我本應在獄中度過……

多謝每個畀機會我嘅人,我本應在獄中度過……

大約半年前,有次我去廁所,見到同事對住個尿兜小解(背住我),因為我同佢太friend,所以行埋去隔離個尿兜嗰陣,一手就拍落佢屁股:「衰仔,食飯未呀?」

佢成個人彈一彈同埋震咗一下,同一秒鐘,我發現佢唔係我同事……

佢好愕然咁擰過嚟,我知自己應該講對唔住或者唔好意思,但當時我都好驚,驚咩呢?我唔知呀!總之嗰一刻真係講唔到嘢,加上我亦拎咗某啲嘢出嚟要一氣呵成,最後佢口震震咁答:「未…食…」

我認得佢,係同一層樓另一間公司嘅職員,因為成日出入都撞見,不過我想強調,佢同我同事個背影真係好似,無論係高度,衣著,仲有後尾枕嘅髮型。

大家一齊對住尿兜嗰半分鐘,就好似一個世紀咁耐,最後佢去完,不發一言,洗手,離開。

我知我應該道歉,但當時真係唔識畀反應,返入office見到好似佢嗰位同事,唔知點解有啲嬲佢冇去廁所。

自從嗰次之後,我心情好複雜,去廁所盡量儲埋一次,但又有少少想見到佢然後講聲對唔住,有時仲會驚警察上門。

一個月前,佢間公司要搬喇,聽講搬去TST,我鬆咗一口氣,但儲埋一次去廁所嘅習慣喺不知不覺間養成咗,今朝有個女同事叫我注意健康,要飲多啲水,我問點解?佢話見我成朝都冇去過廁所,好驚訝有人咁關心自己:「你有留意到?」

女同事:「因為你條褲鍊由今朝返工到而家都未拉返。」

多謝每一位冇告我性騷擾嘅人,我本應在獄中度過……

error: