「有冇人見過我隻鞋呀！邊個偷咗我隻鞋呀！拎返出嚟啦！趕住出去呀！」有一次落大雨，個同事返到office就除咗對皮鞋換拖鞋，點知當佢準備出去食lunch嘅時候就唔見咗其中一隻鞋，所以喺個位度咆哮。
有啲同事喺度笑，有啲就好認真咁話唔好玩，其實大家都知道係Nelson做，不過當時Nelson又行開咗，擾攘咗一輪之後，隔籬team個阿姐就喺pantry行出嚟好大聲咁講：「你哋有冇搞錯呀，擺隻鞋喺雪櫃，知唔知好污糟好多菌㗎，雪櫃有食物有飯盒㗎！」
每間公司梗有一兩個貪玩嘅同事，不過有好多都識得睇眉頭眼額，識得分邊個玩得邊個唔玩得，又或者會視乎氣氛同場合，偏偏Nelson呢條友仔真係完全冇底線，最慘係有啲同事每次見到佢整蠱人成功就哈哈笑，可能因為咁，Nelson就成日覺得咁樣玩係好有趣。
偷咗人一隻鞋擺入雪櫃只係小菜一碟，Nelson仲試過反鎖同事喺廁所，同電視劇裡面攝支棍頂住度門嘅橋段一樣，不過嗰次係放工時間，被lock嘅同事叫天不應叫地不聞，因為好多人都走晒，最後google管理處電話再call保安上嚟放人。
Nelson喺一大堆外賣送嚟嘅時候，隨意揀咗一盒出嚟夾走晒啲餸，中招嘅同事唔知頭唔知路梗係打去間餐廳嘈啦，人哋話冇可能亦未試過叫燒味飯會連條菜都冇，淨係送盒白飯嚟，又明顯見到有豉油漬同啲薑蓉，質疑呢位同事玩嘢。
搞咗一大輪，Nelson先至笑住認係整蠱對方，唔關間餐廳事，lunch得一個鐘，呢個玩笑一開就30分鐘，個同事鬧完Nelson之後要急急腳落街堂食，真係多得佢唔少。
成日玩到咁大，淨係得畀人偷餸個同事會出聲鬧？梗係唔係啦，個個都鏟到Nelson上天花板，不過呢條友仔永遠都嘻皮笑臉，粗俗啲講句就係「戇鳩當有趣」，佢都成27歲啦，雖然喺公司算後生，但係都做咗廿幾年人，真係好幼稚。
成件事都牽涉到你㗎聶瞳，佢將你之前嗰句「錢少事多返工遠，權輕位低責任重」print咗出嚟，大大隻字貼喺partition度，留意返，佢係貼喺partition外面，唔係對住自己，換言之人人路過都見到，包括老闆。
老闆見到呢句嘢好唔爽呀，忍咗Nelson成個月先出聲都算係咁，行埋去叫佢搣返落嚟嘅時候，Nelson又係笑笑口，有時覺得佢都幾似軟皮蛇，大佬呀，嗰個老闆嚟㗎，唔係叫你擦鞋，不過都要有少少分寸吖嘛，唔識分場合去開玩笑㗎咩？
Nelson又試過亂塞啲文具落同事個袋度，有次個同事放咗工突然折返，因為行行下覺得個背囊好重，原來有人將5個膠紙座擺咗落去，唔使問阿貴都知係Nelson搞鬼啦，個同事嬲到出煙，但Nelson個衰仔已經走咗，打去想鬧佢又特登唔聽。
仲有一次，有同事生日，Nelson自告奮勇話負責訂蛋糕，我聽到都已經心知不妙，唔知點解啲人又放心交畀佢做，結果大家喺meeting room打開個盒準備唱生日歌嘅時候，一揭起就見到好大個「屌」字……
同輩同事玩下冇問題呀，唔係有粗口過敏症，但生日嗰位係其中一個department head，老嘢一名（幾好人唔係old seafood），加上老細都入埋房諗住一齊唱生日歌，馬撚咁大隻「屌」字真係搞唔掂喎，玩唔緊要呀，都唔好無的放矢吖嘛，個department head平時咁nice咁親民，你「屌」佢做咩呀？現場氣氛簡直尷尬到一個點。
另一次都玩到好大，話說公司有個滅絕師太，老姑婆嗰type，Nelson走去叫人送花上嚟，未講完，佢加咗張卡扮係另一個男同事送，即係明屈對方，滅絕師太可能一早決定梳起唔嫁，所以收到紮花之後唔單止唔開心，仲好嬲咁走去鬧個男同事：「你搞埋啲咁嘅嘢做咩呀？」
當時被屈嘅男同事完全唔知發生咩事：「咩搞埋啲咁嘅嘢？你講咩？」
滅絕師太一嘢將紮花「車」落男同事個身度：「我問你做咩送花畀我呀！」
一時間全公司嘅人都望晒過去，一來好大聲，二來大家都想知邊個精蟲上腦走去送花畀滅絕師太。
不過呢個只係藥引，緊接落嚟嘅對話先至傷感情。
男同事：「你都痴L線，無啦啦送咩花畀你呀？妄想症呀？」
講解下先，呢位男同事本身唔係省油的燈，佢平時嘅性格係非常火爆，後來諗返當然知道又係Nelson搞鬼啦，不過當時滅絕師太勢凶夾狼，加上成單嘢又瘀皮呢，所以個男同事一心只顧住反擊開火。
滅絕師太：「做得出唔夠膽認？你張卡呀！睇下你寫咩啦！我告你性騷擾都得呀！」
張卡寫乜嘢只有佢兩個睇到，因為冇讀出嚟亦冇傳閱，公司兩大火球同時燃點咗，加埋性騷擾呢個指控咁嚴重，冇人敢出聲，更加冇人敢問啦，想走埋去勸開都怕畀是但一個打，所以唯有焗住食花生睇事態發展。
男同事：「你都short嘅，溝你，我X樹窿都唔X你呀！」
呢句真係致命傷喇，正所謂豬扒都係肉，好過去自瀆，講到X樹窿都唔X人，咁又過份咗啲，本身滅絕師太同呢位火爆男同事都冇兩句㗎喇，從此之後更勢成水火，直至今時今日都未冰釋前嫌呀！
可能件事玩到太大，Nelson之後死口唔認係佢做，儘管火爆男同事講到明唔信，一口咬定係佢玩嘢，不過Nelson答咗好多次唔係，又話點會送花玩人咁揼本咁傻。
隔咗幾個月之後，Nelson終於喺我哋面前承認咗係佢做，又話嗰陣兩位當事人都失晒理智，所以唔敢坦白，我真係好想將成件事講返畀滅絕師太同埋火爆男同事聽呀，你咁樣玩法遲早一日會出事，我唔知Nelson喺公司以外有冇咁樣玩人啦，如果出到去外面個世界隨時畀人打死都唔奇。
不過呢單嘢冇演變成性騷擾事件，下一單終於發生咗喇，仲一發不可收拾！
有個同事用公司部電腦開Web版WhatsApp，咁你知平時做嘢總會行開行埋啦，Nelson襯人哋去廁所又走去整蠱對方，打咗句「我好想同你搞嘢」然後亂send去同事Web WhatsApp頭十幾個人，我唔知佢係急得滯冇睇清楚定係特登，其中一個原來係老闆，因為個同事去廁所前正正用WhatsApp同老闆report公事嘅小細節。
老闆收到呢句「我好想同你搞嘢」嘅WhatsApp msg之後直接衝出房，本身應該想去鬧send畀佢嗰位同事，點知就剛剛好見到Nelson「作惡」完離開人哋個位，而嗰位同事又啱啱去完廁所返嚟，呢鑊真係剛剛遇著啱啱。
由於我個位都對正Nelson、老闆，仲有返入嚟嗰位「被害同事」，所以離遠見到老闆遞部手提電話同「被害同事」溝通幾句之後，就一齊行埋去怒轟Nelson，差啲唔記得講，我老闆係女人嚟嘅，收到呢句msg自然覺得被冒犯。
其實「錢少事多返工遠，權輕位低責任重」print out事件同埋「屌」字生日蛋糕呢兩件事之後，老闆已經被焫㷫，擺明睇Nelson唔順眼，但可能以上兩件事又唔足以炒咗個員工，撞正呢單「我好想同你搞嘢」嘅事就梗係手起刀落啦！
炒人不特止，老闆仲執意要告Nelson性騷擾，同日上埋差館報案，而家件事仲搞緊㗎，只係我哋呢班小員工唔敢問亦費事參與太多，聽講老闆個老公仲要係律師，係咪呢，玩都要識分輕重，出晒事啦，希望Nelson會汲取教訓，第日整蠱人會識得收斂下。