多年前失業搵咗幾個月都搵唔到工，又要糊口養家，真係覺得好絕望，已經搵到便利店同埋餐廳，見呢類行業成日請人，可惜當時同區附近嗰啲全部請兼職或者時薪，有個水吧位就請全職，不過要經驗，我一直做開Quality Assurance Engineer，啲老闆睇到我之前嘅工作經驗同埋人工，唔請亦好合理，因為我好明顯係騎牛搵馬。
輾轉間屋企人識得個朋友做清潔外判，係啲私人屋苑收垃圾嗰種，已經唔理得咁多，點都要有份正職收入，結果我話想做，跟住就走咗去見工，我知對方都唔係好想請我，零經驗，之前又係斯文工，如果唔係有熟人介紹應該唔會理我。
對方唔介意我騎牛搵馬，因為佢有個清潔外判喺收垃圾時整親腰骨，要唞一兩個月，所以我哋一拍即合，但係個「判頭」仲係驚我做兩日就走。
「逐層收垃圾倒垃圾喎！你之前返寫字樓得唔得㗎？」
我：「冇問題啦，呢啲好小事啫。」
「第二個我就唔會咁問，不過見你官仔骨骨，真係有啲擔心一日都捱唔住，你都見到垃圾房呢啲環境啦，唔好之後同我講呢度好臭好污糟喎！」
我：「得㗎喇，放心，我有心理準備，冇問題！」
然後我就著上外判清潔公司嘅制服，係一件深藍色，背部印住公司名嘅Polo，開始推住架車逐層收住戶嘅垃圾，再推返去垃圾房，每日如是。其實都冇咩吖，氣味聞慣咗就冇嘢，係有時啲垃圾比較重，Ok嘅，比起做QA反而冇咁複雜，心理壓力都細啲，我一路做一路咁樣同自己講。
個屋苑喺我本身住嘅地方隔籬，因為呢度有個商場好多嘢食，所以工作期間有幾次遇到識得嘅街坊，睇得出佢哋神情帶點驚訝，不過我唔會避，仲主動打招呼，正正當當打份工唔需要覺得冇面，唔係偷唔係搶唔係攞綜緩，有咩問題？
最初唔習慣，收工後會好攰，所以做外判清潔工嘅初期我直頭冇再搵工，跟住做咗兩個月，整傷腰骨個外判工話唔返嚟，判頭問我可唔可以頂到佢搵到人，咁其實呢啲嘢你幫我，我幫你，故此就一口答應，而由於後期已經適應咗，我亦開始再send CV搵工。
外判清潔工一做就做咗5個月，再加埋之前失業嗰幾個月，如果我份CV絕口不提，變相就會有接近一年嘅Gap，我認為唔需要藏頭露尾，所以working experience都照打呢份外判工作，只係工作內容冇講到咁細緻。
嗰陣時有一份工係由headhunt幫我搵，因為佢會自己執CV先send畀個客，佢喺我唔知情下刪除咗清潔工接近半年嘅working experience，所以去到人哋嗰度interview嘅時候，個HR就問我點解有接近一年冇做嘢，我照直講同埋解釋，對方係誇張到坐喺度都成個移後，眼光變得好嫌棄，然後冇心機同我in落去，佢嘅肢體反應同面部表情好明顯，我心諗：「唔通倒完垃圾即刻嚟見工咩！已經冇做啦！你唔係聞到我個身有垃圾味啩？使唔使咁誇張呀？」
後來個headhunt仲怪我點解要將清潔外判工嘅經歷同人講，又話一早remind我唔需要提，教我求其作個藉口話屋企有事所以成年冇做嘢就得。(＊＊呢部份喺文章最後有註解）
或者呢位headhunt原意係想幫我盡快搵到工，但個人認為外判清潔工嗰段日子又唔係做緊犯法嘢，點解要作一個大話去隱藏呢段經歷？唔見得光咩？每個月出糧都係有血有汗㗎！
後來我係靠自己搵到工，做返Quality Assurance Engineer，負責interview嗰個人話佩服我能屈能伸，而且仲肯大方寫出嚟，我話唔係佢講得咁犀利，只係靠自己雙手賺錢有乜問題？做清潔外判工都係一個經歷，某程度上代表咗我嗰段時間嘅生活同埋心路歷程，真係唔想砌詞老作一個藉口去隱瞞，好好彩，呢間公司有請我。
講返呢件事係因為見到最近失業率又上返高位，希望藉此勉勵未搵到工嘅人唔好灰心，或者呢個真係最差嘅時代，已經唔係放下身段就一定搵到嘢做，但係絕對唔好咁快判自己死刑，柳暗花明又一村，個天好公平，有低潮，亦必定會有轉捩點，唔好諗埋一邊，更加唔好放棄。
＊＊版主聶瞳註解：一般而言，經獵頭公司見工，Headhunter會將candidate嘅resume執過，因為send畀客人嘅時候，可能會一次過介紹幾個candidate，而每位candidate嘅resume一定會唔同format，所以目的係統一格式。舉例我當年除咗執到統一，仲會自己加summary，幫candidate列舉佢哋嘅強項同重點，然後畀一份candidate，等佢見工前有更好準備。當然亦有人執完resume係唔畀candidate過目，因為唔少人認為執resume係專業技能，需要收費，其實無分對錯，純粹作風問題，我嘅做法唔代表一定啱，記得當時任職嘅獵頭公司就有執CV服務，收$3,000一份，所以喺老細眼中，我執完畀candidate拎去用，甚至叫佢用呢份有summary嘅resume去見其他工，應該係損害緊公司利益🙈