上星期見咗份工真係畢生難忘，其實喺interview嘅過程都係好正常，意料之內嘅self introduction，主要傾下之前幾份工係做咩同埋點解要走，然後聽對方講下佢公司係做咩，對個position有咩要求，來來去去嗰幾味啦！
HR見完我就直接輪到老細入房見我，基本上又係重複講多次同一堆嘢，最估唔到係個老細喺interview尾聲已經決定請我，仲要講埋想我幾月幾號返工，不過更加估唔到嘅係，佢同我講咗一句：「呢度要自備電腦㗎喎，HR頭先有冇同你講？」
我：「冇呀，點樣自備電腦？」
老細：「我哋呢度唔提供電腦，你要自己帶返嚟公司。」
我：「Sorry，我嗰部腦係desktop，拎唔到返公司喎。」
老細：「咁你就要買部notebook喇，如果你唔想拎嚟拎去，可以買部notebook放喺公司，咁你買部desktop擺喺度都得，我冇所謂，你用慣咩就咩啦！」
你冇所謂？我有所謂喎！
我直頭懷疑自己嘅聽覺，所以想confirm多次：「如果我唔帶自己電腦，即係返唔到工呀？」
老細：「咁就唔方便囉，要同同事share，你睇下出面格仔衫個男仔，佢部腦壞咗，訂咗部新MacBook，不過佢要加ram加盛，唔係即刻攞得，所以佢就同人share用住先，但係你新嚟呢，同人share可能會阻住同事，橫掂你下星期先返工，仲有時間去買。」
我：「唔好意思，不過電腦唔係應該公司提供㗎咩？」
老細：「其實電腦係員工自己返工嘅成本，公司嘅成本已經擺咗喺office個租同埋燈油火蠟方面，以前試過有同事整壞公司部腦，要佢賠嘅時候大家拗咗好耐，搞到好唔開心，咁樣好無謂吖，所以幾年前轉晒由員工拎自己電腦返工。」
可能我見識少，真係未遇過咁樣嘅公司，所以當時已經決定唔會做，講嘢亦都更直接：「如果照呢個邏輯，員工應該買埋枱枱櫈櫈喎，我以前返工都坐壞唔少櫈，到時咪有排拗？其實基本設備會唔會由公司提供合理啲？」
個老細feel到我反感，所以佢對我都明顯態度轉變：「咁你使唔使考慮下先？我哋呢度就係咁嘅，你望出去office裡面嘅同事都係拎自己部腦返工，其實對大家都係好事，我好多員工都話咁樣做嘢仲自在。」
或者咁講啦，的確有唔少人會拎私伙文具、私伙電腦，甚至係私伙電腦椅嗰啲返工，呢個係個人習慣同埋喜好問題，只係大前提公司都應該為員工準備好呢堆基本設備先合理，最後用公家嘢定係用私伙就自由決定，而唔係一嚟就要人自備電腦。
我：「唔好意思，咁我考慮下先。」
老細：「冇問題，不過你考慮啲咩呢？因為要自備電腦？」
我：「係呀，因為我要買過部新電腦，咁我本身已經用緊部desktop，如果第日唔做，我咪多咗一部囉。」同埋電腦都唔平啦，柒柒地砌部都要幾千，未返工又打三十大板，做落唔鍾意份工，咁咪賠了夫人又折兵？我真係唔需要兩部電腦咁多喎！
老細：「咁你呢兩日之內打返畀HR confirm啦，如果係咁我哋會繼續見其他求職者，到時請咗第二個就唔好意思喇。」
然後我自己離開佢個office嘅時候，一眼望埋去大約有10幾個員工，嗰陣我喺度諗，點解咁嘅公司都有人願意做，電腦係員工自己返工嘅成本？究竟係我有問題，定係個老細嘅邏輯有問題呢？
最後我冇take到呢個offer，亦唔覺得自己走寶，一個思維咁獨特嘅老細，恐怕喺度做會有好多古靈精怪嘅事出現，甚至仲有好多騎哩規則要遵守，要買部新電腦返工搏唔過。