一人有一個死穴。
某公司HR：「你哋又加咗價呀？之前唔係收13％咩？而家請個人要收15％呀？」
我：「你上次搵我哋請人係3年前喎。」
「咪係囉！之前都幫襯開，離晒譜加咁多，嗱！你收返13％先好幫我搵人呀，15％我哋唔畀㗎！」
我：「咁我想問下你，你呢3年人工有冇加過呀？如果冇加，你仲繼續做呀？咁如果加咗，你覺唔覺得你老細加你人工係離晒譜？」
「得啦！你咁講嘢，以後唔使搵你哋啦，咁威。」
其實同我合作過嘅人，應該會知我絕對唔難相處，無論係headhunt方面嘅工作，定係辦公室日報嘅工作，不過我有一個死穴，如果踩中咗就天王都冇面畀，就係講價。
有時啲搵我做headhunt嘅客會嫌我哋佣金貴，又會成日話candidate人工貴，咁你咪用間平嘅agency，請個人工平嘅人囉！你自己份人工就可以加，人哋份人工就要減，有冇咁自私呀？
經驗話畀我知，減價絕對冇著數，因為對方係點嘅人先至係關鍵所在，有時你收得平、服務好、態度好，有咩事又第一時間幫手，人哋未必感激你，反而要求更多，因為你易話為吖嘛！試過接一個廣告，有另一個少我幾萬人嘅page同我一齊做，不過人哋收費仲貴我一萬，廣告出街之後幾日，個客仍然斟酌我點樣覆讀者留言，不斷畀意見，不斷講低想我點覆，反而收貴我一萬個page係完全唔覆讀者留言，咁你話喇，收得平又服務好，係咪一定有相對嘅回報？如果對方欺善怕惡，其實只會得寸進尺。
世界上仲有一種人，係你收幾多都會壓你價，曾經有個headhunt公司嘅客壓candidate價，人哋expected salary係3萬，佢壓到人2萬8，之後搵到另一個expected salary叫2萬8，佢又走去壓到人2萬6，跟住我先發覺，無論搵一個3萬、2萬8、2萬6，甚至係2萬嘅人比佢都一樣，因為有啲人唔搵你笨柒係唔安樂，hobby嚟㗎，同你值唔值係無關。
呢度係香港，唔係羅湖商業城呀！