最快有offer:10:48 send CV,11:45請咗

返咗新工幾日,有啲淆底,首先呢份工打破咗我人生最快有feedback,同埋最快有offer嘅紀錄,我喺jobsdb send咗份CV出去,當時係朝早10:48,然後隔咗10分鐘,即係10:58,嗰間公司嘅HR已經直接打電話過嚟。

「Alvin係咪?收到你份CV,想問下你而家有冇返緊工㗎?」其實我份CV寫得好詳盡,做咩未睇清楚就打嚟呀?由send出去,再收到佢個call,前前後後真係得10分鐘,咁快就打畀我,一係你冇其他CV,一係就好得閒。

我:「係呀,上一份工quit咗之後,而家未有工作。」

「你一陣間2:00方唔方便上嚟interview?」

我:「一陣2:00?」我聽到,只係想思考下,所以先至重複。

「你今日有其他工要見?」

我:「唔係, 我怕趕唔切啫,因為都要換衫同埋準備下。」

「咁我約你晏少少,3:00 ok?」

都要ok㗎啦!唔係趕唔切,當時都係朝早11點咁上下,時間上就算in 2:00都綽綽有餘,只係見工始終要少少心理準備,例如search下公司background,喺屋企練多兩次自我介紹,係咁易都要調節下㗎嘛,不過搵咗工兩個月都冇回音,唔通我仲推三推四咩!

當時我仲著緊條底褲,朝早都未回魂,諗住搵塊麵包當早餐 + lunch咬下啦,點知個HR又打電話嚟。

「Alvin,一係視像得唔得?有冇用Teams或者Zoom?」

我:「有用Teams,Zoom又得。」

「咁我叫埋個Manager一齊in,11:30吖,Teams好唔好?Send條link去你email度。」

嗰陣時已經11:10,即係20分鐘後,莫講話做咩background search或者interview準備,你都要畀啲時間我吹下頭執下個樣,起碼換返件恤衫啦!

我:「哦,好吖,咁我等你條link吖!」鬼叫自己冇嘢撈咩,頭先已經話2:00去interview好趕,而家人哋打嚟改為視像,費事再改嚟改去咁麻煩啦,11:30就11:30囉!

趕頭趕命食咗啲嘢,著衫著褲,求其梳個三七分界,然後就click條link開始interview,HR同埋嗰個Manager都喺度,睇嚟唔會分咩first in同second in,明顯諗住一take過。

Interview基本上係我介紹自己,用咗2至3分鐘左右啦,跟住係Manager講下份工要做啲咩,呢度都係幾分鐘,因為佢講得好概括下,最後HR壓軸問我最老土嘅問題:「你有冇咩想問我哋?」

老實講,由我send CV到嗰一刻已經做緊視像interview,全部係一個鐘頭之內嘅事,冇咁耐添呀,應該係40分鐘之內先啱,邊load到咁多嘢呀?跟住HR就話一有消息就會通知我。

以為整個過程好似草草了事咁,應該係衰咗啦,點知隔咗幾分鐘,個HR又打嚟。

「Alvin,星期一返工有冇問題?」佢真係殺我一個措手不及。

我:「哦,冇問題,多謝你哋畀機會。」

「好,咁你星期一帶張相,拎埋啲學歷證明同埋reference letter返工就得,到時搵咗我先,幫你搞啲手續。」

望一望個鐘,當時係11:45,我再睇返email,因為經jobsdb send CV出去係會有record,我send出去時係10:48,換言之成件事係一個鐘內搞掂。

我明白好多人經朋友介紹,可能搵工嘅時間仲短,甚至見都唔使見就請咗,但如果以正式途徑send CV搵工又完全唔經任何人事關係,仲要係office工而唔係retail等服務性行業,我呢個收到offer嘅紀錄都算係快喇啩,起碼對我個人嚟講係最快紀錄先啦!

星期一返工膽粗粗同個HR講,冇諗過咁快收到offer,佢咁樣答:「哦,因為有個同事下星期last day,想盡快請到個人交接,我收到好多CV都係要1 month notice,有啲仲要2 months,咁你即刻返得工當然係優先考慮啦!」

明白,咁我個心都定啲。

埋位做嘢,嗰位據稱下星期last day嘅女同事超級西面,我都唔敢惹佢,然後lunch之後有另一位同事請食散水餅,我八卦問咗Manager一句。

我:「咦,又有同事走呀?」

Manager:「哦,冇事,呢個同事一早講咗會移民㗎喇,食散水餅吖,唔好客氣。」

臨放工之前,又多一位同事請食散水餅,即係計埋教我做嘢,聞說下星期last day個西面女仔,公司短期內會有3個人辭職,呀,唔係,應該係我個department短期內有3個人辭職先啱,其他department我唔知。

然後星期二係紅日,我返咗一日工就放假,今日(編按:收到稿係星期三)返到公司,又多一個同事辭職,呢個遞信啫,今次冇散水餅,Manager見我眼望望,過咗陣煞有介事咁走嚟同我講:「你放心,我哋請緊人,如果你工作上有咩唔明可以問我,唔使擔心workload好重,有個新人下星期會返工。」

我:「哦,哈哈,又會咁多人走嘅,可能0+3,大家想放長假去埋旅行。」我問得夠唔夠婉轉?

Manager:「冇事㗎,正常,唔使擔心,你做好自己嘢就得㗎喇。」

唔知點解呢?我諗起《喜劇之王》裡面,周星馳最初喺社區中心教班小姐做戲嗰一幕,張柏芝拎晒褶凳行埋嚟,周星馳好驚,個媽媽生一直講:「冇事嘅冇事嘅,唔使驚,冇事嘅冇事嘅……」

直到張柏芝真係一板板咁車落去周星馳度,已經打緊㗎喇,媽媽生仲係擔住口煙話:「冇事嘅冇事嘅,唔使驚。」

由send CV同有offer喺一個鐘內搞掂,再返咗兩日工就得悉有3個同事會走,Manager都係同我講:「冇事嘅冇事嘅,唔使驚。」其實我點會聞唔到伏味吖,而家仲好擔心添,不過我真係冇工返,同埋想睇定啲先算,預咗惡做㗎喇,祝福我啦!

error: