有時心直口快，唔好見怪。
我個HR朋友打嚟，聽聲都feel到一股雄心壯志，究竟係咩貴幹呢？原來佢老闆呢個年度會抽撥更多資源去搞活動，因為見上年搞BBQ、馬拉松、跳舞，同埋一個唔知乜春野外定向訓練好成功，所以希望繼續營造一個大家庭嘅感覺，多啲呢類福利就可以令上上下下好似一家人咁。
「好難得老闆肯開水喉搞福利嘢，不過就要諗好多工餘活動，例如返大陸三日兩夜同埋星期六集體行山，你識咁多公司吖，有冇聽過仲有咩活動可以搞畀同事玩？」
我：「其實最好嘅福利就係唔搞咁多活動。」
「喂呀，係咪唱反調呀？」
我：「唔係唱反調，作為一個打工仔，你想工作以外嘅時間繼續陪同事，定係返去陪男朋友、老公，或者屋企人？」
「我明，不過老闆話想好似大家庭咁吖嘛。」
我：「大咩家庭啫，維繫同事間嘅感情係重要，但應該適可宜止，朝九晚六唔OT返到屋企都7、8點，你同至親或者朋友每日相處嘅時間有幾多？有數得計啦！」
員工唔係石頭爆出嚟，佢哋有家人，有家庭，我哋office hour做緊嘢，老闆去邊都冇人理，路過搞啲工餘活動，佢梗係冇影響啦！但我哋唔係呀！
所謂家人，係我冇工開，阿媽一樣煮飯畀我食，而就算我唔返屋企食飯，同樣會畀足家用，因為家人係唔計較，係無條件嘅愛，而我哋同公司之間始終係有條件嘅交易，close係好事，不過唔好打住一家人嘅旗號，留返啲時間畀員工享受私人生活，其實就係最好嘅福利喇。