喺日本生活，語言可以透過努力去改善，習慣同規矩亦都可以適應，所以對我嚟講最大嘅難題係開戶口，因為當地嘅銀行體制係我哋無法改變，唔係講緊個人，係講緊公司嘅商業戶口，上網查下就會知道連日本人都遇到好多問題，更何況係外國人。
識得一個日本人，佢喺東京開咗間醫療用品公司好多年，主力向德國嘅醫院提供器材，所以規模都唔細，但佢最近為分公司開商業戶口嘅時候都接連被reject，日本銀行點解咁嚴謹就唔喺呢度討論喇，因為今次想講另一件事，就係我公司請人。
喺日本，申請任何嘢都要好多文件同埋手續就人所共知，開公司戶口就當然唔會輕鬆，交晒資料仲要無限補資料，又有銀行職員打嚟問好多嘢，所以我需要搵個日文好好，同時又識講英文或者廣東話是但一樣嘅人幫手，結果就決定請個assistant，因為公司最近亦搵咗稅理士，又係無限文件同埋無限溝通，實在兼顧唔到。
自從冇做headhunt之後，其實我都未正式出過招聘廣告，估唔到今時今日再出job ad，場地已經由香港變成日本，幸運地收到唔少resume。
先後見咗兩個人，一個英文叻，一個識講廣東話，佢兩個嘅特點係日文流利，可惜共通點都係唔識處理上述嘅問題，畢竟喺度讀書同打工只需要搞私人戶口，未接觸過公司層面嘅商業戶口，同埋未應對過商業稅理士都好正常，但呢樣嘢冇得將就，因為情況同你喺香港申請信用卡一樣，被reject會有record，咁你喺3個月至半年內再申請到嘅機會就好微（唔敢講一定唔得，但一定有影響），而外國人喺日本開公司，本身肯受你玩嘅銀行已經唔多，所以我哋要整理得好好，冇得亂石投林申請咗先算。
兜兜轉轉，終於等到一份最合適嘅resume，即刻約呢位candidate上office見工。
呢位candidate係香港人，男仔，佢份resume有兩個位好奇怪，首先係份糧，佢而家人工好高，但如果呢個人有料，出多啲都係值得，一分錢一分貨，呢方面我唔會吝嗇；其次係position，佢有描述平時要負責咩工作，但出奇地冇寫到自己係咩職位。
「因為我個position係冇一個正式嘅名，但就類似personal assistant，總之淨係服侍我老細，咩都關我事。」
我：「即係千手觀音啦，咁你有冇幫老細搞商業戶口嘅經驗？」
「有呀，你apply咗未？啱啱開始可以唔使諗三井住友嗰類銀行，郵政銀行係for個人為主，新生銀行仲可以搏下，最穩陣都係GMO，不過GMO冇得海外送金，你公司主要用香港做基地，呢方面應該幾大問題。」
行家一出手，便知有沒有，佢唔止日文好，就連以上問題都講得到，呢啲真係實戰經驗。
我：「係呀，上網好多人教開邊間邊間，但係到你真係去開戶口，就會發現有好多無法預料嘅問題，特別係海外送金嘅限制，我甚至唔可以做自動轉帳交公司嘅水電。」
「係呀，同埋有啲銀行係星期六日唔可以轉數出糧，仲有，喺東京你住邊區，你公司喺邊區，就只可以去返同一區嘅銀行開戶，跨區係唔會受理，即係你唔可以好似香港咁，住荃灣然後自由去任何一間hsbc開戶，喺日本你住目黑，就要去返目黑間銀行開戶，去咗新宿嗰間都會叫你走。」
係你喇！我要搵嘅人就係你喇！因為好多人覺得冇可能會發生呢啲問題，日本喎，公司戶口竟然星期六日過唔到數出糧？冇可能啦，係咪你唔識咋……
喺日本，冇嘢係冇可能，我指阻滯方面。
我：「聽你講，而家個老細係澳門人，咁你點解唔做嘅？因為我見你人工都真係好高，我係社長，出畀自己份糧都唔夠你而家咁高。」
「其實我先後辭咗職3次，第一次係入去做之後幾個月，因為個老細好臭脾氣，佢冇你咁尊重日本文化，所以見嘢就鬧。無可否認，日本人做嘢係傳統同埋守舊，但你改變唔到就會諗辦法適應，佢就唔會，而且份人好即興，凌晨諗到啲咩都會打嚟講公事，我基本上係24小時stand by一樣。」
我：「如果你咁講，即係嗰次辭職唔成功啦！」
「入去嗰陣份糧係27萬日圓，我一話辭職，老細即刻加到我35萬日圓，結果我決定留低，其實我咩都要幫佢做，唔止公司開商業戶口同埋聯繫稅理士交涉，我連老細私人戶口、信用卡、社保，仲有咩住民證都要幫手搞，佢買樓同埋裝修都係搵我做中間人聯繫，靜雞雞話你知，我仲要陪老細去泡泡浴嗰啲風月場所。」
我：「係咪幫你畀埋錢先？你係男仔，老細帶你去唔係應該好開心咩？」
「但我有女朋友吖嘛，我女友都係香港人，喺呢度讀書識，我嚟咗東京6年喇，不過重點係……個老細叫我幫佢買偉哥。」
又係偉哥……如果你哋有follow埋《辦公室日報》個ig，應該知我早排先出咗個post係講偉哥，突然間覺得自己同偉哥好有緣，香港嘅壯陽藥幾時先識得搵我寫廣告？
我：「點樣幫佢買偉哥？」
「其實日本啲壯陽藥唔難買，你唔使去診所睇醫生，甚至唔使去藥房，不過就要用Line去診斷，要等個有相關資格嘅人同你傾幾句，甚至要check你嘅醫療紀錄，傾完就畀錢，然後直接寄去你屋企。」
我：「你老細醫療紀錄有問題？定係唔好意思親自買壯陽藥？」
「佢係唔識日文，講唔掂，佢冇時間學，咁佢嘅生意真係好大，同埋我老細嘅生意基本上唔使求人，所以佢連五十音都未搞掂，但就真係好有錢，係你想像唔到咁有錢。」
聽下佢老細嘅出身同埋生意，終於明白點解會咁財大氣粗，但由於涉及第三個人嘅私隱，加上佢老細嘅生意都幾偏門，唔排除大家聽完之後會估到甚至搵到，所以我就唔喺度公開講喇，反正呢樣亦唔係本文重點。
我：「你話自己先後3次辭職，咁第2次係因為……」
「第二次就係因為買壯陽藥囉，同埋佢係咁叫我去滾，然後我直接同老細講真係唔想，跟手再辭職，佢又加我人工。」
我：「又加幾多？」
「加到45萬日圓。」
我：「你老細真係為咗你唔買偉哥唔去滾呀？」
「梗係冇啦，偉哥照舊要幫佢定期買，但係就唔使我陪去滾，只要我跟埋去幫手講日文交涉，然後落返私家車度等佢完事……我真係睇在人工份上，算啦，我喺車度等佢又可以自己打機上網，都唔會悶嘅。」
我：「你啲經歷好好聽，我想問埋你第3次點解辭職，呢樣唔關interview事，純粹係我自己有興趣。」
「冇問題，反正我都好多嘢想呻，又唔方便同自己女朋友講，好似幫老細買偉哥呢件事已經唔講得啦！第3次辭職係因為佢用粗口鬧我，仲鬧得好難聽。」（未完待續）
今日個ig post就係分享日本事
https://bit.ly/3CnfWWy