「嘩！今日套西裝好型喎，係咪Hugo Boss？呢套成set連埋褲應該要萬幾蚊，我見過有人著呀，完全『朗』唔起件褸，你著就好睇好多喇，Hugo Boss應該搵你做代言人啦，著得咁好睇，直頭要做晒成個亞太區代言添呀！」
誇到呢……一聽到個擦鞋同事James啲語氣就想嘔，用字又浮誇，組織下先講出嚟啦，Over咗喇！你唔好以為佢玩膠或者暗寸老闆喎，呢條友係真心㗎！每日總會搵到啲嘢狂讚老闆，最慘係咩呀？係我老闆受呀，次次都笑得好開心。
擦鞋都係一種技能，James做到而我哋做唔到，絕對係勝者為王，冇嘢好怨，同埋職場上真係有種人會倚賴擦鞋去保住份工，學子華神話齋：「搵食啫，犯法呀？」自己唔鍾意擦，亦無需唔抵得有人可以擦得咁徹底，不過James出晒名見高拜見低踩，平時好乞人憎㗎！
佢試過玩一個新人，人哋啱啱入嚟咩都唔識，James完全唔肯教，見到新人做錯嘢就即刻大大聲鬧，嗰次新人畀佢鬧到喊，而且唔係咩大件事，只係唔識用公司個system，James就話人大學生咩都唔識，喂，system呢啲嘢間間公司唔同，根本就唔關大唔大學生事啦！
嗰次條擦鞋仔鬧喊人之後，見到老闆行過就一秒變臉：「老闆，換咗新髮型喎，本來你已經好後生，而家睇落真係似30出頭，啲女畀你溝晒啦！話時話，呢個髮型搞到你睇落好似呀，MIRROR有個靚仔叫AK呀，又係好受啲女仔歡迎。」
解釋返先，我老闆差唔多60歲，成頭白髮，又點樣似AK呀大哥？擦鞋擦得咁明顯，唔差在瀨埋鞋底啦！
老闆尷尬回應：「有冇咁誇呀？你隔籬個同事做咩喊呀？」
James：「冇嘢，教緊佢做嘢之嘛，我搞得掂㗎喇 ！」
其實佢冇教過新人任何嘢囉，個新人擔心再畀佢鬧，走嚟我哋個department問個system點用，係我哋教㗎！
James平時做嘢仲好鍾意跣人，試過有客打嚟想搵另一位同事cancel張單，因為有嘢出錯，要重新再落order，不過嗰位同事行開咗，James聽完之後冇交帶一聲，差少少就成櫃貨走晒，好彩最後關頭截得切。
嗰鑊嘢搞到好大呀，個客話cancel嘅時候冇問擦鞋仔個名，但係就認得佢把聲，人哋唔識你，唔通屈你咩！
唔係想屈佢鍾意跣人，因為我喺工作上都畀James跣過，其他同事亦有無數大大小小嘅例子，呢條友係慣犯嚟㗎，只可以話James心地好差。佢仲試過偷偷地拆人糧單，然後當場斷正，唔理你係咪支持人工透明都好啦，偷偷拆人嘢就點都唔啱㗎啦！
因為我哋公司逢出糧都會由Account派一張糧單，好似信用卡密碼咁樣嘅長條形信件，有個同事因為請病假，所以Account將糧單放喺枱面，擦鞋仔竟然趁lunch啲人行開晒之後走去拆，好在有另一個同事返轉頭拎嘢撞到應，James仲死口唔認，話只係睇錯，以為係自己嘅糧單所以先拆喎！
對其他同事無品到極，對老闆又係另一個樣，我哋早已經司空見慣，早幾日公司開會又嚟料，佢九唔搭八話朝早見到老闆泊車：「你部Tesla好正喎，我都想買，不過買唔起，冇用吖，係你揸先型，畀我揸都唔係嗰種味道，老闆你先駕馭得到。」
老闆似乎有啲頂唔順：「咁香港好多人都揸Tesla嘅，其實好普通㗎啫，我有時坐Uber都call到Tesla，冇咩咁特別。」
「唔係呀，人哋揸Tesla點同你揸呀，不過你就算揸Toyota都型嘅，款頭呢啲嘢冇得講，天生。」
真係笑你On9怕你嬲，大家當笑話咁聽咁睇，後來James要出去先，淨返我同另一位同事留喺會議室同老闆夾條數，冇諗過我同事竟然抵唔住頸同老闆講：「James講嘢真係好誇張，我老公都揸Tesla，幾想錄音返去畀老公聽，最衰錄唔切。」
老闆自己都笑：「佢份人係咁，上次無端端話我隻香水好好聞，仲話一定係Tom Ford，問我喺邊度買，使唔使一千蚊，我都費事同佢講係百佳買嗰啲幾廿蚊嘅噴霧，算啦，大家得啖笑咪算囉！」
我：「老闆你都知佢擦鞋㗎？」見個氣氛咁easy，老闆心情又靚，我咪問下囉！
老闆：「點會唔知呀！上次James話我似AK，我返屋企同個女講，個女好嬲呀，叫我唔好侮辱AK，我老婆笑到而家，你哋私底下都應該係咁笑啦！真係好尷尬。」
我：「冇笑你，反而係笑James擦鞋擦得咁過火啫，我哋都知你係無辜嘅。」然後我哋幾個喺會議室爆笑。
老闆：「我都知James份人係點嘅，上次個新人做咗一個月就辭職，臨走嘅時候搵過我反映，話James唔教，淨係識鬧，咁James做自己嘢又好小心，冇咩出錯，作為老闆都要留個小丑喺身邊氹下自己嘅。」
噢！原來老闆知㗎……
有啲想同老闆講，唔使留住個擦鞋仔氹自己開心咁麻煩，出面有「誇誇群」，東方昇都出過片，畀少少錢就有人係咁讚你，使乜長期養住個擦鞋仔喎🙈