其實我真係好嬲自己，最初見工嘅時候HR已經講咗，一入嚟做就要接受公司嘅training，如果一年之內辭職就要賠training fee $10,000，點解我可以完全冇戒心㗎呢？而家覺得好惡做想resign，又真係唔想賠成皮嘢咁多。
首先我個阿姐係變態，一齊工作之後，發現佢同見工嗰陣係好大分別，interview懶係循循善誘，做落先知好多不合理要求，雖然我自己都係女人，亦承認有時女人會喜怒無常，但點都唔會帶入工作裡面，偏偏呢個阿姐就係咁。
朝早一返到嚟，阿姐唔知點解已經黑緊面，有啲嘢明明係聽日交，佢朝早已經鬧緊同埋追緊，咁你一係講提前一日交啦，仲煩過我阿媽，同埋佢好似講到你一定會遲交咁樣，啲語氣係未審先判，好鍾意畀心理壓力同事。
正當你以為呢日冇運行，中午阿姐嘅情緒又突變，無啦啦買啲糖返嚟請我哋食，走開啦！冇人想食呀！跟住又懶係關心你，不斷問同事嘅私事，啲態度同朝早相比係180度轉變，然後臨放工又發癲，準時走都要單單打打，問長問短質疑你未做晒啲嘢，如果間公司嘅嘢可以做得完，咁即係冇生意執得啦！
阿姐都只係呢間公司其中一個麻煩人，其實部門仲有好多屎忽鬼，有啲十問九唔應好似殺咗佢全家咁，大家都係出嚟做嘢啫，你職位又唔係高啲，做咩要畀面色人哋睇呀。卸膊精當然有好多，都唔知點樣描述，總之佢哋嘅勢頭就表現出：「呢單嘢唔係我跟開，唔好問我。」
唔係新人先唔適應，我見公司內部好多人都唔和諧，基本上每日都有同事鬧交，互相粗口問候又見過，講嘢有骨互串又聽過，唔使問都知呢班人私底下好多恩恩怨怨係從工作累積返嚟，仲未計嗰啲所謂山頭文化，呢度小圈子特多。
我喺公司可以傾到計嘅人得兩個，因為我哋同一team，受嘅苦都一樣，加上我同呢兩個女仔嘅年齡差唔多，「心意」都係一樣，所以格外投契，我哋嘅共通點都係想走又未做夠一年，唔想賠$10,000益咗呢間公司。
其實我同呢兩位女同事熟咗之後，佢哋曾經講過：「你嚟見工嗰日已經提咗你㗎喇，真係冒住生命危險㗎！」
我：「幾時有呀？」
「我哋趁住你離開去撳電梯嗰陣，特登一齊去廁所，經過你身邊講咗幾句呢間公司真係好麻煩，真係想即刻轉工，你聽唔到咩？」
我：「我有印象呀，但係當時未正式入嚟做，我都唔知大家同team，同埋我都有返去同男朋友講，臨走聽到兩個職員講咩公司好麻煩想辭職，我男朋友話唔使理，仲估係啲人唔想我入嚟做，怕我搶飯碗。」
「返去飛咗你條仔啦！男仔之家咁大疑心嘅，當時我哋真心提你㗎，想你聽到之後會諗一諗。」
我：「做咩唔直接講呀？」
「你都傻嘅，嗰陣又唔識你，唔通兜口兜面叫你唔好入嚟做呀？雖然每次見到求職者上嚟填form，我都好想衝埋去撕爛張form叫啲人走。」
我明呀！而家做咗兩個半月，期間都有見過求職者上嚟in其他department，我都有衝動大嗌一聲：「唔好做呀戇鳩！走啦！」
我真係好後悔當初唔聽佢哋提點，不過見工嘅時候仲未識佢哋，結果就跌咗入呢個陷阱喇。
後來我反覆諗過，咩training course都係多餘，正常你入一間公司做嘢，點都要train你㗎啦，巧立名目話一年之內走要賠training fee，其實已經反映咗好多人曾經短時間離職，所以呢啲policy擺明係要綁住個員工最少一年，再唔係就要忍痛賠錢，所以第日搵工我都會小心啲，呢鑊嘢真係輸經驗。