得悉政府維持最低工資時薪HK$37.5嘅同時，我啱啱行經之前工作嘅茶餐廳附近，只可以講句感觸良多，上年同前年我都係拎住一份比最低工資多少少嘅時薪做侍應，前老闆話接連受到社會運動同疫情影響，只可以出到咁多，佢亦睇準出面市道差，班伙計想轉工都唔易。
香港真係幾搞笑，天跌落嚟都好，樓價升，物價升，人工唔升，最低工資時薪HK$37.5，你去好多餐廳都食唔到一碟飯，不過我以前茶餐廳個老闆仲搞笑，伙計人工已經唔係高，樓面時薪，廚房月薪，佢都仲要個個月遲出糧，有次直情遲過七日，有同事去咗勞工處，老細知道後大發雷霆，喂！你自己拖糧仲走嚟怨啲員工去求助，冇嘢呀嘛？
老闆有3個仔女，一個讀緊小學，兩個讀緊中學，每次佢哋嚟我哋茶記坐，落緊場食飯嘅同事都要入返廚房食，呢個係老闆嘅指令同要求，佢嗰3個仔女嚟親都好似大爺咁，又要招呼佢哋呢樣嗰樣，但最好笑係佢3個仔女齋飲㗎啫，唔會食茶記啲嘢，話難食喎！有次聽到佢哋話要出去食龍蝦包同鋸扒，哈，咁細個都嫌茶記難食要食高級嘢呀？難為我哋班員工要食呢度啲嘢，佢老豆更加講明好多嘢唔可以畀員工食，例如麵只可以腸仔、餐肉、火腿或者雞蛋，連雞翼都唔畀食，試過有次走去用筷子「撩」一個同事兜麵，檢查佢有冇偷偷地食餐廳啲雞翼或豬扒，驚佢哋用啲麵壓喺底然後偷偷食。
呢度啲廚房大佬同水吧哥哥好好，大家都知老闆刻薄，個個同一陣線，老闆唔喺度會畀多啲餸我哋，有時諗諗下都覺得折墮。
老闆3個仔女全部用最新嘅iPhone iPad，最新嘅智能手錶，我哋班樓面就捱住最低工資，唔好話換新電話，有時應付完生活開支，交電話費都好勉強，望住老闆啲仔女，真係覺得個世界唔公平。
上年疫情，老闆話長期冇晚市捱唔住，跟住就決定唔做，最後一期糧都要拖我哋，搞到我哋幾個同事上晒勞工處，拖拖拉拉成半個月先追得返。
重遊舊地，見到當日茶記間舖已經轉租畀其他人做其他嘢，我一啲都唔覺得可惜，雖然好多同事當日失業係非常傍偟，但係佢間茶記執咗，我哋都係開心嘅。
我記得執笠拖糧嗰陣，老闆仲話個市唔好，裁員好應份，我身邊都有人係咁講，唔明我哋打工嘅點解要嘈，咁我又想問下，啲老闆之前太平盛世賺咁多，又唔見佢拎出嚟講？拖完半個月糧，叫我哋出嚟拎票嗰日，老闆係揸住架Benz嚟㗎，佢點樣粉飾到畀社會運動累都好，講到點樣畀疫情搞到執笠都好，佢已經係住緊大屋同揸緊靚車好耐喇，咁都仲要拖我哋近乎最低工資嘅糧？正人渣！
投稿讀者：寄生族