronnie反駁：「咩我哋班師奶，我未夠30㗎！嗰陣努力讀書都係想轉工咋！」
Pat：「屌，嗰陣沈生直情俾你請假見工啦，你自己見唔成咋嘛。」
佢哋真係open到咁，大雄（即係沈生）自知公司規模唔大，好歡迎同事搵更好出路，當時的確畀Ronnie攞正牌去interview，但唔知係佢reject offer抑或人哋唔請，直至而家仲喺度做。
可能我係男仔，冇辦法唔諗得長遠啲，今年搵到間大公司之後，我選擇忍痛離開，其實好唔捨得個工作環境同埋呢6個粗口爛舌嘅女人，仲有嗰個乜都冇所謂嘅大雄老細。
我之後一定會抽時間返嚟探佢哋，文中所有人都係真名，除咗開頭叫沈生做大雄，講下講下，我又好掛住阿菲、Ronnie、阿Pat、阿欣、Helen、Angel，仲有大雄。
返咗新工幾個星期，坦白講都幾難適應，不過我會堅持，早兩日打畀阿菲：「如果將來我返嚟做，你哋歡唔歡迎我？」
阿菲：「屌，我哋未執先算啦，你老細又畀數期人喇，我轉頭就屌鳩佢！」
而家我喺新公司要扮斯文，好掛住佢哋啲粗口呀！好公司好同事可遇不可求，慶幸我都曾經擁有。
（完）
＝＝＝＝
❤️ 重溫上集
CLS公司 （上）有個同事任X唔嬲
https://hkofficedaily.com/?p=17491