有啲咁嘅同事真係好煩，做嘢唔得仲可以慢慢教，但我個下屬係周圍喺office溝女，溝到隔籬部門啲阿哥阿姐都走嚟向我投訴，真係冇L晒面，你靚仔嘅，溝得掂嘅，我唔會阻你自由戀愛，問題係你溝唔掂吖嘛！問題係你成個痴漢咁吖嘛！
我：「阿Don，我真係保你大，唔知你以前有冇收過呢類warning letter，我自己就第一次出呢類警告信，不過今次亦係最後一次警告，Sharon唔告你性騷擾真係執到，咪迫我炒你，每個人嘅容忍都有個限度，好自為之！」
阿Don：「明白」
我：「明明明，你明乜L嘢呀？」
阿Don：「我唔會喺公司溝女㗎喇……」
我：「唔係阻你溝女呀，呢個唔係重點呀！話之你喺度食喺度屙啦！男女同事之間嘅嘢我唔會理咁多，但你溝唔到就收皮吖嘛！你係咪睇啲咩韓劇台劇上L晒頭呀？Sharon話你喺meeting room向佢壁咚，你估佢真係搵到工所以走呀？人哋新人嚟咋，嚇親呀！我叫佢告你性騷擾㗎！佢話算數咋！」
唔係大佢，公司個新人真係畀阿Don嚇親先至走，因為Sharon一入嚟已經畀阿Don睇中，又搵人送花嚟，又成日擺啲on9小禮物喺Sharon枱面，如果對方對你有意思就叫浪漫，若然係唔鍾意你，咁就唔該收手啦！
阿Don仲每日都叫Sharon合照，然後post上fb同ig，其他同事見到同返Sharon講，好似話阿Don營造到公司有個女朋友咁，人哋Sharon有仔㗎！阿Don仲要叫Sharon入meeting room示愛，示愛都算喇，學人壁咚，Sharon同我辭職就係講呢個原因，嬲L到我吖！
阿Don唔止咁少料，Sharon未嚟之前佢就追隔籬部門另一位女同事，成日借頭借路去人哋個位傾計，一去就唔肯走，企喺人哋張枱個幾鐘，隔籬部門個阿姐兜口兜面叫佢走，佢唔聽，結果走嚟向我投訴，叫我好好管住自己啲下屬。
「可唔可以叫阿Don唔好成日行過嚟呀，我個女同事其實好驚佢，人哋有禮貌先至冇出聲，已經好婉轉話好忙唔得閒傾，個阿Don仲賴死唔走，喺度搞我女同事張枱啲文件，企喺度成個鐘唔知做乜，我睥住佢又扮睇唔到，我出聲叫佢走仲喺度嘻皮笑臉。」
再之前阿Don又睇中Sales team一個女仔，約人食飯睇戲全部被推，咁你就應該知難而退啦！阿Don仲唔知衰喎，買咗隻半個人咁大嘅bear bear熊，返工前擺去人哋個位，屌你老味人哋返到嚟連個位都冇得坐，最終Sales team個大佬又走嚟叫我搞搞阿Don，話唔好影響同事工作，真係咩架都畀阿Don丟清。
「你個下屬阿Don冇嘢呀？搞到我個女同事畀人笑，叫佢拎返隻熊走啦，又懶型話送咗嘅嘢唔收返。」
我：「得，你拎隻熊畀我，我幫你畀返阿Don。」
搞還搞你唔好搞Sales team啲人啦，好L惡㗎佢哋！
呢啲係計我知，或者有人直接向我投訴嘅case咋，有其他同事私底下同我講，阿Don唔止追過呢幾個女仔，基本上office裡面有返咁上下姿色嘅女同事都畀阿Don追過，正確嚟講係騷擾過。
都係嗰句，男歡女愛呢啲嘢好平常，唔好話我作為上司，就算我係佢父母都冇資格過問，但你而家搞到人哋覺得煩同埋困擾吖嘛！聽講佢之前追個女會計追到等人放工，對你有意思梗係感激啦，對你冇意思會好驚㗎，晚晚有個男同事釣住你尾跟埋坐車，再夾硬話要送你返屋企喎！你變態㗎？
我：「嗱，阿Don，出得呢封警告信呢，即係老細已經知道，唔好要我難做啦好冇？公司好少會炒人，仲要因為呢啲原因炒人呢，你就真係開創先河㗎喇！」
阿Don：「得㗎喇，真係明，但係Sharon嗰度呢，其實我真係問下佢肯唔肯做我女朋友咋，聽講佢自己都做得唔開心，未必關我事。」
我：「拎埋封warning letter出去啦，我唔想討論，已經好多人向我投訴，我好攰喇，仲有上次隻熊，畀返你之後見你留喺個位度，拎走吖唔該，老細見到唔好睇，唔該你，麻煩你，求下你。」
同一日，我準備放工，行出去reception見到隻bear bear熊，都未嚟得切開口問，receptionist個姐姐仔就向我來救：「唔好意思，頭先阿Don話送畀我，我已經講咗唔要，佢死都要放低，你可唔可以叫佢拎走？」
我：「除咗放低隻熊，佢有冇溝你？」
「唔知算唔算，佢約我食飯，我推咗。」
我：「佢個人呢？」
「應該走咗，見佢孭埋袋。」
有呢啲多情種子下屬真係好L煩，收手啦阿Don，公司啲女唔會受你溝㗎啦，搵食行遠啲啦！一陣炒你又喊打喊殺去勞工處，我唔想搞大件事呀！