我嚟而家呢間公司見工嘅時候，係完全冇填過任何application form，面試都係一次過完成，過程極之流暢，後來有朋友同我講，佢哋間公司in人時都唔需要填form，唔使大驚小怪，雖然係咁啫，我自己真係第一次遇到interview唔使填form嘅情況，而且最後仲要請咗我。
Interview程序咁簡化同埋流暢，其實係歸功於我阿姐，佢係HRM（Human Resources Manager），而我就係under佢嘅其中一位HR，阿姐同我講，收到resume嗰陣已經有晒求職者嘅資料，咁仲要填form係為咗啲咩呢？何況見工又唔代表請，好多私隱根本唔需要知，呢個舉動有好多人buy，特別係新一批入職嘅同事。
唔敢講呢位HRM阿姐處理招聘嘅手法好新派，但有一點可以肯定，就係非常人性化，佢都係入咗嚟做一年左右，而我就係佢第一個喺呢間公司請嘅員工，所以親眼睇住阿姐進行多項改革，嚟見工唔使填form只係其中一樣。
另外，阿姐亦從來唔會問求職者之前嘅工作係幾錢人工（如果對方自己喺resume已經打咗出嚟就冇辦法啦），佢只需要求職者填expected salary，見工後如果覺得值就畀，絕對唔會參考人哋以前賺幾多再開價。
曾經同阿姐一齊in人，嗰個position其實set好咗budget，人工大約係$32,000至$38,000呢個range，點知個求職者填expected salary $27,000，先唔計我哋公司嘅budget，求職者自己嗌嘅價都低過出面market price好多。
阿姐：「以你嘅年資同埋經驗，點解會嗌$27,000？」
求職者：「因為我上一份工$26,000，係咪叫價太高？」
阿姐：「唔係，你知唔知自己一直below market price？唔理你之前幾多人工，其實你係值3字頭以上，唔使咁保守，我幫你爭取$33,000啦好冇？」
最終呢位求職者順利受聘，人工係$33,000，佢到而家都覺得我阿姐好好人好幫忙，其實我都係咁諗，不過老細同埋一啲資深嘅員工就相反，佢哋唔鍾意我阿姐破舊立新，認為好多嘢都做壞規矩，所以一直以嚟都有微言，我聽過有部門經理當面話阿姐：「你叫人填返form啦，冇form好難in呀！」
阿姐：「點會難in呀？每個求職者都有send resume嚟，啱先會約interview，我又print晒資料出嚟畀你，份resume咪已經清清楚楚囉，上到嚟公司又填一次？」
部門經理：「啲格式都唔同。」
阿姐：「我見到公司之前張application form連讀邊間小學都要填，有必要咩？過往工作又全部要填last salary，呢啲都係不必要。」
部門經理：「點會不必要呀？以前張form好工整，名、身份證、地址、學歷、工作經驗，全部直落，我哋睇慣咗呀！」
阿姐：「講開地址，其實係私隱嚟㗎喎，你唔好忘記見工唔代表請對方，咁你要收集人哋咁多資料做乜？你都未正式請佢。」
部門經理：「咁你請咗佢之後咪煩囉，又要佢填過，係咪自己搵嘢嚟做呀？仲有啲位要簽名㗎嘛！」
阿姐：「咁咪另外簽囉，或者真係請佢先簽囉！有幾多嘢做呀？你一個position請一個人，收100份resume，叫10個上嚟見，最後咪又係揀一個，咁唔通請完佢之後我哋班HR自行了斷，唔識得入返system咩？好簡單嘅工作嚟之嘛！」
部門經理：「點解你要懶係創新呢？我哋不嬲見工都係要填form㗎啦，幾廿年都係咁㗎喎！」
阿姐：「講開幾廿年都係咁呢個問題，你知唔知我後面幾個櫃就係以前啲求職者嘅application form，一疊一疊都係冇請嘅人，請問keep住做咩？銷毀又麻煩，我哋又唔係賣求職者嘅資料出去。」
呢種爭拗發生過好幾次，我都知道有班舊人唔妥阿姐，老細就更加啦，因為阿姐冇將求職者要求嘅薪金壓到最低，冇幫公司慳錢吖嘛，其實阿姐曾經講過，唔係特登要老細用多啲錢，而係個員工如果本身係值咁多，你畀到相應嘅待遇先請到人同埋留到人，仲話我哋根本冇畀多，只係畀一個合理嘅價錢，就係太多人用last salary去釐定expected salary，職場先至會咁多壓榨嘅情況出現。
同埋呢個阿姐偏向將招聘流程簡化，例如佢知道department head或者老細有時間（有啲senior position要見埋老細），就盡量會將interview喺一日之內完成。
不過唔知點解，班老鬼又係十分唔buy阿姐呢一套，佢哋覺得1st in就係1st in，要second in或者third in就要約另一日，佢哋話要準備喎，唔鍾意阿姐走埋去問佢哋有冇時間見一見求職者……
阿姐同我講：「當然啦，如果佢哋有嘢做，開緊會或者準備要出去，我係唔會迫佢哋即刻同求職者進行second in，但好多時我睇住佢哋好得閒，唔係行嚟行去就係撩人吹水，咁你不如花少少時間in埋，有啲求職者要另外再請假，好多公司請假唔係咁容易㗎！」
社會始終係殘酷嘅，淨係得求職者buy你其實好小眾，公司班資深老鬼同埋老細都唔like就點都冇運行，佢哋畀咗好多hard time我阿姐，作為HR department嘅其中一份子，我當然都要一齊受啦，所以我阿姐本身都做得好冇癮，適逢佢老公提議過英國生活，所以阿姐上個月辭咗職喇，好快就last day，我真係唔捨得佢。
預期阿姐走咗之後，公司會重啟見工填application form嘅步驟，嗰張又要填小學邊度畢業、住址、last salary等等嘅舊form又要出場。
班老鬼同老細成日話新嘅招聘流程同埋方式好難習慣，阿姐話根本好多70後、80後、90後都唔慣，只係大家為咗搵工搵食，最終仍然要忍受同接受，未來會有更多00後唔接受傳統招聘流程，例如send完resume仲要填form，未請已經要畀人查家宅，正常嚟講真係唔應該慣，只係有一班人慣咗太耐，再視之為應份同正常。
我自己有個非正式統計，就係經阿姐請返嚟嘅人到目前為止一個都冇走過，反而舊人就好似走馬燈咁換從未停過，而且由阿姐in完嘅人，再打電話去confirm offer係未試過被拒絕，我覺得關鍵係呢班人嚟interview嘅時候留低咗好好嘅印象，嚟緊阿姐唔做，真係唔知請人呢part會變成點，唔捨得佢。