噚日講到有位candidate嚟應徵，香港人，日文好，仲曾經以公司身份處理過稅務事宜，同埋有開商業銀行戶口嘅經驗，加上佢連老細搵屋甚至餐廳訂位都照顧到，我呢個assistant嘅職位仲唔係非佢莫屬？
呢位candidate講過佢前後3次辭職，第一次係因為老細好chur，要佢24小時on call，第二次就因為老細要佢幫手買壯陽藥，仲要陪埋去滾，結果呢兩次呈辭都唔成功，因為老細兩次都重手加薪留人，咁第三次又點解走，同埋點解走唔到呢？
「老細對日本有好多不滿，不過佢將怒氣發洩喺我身上，因為佢知我鍾意日本，所以成日會講一啲晦氣說話，咁我可以點呢？咪勸下佢要習慣，要入鄉隨俗囉！跟住佢就鬧我喇，話我on9，有時搵唔到我又會講粗口，咁我都會行開行埋㗎嘛，24小時on call啫，唔使去廁所咩！」
我：「可能佢喺呢度生活，心情真係好差。」
「係，我體諒佢，雖然我鍾意日本，但都知呢度其實好落後，不如我將老細鬧嘅嘢逐樣問返你，睇下你認唔認同吖。」
我：「好呀。」
「佢話日本毫無私隱可言，比起香港澳門同埋中國更加差，唔好講申請政府嘢或者銀行嘢，就連申請一張超市積分卡都差唔多要填晒所有個人資料，有啲唔關金融事嘅嘢一樣要upload在留卡或者駕駛執照，又麻煩又侵犯私隱。」
我笑一笑：「認同，所以好多日本人都知道，只要你搬屋去電器店買嘢，NHK好快就會搵上門，因為有傳佢哋賣information，同埋呢度真係好簡單好無關痛癢嘅嘢都要收集你好多個人資料。」（NHK喺日本嘅擾民程度，之後搵機會再講）
「我老細仲話……有啲粗俗，你唔好介意。」
我：「壯陽藥同泡泡浴都講晒喇，仲有更粗俗？」
「有呀，佢話日本人真係好怕英文，仲話呢度啲AV拍到食屎飲尿滴蠟鞭打要幾變態有幾變態，呢啲都唔驚，走去驚英文。」
我：「驚英文呢一點我認同，食屎飲尿滴蠟就冇乜研究，我比較唔到佢哋驚邊樣多啲。」
「老細又話銀行好擾民，開私人戶口，唔係就咁去銀行開咗就算，佢哋會寄封掛號畀你，要確定你真係喺度住，但其實你張在留卡已經有晒地址，所以呢個行為好多餘，假設你唔能夠親自收掛號，咁就要安排去郵局拎，同埋你屋企個信箱係要貼晒名，否則郵差會當冇呢個人，呢方面又係私隱問題，即係全棟大廈，又或者啲Sales嚟到，睇你信箱已經知你貴姓，第日白撞嘅機會率又高咗。」
我苦笑回應：「認同，所以之前去日本或者睇日劇，成日會諗點解屋企門口一定要貼自己貴姓，咁咪人人路過都知道晒囉，而家知點解。」
「老細之前要收封銀行信，收唔到，要去郵局拎，上網揀好晒日期同埋去邊間局，落到去見到貼咗張告示，原來間局一個星期前有人中肺炎，而家休業，換言之我老細上網揀日期嘅時候，郵局個系統並冇更新，亦冇提示畀客人知道佢哋唔開，老細話呢度好多system都好落後，咁簡單叫IT剔走個局唔畀人揀都做唔到。」
我：「呢度啲IT……你知唔知日本政府都係上個月先宣布廢除Floppy唔用，Floppy喎……我冇用十幾年喇，我對呢度IT冇期望，所以冇失望。」
關於英文同Floppy，題外話講少少，有headhunt舊同事曾經提出過好有趣嘅論調，佢話日本有好多公司請印度人嚟做IT，相當倚賴「外援」，原因就係日本人英文差，而寫program係要用英文冇得避，自己寫唔掂，印度人IT強之餘，人工又相比歐美平，所以呢度就有咁多印度IT人。
「我老細仲話日本好多嘢表裡不一，而且自相矛盾，舉個例，垃圾分類，最終目的係為環保，但你有冇留意日本好多嘢仲係要填表，用紙，你去一次政府部門，會發覺啲人通常唔係望電腦，係整理緊一張又一張嘅paper，老細話佢哋嘥鳩氣，好似返咗去80年代。」
我除咗繼續笑，都唔知可以點回應：「引用返你同你老細成日講嗰句，入鄉隨俗啦！」
「既然你都認同，咁點解你又冇發脾氣？」
我：「我會咁睇，你嚟日本，係因為工作一定要你嚟，定係你自己選擇嚟，如果係前者，絕對有資格抱怨，如果係後者，既然係自己揀，咁就唔好怨，呢啲都唔係我哋可以改變嘅嘢，與其花時間發脾氣同埋怨天怨地，不如調節心態去適應，咁樣會唔會實際啲？」
其實日本係一個好難講佢壞話嘅地方，因為呢度所有嘢嘅「包裝」實在太靚，未喺度真正住過或者工作過嘅人，眼裡盡是美好，但你只要曾經喺度生活一段時間，就會發現有好多嘢匪夷所思。
我個人嘅觀點係，每個地方都有佢嘅好，亦有佢嘅唔好，日本係咁，香港係咁，台灣係咁，英國美國加拿大都係咁，冇一個地方係完美，如果你選擇去接受佢好嘅一面，同樣地就要承受佢唔好嗰一面，身處其中，你要衡量自己會為咗佢嘅好而留低，定係因為佢嘅唔好而離開。
一句到尾，地方、文化、傳統，通通都唔會變，唯一可以選擇改變嘅，係你自己嘅心態，而心態呢樣嘢，足以決定你嘅境界，日屌夜屌谷住啖氣過日子，定係雲淡風輕笑住面對，完全係個人嘅選擇。
我：「其實你老細咁憎日本，點解仲留低呢？」
「咁佢呢度啲生意真係賺大錢，吹佢唔漲，而且佢喺生活同工作上都唔需要求人，相反求佢嘅人比較多，如果佢係打工就一早走咗啦！唉，今朝先畀佢鬧完。」
睇到呢度，你應該會認為我順利請咗呢位candidate係咪？佢今次係第4度辭職，結果同之前3次嘅結果都係一樣，老細用人工留住佢，最新呢次加到佢月薪70萬日圓……ok，佢老細贏，有錢果然任性。
「唔好意思，我話走，老細又加我人工，70萬日圓抗拒唔到，我同女友計劃呢兩年喺東京買樓同結婚，所以唔單止係錢嘅問題，呢份糧仲對我申請貸款置業好有幫助，你知日本啲銀行㗎啦！條數要靚，份工嘅record又要靚，對唔住呀，最後嚟唔到。」
我：「唔緊要，莫道你在選擇人，人亦能選擇你，最終我幫你跳咗次草裙舞，你份糧因為咁而再加多咗，都唔係一件壞事吖，雖然大家唔可以做同事，不過你應該要請我食飯喎！」
「冇問題，大家香港人，多啲約出嚟吹水啦，我都預咗收呢份糧，嚟緊會keep住受氣。」
呢位candidate既然選擇為咗錢而留喺原本間公司，並且做好受氣嘅心理準備，當中一定經過慎重嘅考量，我會尊重佢嘅決定。
如是者，我就比個candidate拒絕咗喇。