唔關speed dating嘅客事，今次係關我朋友事，上星期有個叫Susan嘅朋友send咗張相畀我，連隨打嚟問：「知唔知呢嚿嘢幾多錢？$500賣畀你要唔要？」睇真啲，Meta Quest 2嚟喎！$500蚊？壞㗎？定係公司抽獎，抽中唔識用想益我？
我：「呢個係Meta Quest 2，全新應該三千幾啩，視乎幾多容量，你呢個係128GB定係256GB？$500我梗係想要啦！不過係二手定係點先？如果正常冇壞，即刻過數畀你都得喎，有冇盒吖？邊度嚟㗎？」
雖然我一口氣問咗好多問題，不過Susan都係答咗我一句啫：「原來要幾千蚊呀？唔知個盒喺邊喎，咁你$500要唔要吖？」
我：「咁你個Meta Quest 2邊度嚟先得㗎？賊贓我又要咩……」
Susan：「我男友㗎！佢話$500吖嘛，咁我咪$500賣畀人囉！」
哦，開始明少少喇，即係男友呃佢買貴嘢，所以就攬住一齊死係咪？嗱，乘人之危呢樣嘢呢……我就最鍾意㗎喇！
我：「要！要！要！有冇payme，殺你！幾時可以交收？」
Susan好似聽唔到我最關心嘅問題重點，自顧自咁鬧佢男友：「呢嚿嘢唔丟咗佢我唔姓謝！」
我：「唔好丟，都話我要咯！btw識咗咁耐，淨係叫你Susan，而家先知你姓謝。」
Susan仍然好似入咗另一個空間，我有我講，佢有佢呻：「起初佢話買個VR眼罩打機，問佢玩咩game又答唔出，我都估到有景轟㗎喇，以前玩PS明明打開房門，最近買咗眼罩之後就閂埋房門鬼鬼祟祟，問佢點解玩得咁神秘，佢話打槍game要靜啲集中啲喎，卒之畀我發現佢用嚟睇AV，冇得唔認啦！」
解釋下先，Susan同男友而家係同居。
我：「又唔算呃你嘅，都係槍game，不過係打手槍，可能佢講得簡短咗啫！」
Susan：「我唔理佢打咩吖，而家佢認晒喇，仲叫我試下睇，痴線！睇AV睇到買呢啲眼罩，最過份係佢竟然夠膽死問，可唔可以戴住呢嚿嘢同我做，佢當我係咩呀？要我個身體，但係視覺上就睇住第二個女人一路同我咩，然後幻想同其他人做呀？我真係嬲到爆炸！」
我：「Sorry，我唔識畀意見，不過佢咁講又好似唔多尊重你，冷靜啲同佢傾下先啦！」
Susan：「男人睇AV我明白，但有冇必要搞到咁毒呢？咸濕都要高科技？仲呃我話$500！」
我：「對生活質素有要求係好事嚟嘅……」已經盡量幫佢男友兜，就快兜唔到。
Susan：「完全理解唔到，有個女朋友生勾勾喺度唔搞，走去戴個眼罩玩虛擬？仲話要戴住同我做？你知唔知佢點答我呀？佢話戴住同我做，咪又係同我做，總好過出去搵其他女人真做，呢啲係咩歪理？」
我：「佢提出戴住同你做，係佢唔尊重你，呢樣佢唔啱，不過可能係一物二用啫，因為呢隻Meta Quest 2真係可以用嚟玩game嘅。」
Susan：「我唔理，我係親眼睇住佢打飛機打到忘我。」
我：「點樣睇住佢打飛機打到忘我？」😨
Susan：「尋日我早咗返屋企，佢戴住airpod玩呢個眼罩，我入咗嚟都唔知，睇住佢除晒褲打緊飛機，卒之我行埋去一巴星落佢塊面度，跟住佢先至認之嘛，啱啱發現屋企有呢個眼罩嘅時候佢唔認㗎，成日話打機打機，而家斷正冇得唔認啦！」
我好衰咁樣諗，Susan男友睇緊VR，突然畀人星咗一巴，會唔會覺得：「嘩，而家啲AV咁逼真嘅，竟然有觸感！」🤣🤣🤣
Susan：「$500吖嘛！佢講得呢個大話就要承受惡果，連幾多錢買返嚟都要呃我，我就$500賣畀你，你一陣可唔可以過嚟，我拎落樓下。」
我：「Sorry，我估你男友成日用隻打飛機嘅手掂個Meta Quest 2，我諗呢啲嘢都係買新嘅好少少，我唔要喇。」
Susan：「啱，佢真係好dirty，我上次當場發現，佢就係一隻手chok緊自己下面，你唔要吖嘛，我而家即刻丟出垃圾房！」
唔好意思呀Susan男友，救唔到你個Meta Quest 2，但我一諗起你一路自摸自chok又一路掂個Meta Quest 2，照計你唔會咁好手尾消毒㗎啦，呢部嘢我要唔落手，都係正價買部全新好啲。
不過Susan男友又幫唔落嘅，衰咗就認，打就企定，竟然仲提出戴住VR同女友做，又真係過份咗喎。